ប្រជាពលរដ្ឋស្ទើរទូទាំង​ឃុំស្រឡប់ ស្រុក​ត្បូងឃ្មុំ​ ខេត្ដត្បូងឃ្មុំ បាន«ខកខាន»មិនបានទទួលទេវតាឆ្នាំថ្មី នៅវេលា​ម៉ោង៨ និង៧នាទី ថ្ងៃទី១៤ ខែមេសា ឆ្នាំ២០១៤ នេះទេ ដោយសារនៅមុនម៉ោងចូលឆ្នាំថ្មីនេះ តែប៉ុន្មាននាទី ស្រាប់​តែ«ភ្លើងអគ្គិសនី»​រលត់​សូន្យ​ឈឹង រហូតដល់ម៉ោង១២ថ្ងៃត្រង់ទើបបាន«ឆេះ»វិញ។

ដង្វាយរៀបរងចាំទទួលទេវតា របស់អ្នករស់នៅក្នុងឃុំស្រឡប់។ (រូបថត MONOROOM.info/ O. Vary)

ចូលឆ្នាំថ្មី ឆ្នាំមមី ព.ស ២៥៥៨ - កំពង់រៀបចំតុបតែង គ្រឿងដង្វាយនានា សម្រាប់ទទួលទេវតាឆ្នាំថ្មី តាំងពីព្រលឹម លោក ឃីម ឌី ជាងកាត់កញ្ចក់ តុទូ ប្រចាំផ្សារខ្នា បានរអ៊ូមិនពេញចិត្ត ចំពោះការ«ផ្តាច់»នូវចរន្ត​អគ្គីសនីនេះ​ឡើយ។ លោកបានលើកឡើងថា «ជាធម្មតាមិនដែលដាច់ទេ។ យូរៗដាច់ម្តងប៉ុណ្ណោះ ហើយក៏មិនដែលដាច់ចំថ្ងៃច័ន្ធ​យ៉ាង​ដូច្នេះដែរ។ ចុះចង្រៃអ្វីថ្ងៃនេះ ដែលជាថ្ងៃចូលឆ្នាំថ្មីផង ក៏មិនលើកលែងឲ្យដែរ។ ក្រោយមិនដាច់ បែរជាមកដាច់មុន​ទេវដាចុះមក យ៉ាងដូច្នេះ។ យ៉ាងហោចណាស់ ចាំទទួលទេវតារួចរាល់សិនមិនបាន។»

អ្នកមីង ខឹង ស្រីតូច ដែលមានលំនៅក្បែគ្នានោះ ក៏កំពុងរៀបចំទទួលទេវដាឆ្នាំថ្មី ដោយស្វាម៉ីអ្នកមីង​បានបំពាក់នូវ​ទួរទស្សន៍ សម្រាប់បញ្ចាំងពីឈុតឆាកទេវតាចុះយ៉ាងយកចិត្តតុកដាក់ និងត្រៀមជាស្រេចនូវ ទៀន ទូប បងប្អូន កូន ចៅ ឈរយ៉ាងត្រៀបត្រា រង់ចាំទស្សនា។ តែផ្ទុយទៅវិញ គោលបំណងនេះ បានរលាយសូន្យឈឹង ព្រោះចរន្ដ​អគ្គិសនី​មិនបានយល់ថា នេះជាថ្ងៃចូលឆ្នាំចូលខែនោះឡើយ។ អ្នកមីងនិយាយថា «ភ្លើងនេះមិនមែនសុខៗរលត់ ឬដាច់​នោះ​ទេ។ (...) វាជាចេតនារបស់អ្នកណាម្នាក់ ដែលធ្វើការពាក់ព័ន្ធនឹងកិច្ចការងារនេះ។»

