បាញ់សម្លាប់ ឈុត វុទ្ធី៖ ក្រុមសកម្មជនការពារព្រៃ ប្រជុំគ្នារំលឹកខួប២ឆ្នាំ
ព្រះសង្ឃនិងសកម្មជនការពារព្រៃឈើជាង ១០០នាក់និងអង្គ នឹងជួបជុំគ្នានាចុងសប្តាហ៍នេះ នៅទីកន្លែង ដែលសកម្មជនការពារបរិស្ថានដ៏ល្បីល្បាញ និងជាអតីតប្រធានអង្គការការពារធនធានធម្មជាតិ លោក ឈុត វុទ្ធី ត្រូវបានបាញ់សម្លាប់ ដើម្បីរំលឹកខួប២ឆ្នាំនៃហេតុការណ៍ដ៏រន្ធត់នេះ បង្កឡើងដោយមន្ត្រីរាជអាវុធហត្ថ នៅក្នុងពេលដែលលោក បានចុះស៊ើបអង្កេតបទល្មើសព្រៃឈើ នៅជួរភ្នំក្រវ៉ាញភាគកណ្តាល។
លោក ឈុត វុទ្ធី ក្នុងបេសកកម្មរបស់លោក ដើម្បីការពារធនធានធម្មជាតិកម្ពុជា។ (រូបថត Australian National University)
ព្រៃឈើ - សេចក្តីប្រកាសព័ត៌មានរបស់អង្គការការពារធនធានធម្មជាតិ ដែលបានចេញផ្សាយនៅថ្ងៃទី២៥ ខែមេសា ឆ្នាំ២០១៤ បានឲ្យដឹងថា នឹងមានការជួបជុំសកម្មជនព្រៃឈើ មកពីតាមបណ្តាខេត្តនានា រួមទាំងព្រះសង្ឃនៅទីរូមខេត្តកោះកុង នៅថ្ងៃទី ២៥ ខែ មេសា។ ហើយនៅថ្ងៃទី២៦ ខែមេសា សកម្មជនទាំងនោះ នឹងធ្វើដំណើរទៅកាន់ចំណុចវាលបី ឃុំបាក់ខ្លង ស្រុកមណ្ឌលសីមា ជាកន្លែងដែលលោក ឈុត វុទ្ធី ត្រូវបានគេបាញ់សម្លាប់ កាលពី២ឆ្នាំមុនដើម្បីពិធីរំលឹកខួប។
លោក ឈុត វុទ្ធី ប្រធានអង្គការការពារធនធានធម្មជាតិត្រូវបានគេបាញ់សម្លាប់នៅថ្ងៃទី២៦ ខែមេសា នៅត្រង់ចំនុចវាលបី ឃុំបាក់ខ្លង ស្រុកមណ្ឌលសីម៉ា ខេត្តកោះកុង នៅខណៈពេលដែលរូបលោក បាននាំអ្នកសារព័ត៌មានក្នុងស្រុកពីររូបចុះទៅយកព័ត៌មានស៊ើបអង្កេត និងថតរូបសកម្មភាពបទល្មើសព្រៃឈើខុសច្បាប់ នៅតំបន់ជួរភ្នំក្រវាញភាគកណ្ដាល ខេត្តកោះកុង។ បន្ទាប់ពីក្រុមរបស់លោកបានព្យាយាមទៅថតរូបភាព អំពីការកាប់ឈើ របស់ក្រុមហ៊ុនឯកជនមួយនោះ លោកក៏ត្រូវបានកងកម្លាំងការពារក្រុមហ៊ុនផ្ទុះអាវុធ ផ្ដាច់ជីវិតនៅនឹងកន្លែងតែម្ដង។
បន្ទាប់ពីមរណៈភាពរបស់លោកឈុត វុទ្ធី រដ្ឋាភិបាលបានបង្កើតគណៈកម្មាធិការស៊ើបអង្កេតចម្រុះមួយ នៅថ្ងៃទី៣០ ខែមេសា ដើម្បីធ្វើការស៊ើបអង្កេតបន្ថែមទៀត ហើយក៏បានប្រកាសក្នុងសន្និសីទសារព័ត៌មាន នៅទីស្ដីការគណៈរដ្ឋមន្ត្រី ថា លោក ឈុត វុទ្ធី ត្រូវបានលោក អ៊ិន រតនា បាញ់សម្លាប់ ហើយលោក អ៊ិន រតនា បានត្រូវគ្រាប់កាំភ្លើងដោយចៃដន្យ នៅពេលលោក រ៉ាន់ បូរ័ត្ន ដណ្ដើមកាំភ្លើងពីលោក រតនា។ លោក រ៉ាន់ បូរ័ត្ន ត្រូវបានចោទប្រកាន់ពីបទមនុស្សឃាតដោយអចេតនា ដោយផ្តន្ទាទោស២ ឆ្នាំនៅក្នុងនិងតម្រូវឲ្យអនុវត្តន៍ទោសចំនួន៦ ខែនៅក្នុងពន្ធនាគារនិងទោស១ឆ្នាំ ៦ខែទៀតត្រូវព្យូរទោសឲ្យនៅក្រៅឃុំ។
នៅថ្ងៃទី៤ ខែតុលា សាលាដំបូងខេត្តកោះកុង បានបើកសវនាការជម្រះរឿងក្តីមនុស្សឃាតដោយអចេតនា តែតុលាការពុំបានចាត់ការសុំណុំរឿងលោក ឈុត វុទ្ធី ទេ ដោយសារលោកឈុត វុទ្ធី និង ឃាតករ អ៊ិន រតនា បានស្លាប់ទាំងពីរនាក់ ដែលជាតុលាការមានអំណះអំណាងថា បណ្តឹងអាជ្ញាក៍រលត់ដែរ។
