ប្រជាពលរដ្ឋមួយចំនួនធំ ទើសទាល់នឹងការតម្លើងថ្លៃរថយន្ត«ក្រុង» តាមតែអំពើចិត្តរបស់«មេឈ្មួញ»ទាំងនោះ ដោយគ្មានការគ្រប់គ្រង ត្រួតពិនិត្យ និងមានវិធានការពីរដ្ឋាភិបាលកម្ពុជាបច្ចុប្បន្ន។ ក្នុងឆ្នាំ២០១៤នេះ សំបុត្រឡាន​ក្រុង​«ក្រោយ»ចូលឆ្នាំខ្មែរ មិនត្រឹមតែមានតម្លៃលើសពីតំលៃ«ធម្មតា» តែថែមទាំងមានតម្លៃលើសពីតម្លៃ​«មុន»ចូល​ឆ្នាំនោះទៅទៀត។

រថយន្ដក្រុង របស់ក្រុមហ៊ុនដឹកជញ្ជូនល្បីឈ្មោះ ក្នុងរាជធានីភ្នំពេញ។ (រូបថត MONOROOM.info/ O. Vary)

រថយន្ដ«ក្រុង» - ទស្សនាវដ្តីមនោរម្យ.អាំងហ្វូ សូមនាំប្រិយមិត្តអ្នកតាមដាន ទៅមើលការលក់សំបុត្រឡានក្រុង នៅក្រុងសួងខេត្តកំពង់ចាមម្ដង។ កាលពីឆ្នាំទៅម៉ិញ ឆ្នាំ២០១៣ សំបុត្រឡានក្រុងមុនចូលឆ្នាំត្រឹមតែ ២០០០០រៀល និងក្រោយចូលឆ្នាំខ្មែរ មកលក់ត្រឹមតែ១៨០០០រៀលប៉ុណ្ណោះ ក្នុងមួយសំបុត្រ។ តែក្នុងឆ្នាំ២០១៤នេះ សំបុត្រ​ឡាន​មុនចូលឆ្នាំតម្លៃ២៥០០០រៀល និងក្រោយចូលឆ្នាំខ្មែរតម្លៃជាង៣០០០០រៀល ទៅតាមក្រុមហ៊ុននីមួយៗ​នៅក្នុង​ខេត្ត​នោះ។ នេះបើតាមការបញ្ជាក់របស់អ្នកស្រី សុខខេង ដែលជាអ្នកដំណើរម្នាក់ ដែលត្រូវត្រឡប់ពីស្រុកកំណើត ទៅ​កាន់លំនៅដ្នានឯរាជធានីភ្នំពេញវិញ។

ឆ្លើយទៅនឹងសំនួរដែលសួរថា តើអ្នកស្រីនៅតែត្រូវទៅ ឬយ៉ាងណា បើសំបុត្រអ្នកស្រីគិតថាថ្លៃយ៉ាងនេះ? អ្នកស្រី សុខខេង បាននិយាយយ៉ាងខ្លីដូច្នេះថា «ធ្វើម៉េច ឡានរបស់គេ គេឡើងថ្លៃជាសិទ្ធិរបស់គេ។ យើងគ្មានជំរើសទេ បើមិនជិះនោះ។» តែអ្នកស្រីបានទំលាក់បន្ទុកទទួលខុសត្រូវនេះ ទៅលើរដ្ឋាភិបាល ដែលជាឪពុកម្តាយរាស្រ្ត និង​ជាអ្នកមើលការខុសត្រូវសុខទុក្ខរាស្រ្ត។ អ្នកស្រីបានពន្យល់បន្ថែមដូច្នេះថា៖ «រាស្រ្តប្រៀបបានកូនបង្កើត។ ឯឈ្មួញ ប្រៀបបានអ្នកមកសុំជ្រកតែប៉ុណ្ណោះ។ តើឪពុកម្តាយខុសចិត្ត វាយធ្វើបាបកូនខ្លួនឯង ដើម្បីផ្គាប់ចិត្តអ្នកសុំស្នាក់នៅ​នោះ ឬយ៉ាងណា? ឬមួយអង្គុយមើល អ្នកស្នាក់នៅនោះព្រោះតែមុខមាត់ខ្លួន បណ្តោយឲ្យវាយធ្វើបាបកូនខ្លួនឯង ស្រេចតែនឹងចិត្តទៅ។ (...) ច្របាច់ករកូនឯង ព្រោះតែចង់ផ្គាប់ចិត្តអ្នកដទៃ។»

