ហ៊ុន សែន ព្រមាន​អ្នក​វិគាគ​ឲ្យ​«ប្រយ័ត្ន​ប្រយែង»

លោកនាយករដ្ឋមន្រ្តីហ៊ុន សែន បានព្រមានជាចំហរដល់អ្នកវិភាគ និងអង្គការសង្គមស៊ីវិល ទាំងឡាយ ឲ្យប្រុងប្រយ័ត្នខ្ពស់ក្នុងការធ្វើ ការអត្ថាធិប្បាយ ឬវិគាគ ខណៈអ្នកវិភាគទាំងនោះ មិនដឹងរឿងច្បាស់ ដែលអាចនាំឲ្យបញ្ហាកាន់តែស្មុគស្មាញ។ ការព្រមានរបស់លោកហ៊ុន សែន គឺបានកើតឡើង បន្ទាប់ពីមានការជួបជជែកគ្នា រវាងលោក និងមេដឹកនាំគណបក្សប្រឆាំង កាលពីពេលថ្មីៗនេះ ជំរុញឲ្យភាគីទាំងសងខាង ជិតឈានដល់ការឯកភាពគ្នា។
Loading...
  • ដោយ: អ៊ុំ បូរី
  • កែប្រែចុងក្រោយ: April 11, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

លោកនាយករដ្ឋមន្រ្តីហ៊ុន សែន បានព្រមានជាចំហរដល់អ្នកវិភាគ និងអង្គការសង្គមស៊ីវិលទាំងឡាយ ឲ្យប្រុង​ប្រយ័ត្នខ្ពស់ក្នុងការធ្វើ ការអត្ថាធិប្បាយ ឬវិគាគ ខណៈអ្នកវិភាគទាំងនោះ មិនដឹងរឿងច្បាស់ ដែលអាចនាំឲ្យបញ្ហា​កាន់តែស្មុគស្មាញ។ ការព្រមានរបស់លោកហ៊ុន សែន គឺបានកើតឡើង បន្ទាប់ពីមានការជួបជជែកគ្នា រវាងលោក និងមេដឹកនាំគណបក្សប្រឆាំង កាលពីពេលថ្មីៗនេះ ជំរុញឲ្យភាគីទាំងសងខាង ជិតឈានដល់ការឯកភាពគ្នា។


លោកនាយករដ្ឋមន្ត្រី ហ៊ុន សែន នៃរដ្ឋាភិបាលកម្ពុជា។

សិទ្ធិ - ទន្ទឹមនឹងសម្តែងការព្រួយបារម្ភថា ការចរចារនយោបាយ រវាងគណបក្សប្រជាជនកម្ពុជា និងគណបក្ស​សង្រ្គោះជាតិ អាចបរាជ័យដោយសារឥរិយាបថរឹងត្អឹង របស់លោកកឹម សុខា អនុប្រធានគណបក្សសង្រ្គោះជាតិ លោកនាយករដ្ឋមន្រ្តីហ៊ុន សែន ក៏បានព្រមានជាទូទៅដល់ក្រុមអង្គការសង្គម និងក្រុមអ្នកវិភាគ គម្បីកុំចេះតែឆ្លើយ និងវិភាគប៉ាតណាប៉ាតណី ឲ្យតែត្រូវបានអ្នកការសែតសម្ភាស ក្នុងពេលដែលខ្លួនឯងមិនបានដឹងសាច់រឿងច្បាស់។

ថ្លែងក្នុងកម្មវិធីចែកសញ្ញាបត្រដល់និស្សិត នៅវិទ្យាស្ថានជាតិអប់រំថ្ងៃទី១០ មេសា លោកហ៊ុន សែន បាន​អត្ថាធិប្បាយ​ថា គ្រប់អ្នកវិភាគ និងអង្គការសង្គមស៊ីវិលទាំងអស់ មិនថាមាននិន្នាការនយោបាយកណ្តាល ឆ្វេង ឬស្តាំ ក៏ដោយ បើ​ដឹងរឿងមិនច្បាស់ ក្បាប់មិនណែន កុំចេះតែវិភាគ ព្រោះការវិភាគកន្លងមក ភាគច្រើនវាមិនត្រូវ ហើយខុសស្រឡះ​ពី​ការពិត ដែលអាចធ្វើគ្រប់បញ្ហានៅក្នុងសង្គម កាន់តែមានភាពស្មុគស្មាញ។

ការថ្លែងរបស់លោក ហ៊ុន សែន ត្រូវបានលោកស្រី ចក់ សុភាព នាយិកាប្រតិបត្តិនៃមជ្ឈមណ្ឌសិទ្ធិមនុស្សកម្ពុជា ពន្យល់ថា កុំថាឡើយក្រុមអង្គការសង្គមស៊ីវិល និងក្រុមអ្នកវិភាគ សូម្បីតែប្រជាពលរដ្ឋធម្មតា ក៏មានសិទ្ធិគ្រប់គ្រាន់​ក្នុងការបញ្ចេញមតិ និងទាមទារសិទ្ធិ ដោយសន្តិវិធី ស្របតាមគោលការណ៍ច្បាប់ស្តីពីសិទ្ធិមនុស្ស និងត្រូវបានធានា​ដោយរដ្ឋធម្មនុញ្ញ ដែលជាច្បាប់គ្រឹះ ខណៈកម្ពុជា ជាប្រទេសកាន់លិទ្ធិប្រជាធិបតេយ្យ។

នាយិកាប្រតិបត្តិនៃមជ្ឈមណ្ឌសិទ្ធិមនុស្សកម្ពុជា រូបនេះបានបញ្ជាក់ប្រាប់ទស្សនាវដ្តីមនោរម្យ.អាំងហ្វូ ថា  ដូច្នេះ​ប្រសិន​បើមានថ្នាក់ដឹកនាំ រដ្ឋាភិបាលគ្រប់គ្រងប្រទេសមួយ ដែលកាន់លិទ្ធិប្រជាធិបតេយ្យ ទៅបំភិតបំភ័យ ឬព្រមាន​ពលរដ្ឋរបស់ខ្លួន និងអង្គការសង្គមស៊ីវិល មិនឲ្យបញ្ចេញមតិ ឬរិះគន់លើការដឹកនាំរបស់ខ្លួន នោះវាបានបង្ហាញ​យ៉ាង​ច្បាស់ថា ប្រទេសនោះ កំពុងដើរលើផ្លូវបញ្រ្ចាសនៃលិទ្ធិប្រជាធិបតេយ្យ។

តែលោកស្រី ចក់ សុភាព បានបន្ថែមថា៖ «ប្រទេសប្រជាធិបតេយ្យ បុគ្គលគ្រប់រូបមានសិទ្ធិបញ្ចេញមតិ តែយើងគួរ​ពិចារណាសម្តីរបស់លោកហ៊ុន សែន ដែលគាត់ សុំកុំឲ្យអ្នកវិភាគហ្នឹងចេះតែលើអង្គហេតុ ឬអំណះអំណាងអ្វី​មួយមិន​ច្បាស់លាស់។ យើងអាចចាត់ទុកថា នេះជាការណែនាំក្នុងន័យវិជ្ជមាន។ (...) យើងអាចគិតថា សារនេះមិនមែន​ជា​ការ​បិទសិទ្ធិសេរីភាពពលរដ្ឋទាំងអស់ ហើយបើគាត់មានន័យញ្ចឹងមិនត្រឹមត្រូវទេ។ ខ្ញុំចង់ឲ្យយល់ថា នេះជា​ការ​ណែនាំ៕»

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១១ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...