លោក ឆឺយ ឧត្តមរស្មី កូនប្រុសរបស់លោកឈុត វុទ្ធីបានថ្លែងឲ្យដឹងថា នេះគឺជាខួបលើកទី២ ឆ្នាំ ហើយក៏ជាលើកទី១ផងដែរ ដែលប្រជាសហគមន៍ការពារព្រៃឈើ មកពីបណ្តាខេត្តនានាដែលធ្វើការជាមួយឪពុករបស់លោកនាំគ្នា ទៅធ្វើពិធីនៅកន្លែងកើតហេតុនេះ។ លោកបានថ្លែងឲ្យដឹងទៀតថា៖ «ក្រុមគ្រួសារនិងអ្នកដែលស្រលាញ់ព្រៃឈើ នៅតែចង់ចាំរូបគាត់នៅក្នុងបេះដូងជានិច្ច។ ហើយខ្ញុំនឹងបន្តស្វែងរកយុត្តិធម៌ដល់ឪពុករបស់ខ្ញុំ បើទោះបីជាតុលាការស្រុកខ្មែរ បានច្រានចោលដោយមិនចាត់ការលើសុំណុំរឿងនេះក៏ដោយ។»
ឧត្តម បានថ្លែងបន្តទៀតថា លោកកំពុងតែស្វែងរកការជួយជ្រោមជ្រែង ពីស្ថាប័នអន្តរជាតិដើម្បីឲ្យរូបលោកអាចកសាងសុំណុំរឿងនេះ ទៅតុលាការយុត្តិធម៌អន្តរជាតិ ពីព្រោះតុលាការនៅស្រុកខ្មែរ ស្ថិតនៅក្រោមអ្នកមានអំណាចមិនអាចរកអ្នកបញ្ជារ ឲ្យបាញ់សម្លាប់ឪពុករបស់លោក។ លោកបានថ្លែងថា៖ «ខ្ញុំចង់រកយុត្តិធម៌ឲ្យឪពុកខ្ញុំ ថាតើអ្នកណាជាអ្នកបញ្ជារឲ្យបាញ់ឪពុករបស់ខ្ញុំ»។
ជុំ យីម សកម្មជនការពារព្រៃឈើដែលធ្វើការយ៉ាងសកម្មជាមួយលោក ឈុត វុទ្ធី ដើម្បីប្រឆាំងនឹងបទល្មើសព្រៃឈើនៅព្រៃឡង់ ដែលគ្រោងនឹងទៅចូលរួមពិធីនោះបានថ្លែងឲ្យដឹងថា ប្រសិនបើមានការរារាំងពីសំណាក់អាជ្ញាធរ នៅថ្ងៃដែលប្រារព្ធពិធីនោះ ពួកលោកនឹងជម្នះព្យាយាមចូលទៅឲ្យដល់កន្លែង ដែលគេបាញ់សម្លាប់គាត់ដើម្បីប្រារព្ធពិធីឲ្យបានពីព្រោះគាត់គឺជាវីរៈបុរស ការពារព្រៃឈើនៅទូទាំងប្រទេសកម្ពុជា។ លោកបានថ្លែងឲ្យដឹងថា៖ «ពួកយើងមិនខ្លាចទេ ពីព្រោះពេលកន្លងមក បើទោះបីជាមានការគំរាមពីប៉ូលីសយ៉ាងណា ក៏ពួកយើងនិងលោកគ្រូ ឈុត វុទ្ធី នៅតែព្យាយាមទប់ស្កាត់បទល្មើសព្រៃឈើ ព្រមទាំងបានដុតបំផ្លាញ អស់ជាច្រើនគូបទៀតផង»។
លោកបានថ្លែងឲ្យដឹងទៀតថា សព្វថ្ងៃនេះបទល្មើសព្រៃឈើ កើតឡើងឥតស្រាកស្រាន ដោយសារតែឈ្មួញទាំងនោះដឹងថា គ្មានអ្នកណាក្លាហានចេញមុខប្រឆាំងជាមួយពួកគេ ដូចលោក ឈុត វុទ្ធី ម៉្យាងទៀតពួកគេក៏បានទិញទឹកចិត្តសហគមន៍ឲ្យកាប់ឈើឲ្យពួកគេផងដែរ។ លោកបានថ្លែងថា៖ «ប្រសិនបើលោកគ្រូ វុទ្ធី នៅរស់ ការកាប់បំផ្លាញព្រៃឈើមិនអានាធិបតេយ្យដូចសព្វថ្ងៃនេះទេ។ ពួកយើងខំធ្វើដែ រតែមិនមានឥទ្ធិពលដូចគាត់។»។
កាលពីថ្ងៃទី ២៦ ខែ មេសា ឆ្នាំ ២០១៣ នៅឯព្រះអង្គដងកើ សហគមន៍ព្រៃឡង់ បានច្រៀងរំលឹកពី លោក ឈុត វុទ្ធី ជាលើកដំបូងក្នុងថ្ងៃដែលសហគមន៍នេះ ប្រកាសទទួលបានពានរង្វាន់ និងលុយ ២ម៉ឺន ៥ពាន់ដុល្លារ ពីមូលនិធិ អេឡិចសេនឌឺ សូរ៉ូស (Alexander Soros) ដើម្បីគាំទ្រសកម្មភាពការពារព្រៃឡង់បន្តទៀត។ យ៉ាងណាចំរៀងទាំងនោះ សហគមន៍ព្រៃឡង់កំពុងស្វែងរកមូលនិធិដើម្បីថតជាស៊ីឌី (CD) និងវីស៊ីឌី (VCD) ដោយមានទំនុកភ្លៀងទុកជាឯកសារ៕
------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី២០ មេសា ២០១៤