អ្នកនាំពាក្យសាលារាជធានីភ្នំពេញ លោកឡុង ឌី ម៉ង់ បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ ក្នុងថ្ងៃទី១៧ ខែ​មេសានេះថា ការឡើងថ្លៃសំបុត្ររថយន្តក្រុងនេះ មិនស្ថិតក្រោមការគ្រប់គ្រង របស់សាលារាជធានីភ្នំពេញទេ ជា​បញ្ហារបស់រាជរដ្ឋាភិបាល ឬក្រសួងសេដ្ឋកិច្ច និងហិរញ្ញវត្ថុ។ ដោយលោកបានបញ្ជាក់ដូច្នេះថា៖ «ក្នុងសេដ្ឋកិច្ច​ទីផ្សារ​សេរី ការប្រគួតប្រជែងទីផ្សារសេរី ខ្ញុំគិតថារដ្ឋប្រហែលជាគ្មានលទ្ធភាព ទៅអន្តរាគមន៍ នៅក្នុងការប្រកបអាជីវកម្មរ​បស់គេទេ។»

ក្រុមហ៊ុនសូរិយា មានតំលៃសំបុត្រ៣១០០០រៀល ខណៈដែលក្រុមហ៊ុនកាពីតូល មានតំលៃសំបុត្រ៣០០០០រៀល។ នេះបើគេធ្វើដំណើរចេញពីក្រុងសួង ឆ្ពោះមករាជធានីភ្នំពេញ នៅក្រោយរដូវចូលឆ្នាំខ្មែរឆ្នាំ២០១៤នេះ។ ទស្សនាវដ្តី​មនោរម្យ.អាំងហ្វូ បានសាកសួរអ្នកប្រចាំការលក់សំបុត្រ នូវបញ្ហាសំបុត្ររថយន្តក្រុងឡើងថ្លៃ នៃក្រុមហ៊ុនឡាន​ក្រុង​ធំៗ​ពីរនៅផ្សារសួង នៅថ្ងៃនេះ តែត្រូវបានបដិសេធមិនធ្វើការបកស្រាយអ្វីឡើយ។

តែសម្រាប់ក្រុមហ៊ុនមួយទៀត ដែលមិនសូវមានឈ្មោះល្បីនឹងគេ បានធ្វើការរៀបរាប់ដោយមិនបង្ហាញមុខថា ក្រុមហ៊ុន​របស់លោក មិនចង់ឡើងថ្លៃសំបុត្រទេ ព្រោះខ្លាចអតិថិជនថ្នក់ចិត្ត និងអស់ជំនឿជឿជាក់ អាចនិងឈប់ជិះ​រថយន្តរបស់លោក ដែលជាបញ្ហាប្រឈមក្នុងមុខរបរ។ លោកបានធ្វើការពន្យល់ដូច្នេះថា៖ «បើយើងមិនឡើងថ្លៃតាម យើងមិនអាចឈរជើងនៅទីនេះបានទេ។ (...) វាហាក់ដូចជាគំនាបមួយ ដែលគាបយើងដោយប្រយោល។ ការរក​ស៊ី​ប្រគួតប្រជែងនៅស្រុកខ្មែរ យើងត្រូវតែមើលមុខមើលក្រោយ។ (...) ចូលស្ទឹងតាមបទ ចូលស្រុកតាមប្រទេស។»

ដូចគ្នានឹងការបកស្រាយរបស់អ្នកនាំពាក្យ សាលារាជធានីភ្មំពេញខាងលើដែរ អ្នកនាំពាក្យ​រដ្ឋាភិបាល លោក ផៃ ស៊ីផាន បានលើកឡើងថា ជាសេដ្ឋកិច្ចទីផ្សារសេរី រដ្ឋាភិបាលគ្មានតួនាទី និងភារកិច្ចក្នុងការគ្រប់គ្រងលើបញ្ហា នៃ​ការឡើងថ្លៃសំបុត្រឡាន ឬអ្នក«អាជីវកម្ម»។ លោកបញ្ជាក់យ៉ាងដូច្នេះថា៖ «មកដល់ពេលនេះ យើងមិនទាន់​មាន​គោលការណ៍ ឬច្បាប់ណាដែលគ្របគ្រងតម្លៃនៃអ្នកធ្វើអាជីវកម្មទេ។ យើងទុកឲ្យមានការប្រកួត​ប្រជែងជា​សាធារណៈ៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៧ មេសា ២០១៤