ឆ្លើយតបទៅនឹងការលើកឡើងរបស់អ្នកមីង តូច ខាងលើនេះ លោក វណ្ណ សុធា ទំនងជាមន្ត្រីរាជការម្នាក់ មកពី​ភ្នំពេញ និងត្រូវជាបងប្អូនគ្រួសារអ្នកមីងតូចនេះ បានលើកឡើងថា «ហ្នឹងហើយលទ្ធផល ដែលយើង"យក​ភ្លើង​គេ"​មកប្រើ។ ភ្លើងជារបស់គេ ថ្វីបើយើងបានបង់លុយ តែបើគេពេញចិត្តភ្លើង ក៏ឆេះល្អទៅ បើគេមិនពេញចិត្តវាក៏​ដូច្នេះ​ឯង។ ត្រូវបន្ទោសអ្នកណា? បន្ទោសថ្នាក់ដឹកនាំ? ឬត្រូវបន្ទោសអ្នកគ្រប់គ្រងភ្លើងនៅទីនេះ?»

គាំទ្រផង ឬប្រឆាំងផង នូវកាលើកឡើងនេះ លោក ជា សុខន ដែលជាអ្នកឃុំស្រឡប់នេះដែរ បានបញ្ជាក់យ៉ាង​ដូច្នេះ​ថា ថ្វីត្បិតតែវាជាភ្លើង ដែលអូសមកពីស្រុកយួន ខុសត្រូវយ៉ាងណា ក៏គ្រាន់បើជាងរស់នៅងងឹតឈឹងនោះដែរ។ លោកបានបន្តថា «បើរង់ចាំភ្លើងរបស់រដ្ឋាភិបាលកម្ពុជានោះ មិនដឹងជាឆ្នាំណាទេ។ បើរដ្ឋាភិបាលមួយនេះ មិនសូវ​បានយកចិត្តទុក្ខដាក់លើបញ្ហានេះផង។ កុំថាឡើយភ្លើងនេះ បើសូម្បីតែ “ទឹក” នៅពេញទន្លេ រដ្ឋាភិបាលមិនបាន​កែឆ្នៃសម្រាប់ផ្គត់ផ្គង ដល់ប្រជាពលរដ្ឋផងនោះ។»

ទោះយ៉ាងណាក៏ដោយ ក៏នៅមានប្រជាពលរដ្ឋមួយភាគតូចទៀត ដែលបានបន្តនូវកម្មវិធីទទួលទេតាឆ្នាំថ្មីនេះ ដោយភាពស្ងៀមស្ងាត់ តាមរយៈម៉ោង ក្នុងទូរស័ព្ទ ឬនាឡិការដៃរបស់ខ្លួន។ ឯមួយភាគធំមិនបានរវីរវល់ឡើយ ព្រោះតែការខកចិត្តនេះ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់លំអិត ពីមន្រ្តីប្រចាំការនៃសាលាឃុំស្រឡប់ ពីបញ្ហាភ្លើង​រលត់​នេះបានទេ ដោយលោកបានឆ្លើយយ៉ាងខ្លីថា៖ «ខ្ញុំមិនបានដឹងពីមូលហេតុនេះទេ។ ខ្ញុំមកប្រចាំការតែ​មួយភ្លែត​ប៉ុណ្ណោះ បន្តិចទៀត ខ្ញុំត្រឡប់ទៅផ្ទះជួបជុំបងប្អូនវិញហើយ។ (...) ភ្លើងនេះ មិនមែនតែលើកទីមួយទេ ដែលរលត់​នោះ វាសឹងតែជាប្រចាំទៅហើយ។ មួយខែយ៉ាងហោចណាស់ក៏បួនដងដែរ។»

ចំឡែកអ្វី  ប្រជាពលរដ្ឋក្នុងឃុំស្រឡប់មិនបានទទួលស្វាគមន៍ទេវតាឆ្នាំថ្មីផង ហើយភ្លើងក៏មិនទាន់​បាន«ឆេះ»​នៅ​ឡើយនោះ ស្រាបតែមានភ្លៀងមួយមេធំ ធ្លាក់មកយ៉ាងគំហុក តាំងពីម៉ោង១២ថ្ងៃត្រង់ រហូតដល់ម៉ោង២រសៀល​ទើបបានរាំង ហើយបានបង្ករឲ្យមានភក់ជ្រាំយ៉ាងច្រើន នៅតាមទីភូមិ និងទីវត្តអារាមនានា៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៤ មេសា ២០១៤