ការិយាល័យច្រកចេញចូល ដែលជាយុត្តិសាស្រ្តថ្មីរបស់រដ្ឋាភិបាល បាននឹងកំពុងដំណើរការនៅរាជធានី ខេត្តក្រុង​នីមួយៗ។ តាមរយៈការិយាល័យបំរើសេវាសាធារណៈមួយនេះ រដ្ឋាភិបាលរំពឹងទុកថា និងអាចកាត់បន្ថយ​អំពើពុក​រលួយបាន។

លោក សរ ខេង ថ្លែងនៅថ្ងៃ​ទី០៩ ខែមេសា ឆ្នាំ២០១៤។ (រូបថត MONOROOM.info/ S. Tith)

សេវាសាធារណៈ - ថ្លែងក្នុងពិធី សម្ភោធនិងប្រកាសបើកឱ្យដំណើរការ ការរិយាល័យច្រកចេញចូលតែមួយ នៅថ្ងៃ​ទី០៩ ខែមេសា ឆ្នាំ២០១៤ លោក ស ខេង ឧបនាយករដ្ឋមន្រ្តី និងរដ្ឋមន្ត្រី ក្រសួងមហាផ្ទៃបានអំពាវនាវ​ឱ្យប្រជា​ពលរដ្ឋទាំងអស់ មក​ចូលរួមទទួលយកសេវារដ្ឋបាល តាមប្រភេទសេវាកម្មនីមួយៗ នៅការិយាច្រកចេញចូលតែមួយ និងចូលរួមត្រួតពិនិត្យតាមដាន និងផ្តល់ជាយោបល់ ទៅលើដំណើការនេះការផ្តល់សេវានេះ ដើម្បីរួមចំនែកក្នុង​ការ​ពង្រឹង និងកែលម្អនូវការផ្តល់សេវា​របស់​ការិយាល័យនេះ ដើម្បីអោយមានភាពប្រសើរឡើង និងសុក្រិដ្ឋភាព។

លោកថ្លែងបន្តថា ការបង្កើតអោយមានការិយាល័យច្រកចេញចូលតែមួយនេះ និងបង្កអោយកាន់តែមាន​ភាពងាយ​ស្រួលសំរាប់ជាពលរដ្ឋទូទៅ។ ដោយលោកបញ្ជាក់ថា កាលដែលមិនទាន់មានច្រកចេញចូលតែមួយនេះ នៅពេល​ដែលប្រជាជនគាត់ចង់ស្នើសុំ ធ្វើអ្វីមួយដូចជាសុំធ្វើផ្លាកលេខម៉ូ ឡានយកទៅប្រើប្រាស់ដើម្បីស្របច្បាប់ ឬមួយក៏​សុំ​សាងសង់សំណង់ជាផ្ទះ ផ្ទះសំណាក់ ឬមួយសណ្ឋាគារ គាត់ត្រូវរត់ទៅតាមក្រសួងនានា ស្ថាប័ននានាដែល​ពាក់ព័ន្ធ​ទាំងអស់។ ដូច្នេះទម្រាំតែប្រជាពលរដ្ឋរត់ការហើយ ត្រូវចំណាយថវិកា និងពេលវេលាអស់ច្រើន ប៉ុន្តែនៅពេលដែល​មានការិល័យច្រកចេញចូលតែមួយ នៅពេលដាក់ពាក្យមកគេទទួលបានទាំងអស់ រួចគេរុញបន្តទៅទៀត​ទៅផ្នែក​ផ្សេង​ដែលទទួលខុសត្រូវ ទៅតាមការស្នើសុំនិមួយៗ។

អ្វីដែលកាន់តែពិសេសនោះ ការិល័យមួយនេះនឹងធានាបាននូវតម្លាភាព មិនមានអំពើពុករលួយថែមទៀតផង។ លោក សខេង ពន្យល់យ៉ាងដូច្នេះដែរថា «ចង់មិនចង់គឺវាកាត់បន្ថយនូវភាពអសកម្ម អំពើពុករលួតាមរយៈហ្នឹង អញ្ចឹងហើយ​បានចំនុចនេះ ប្រជាពលរដ្ឋគាត់សប្បាយចិត្ត»។

ជាមួយនឹការអំពាវនាវឱ្យប្រជាពលមកទទួលយកសេវានេះ លោក ស ខេង ក៏ដូចជារដ្ឋាភិបាល បានប្តេជ្ញាផងដែរ ថានឹងធ្វើអោយប្រសិទ្ធិភាព និងពង្រឹងសមត្ថភាពមន្រ្តីថ្នាក់ និងថ្នាក់ក្រោមជាតិដើម្បីឱ្យការអនុវត្តន៍កាន់តែប្រសើរ។ ដោយមន្រ្តីរដ្ឋាភិបាលរូបនេះអះអាងថា៖ «បើយើងធ្វើមិនបានល្អទេនោះ វានឹងជះឥទ្ធិពលដល់ប្រជាពលរដ្ឋ និងជះ​ឥទ្ធិពលទៅដល់ការអភិវឌ្ឍន៍សេដ្ឋកិច្ចសង្គមនៅទូទាំងប្រទេសដែរ ឬក៏ឥទ្ធិពលទៅលើបញ្ហាដទៃៗទៀតជាច្រើន»។

ដើម្បីធានាការអនុវត្តរបស់មន្រ្តីការិយាល័យច្រកចេញចូលតែមួយ ជៀសផុតរាល់ការសូកប៉ាន់ផ្សេងៗ រាល់តារាង​តម្លៃដែលចុងក្រោយនេះក្រសួងសេដ្ឋកិច្ចបានដាក់ចេញប្រភេទនៃសេវានីមួយគឺបិទនៅមុខការិយាល័យ ដើម្បីឲ្យ​ប្រជាពលរដ្ឋងាយស្រួល និងដឹងពីតម្លៃដែលខ្លួនត្រូវចំណាយ។

លោក ស ខេង បានបញ្ជាក់ទៀតថា ក្នុងការបង្កើតឱ្យមានច្រកចេញចូលតែមួយនេះ រដ្ឋាភិបាលបាននឹងកំពុងយក​ចិត្តទុកដាក់ លើអទិភាពជាច្រើនដែរដូចជា៖
ទី១. ការររៀបចំឱ្យមានយន្តការសាធារណៈ ក្នុងការទទួលយកសេវាតាមច្រកចេញចូល តែមួយនៅតាមបណ្តាក្រសួង ស្ថាប័ននានានៅថ្នាក់ជាតិ រដ្ឋបាលថ្នាក់ក្រោមជាតិដើម្បី និងធ្វើឱ្យប្រសិទ្ធិភាពនៃការផ្តល់សេវាសាធារណៈនេះ។
ទី២. ពង្រឹងការអនុវត្តច្បាប់ស្តីរបបហិញ្ញវត្ថុ និងការគ្រប់គ្រងទ្រព្យសម្បត្តិរដ្ឋរបស់ថ្នាក់រដ្ឋបាលថ្នាក់ក្រោមជាតិ និង​ការធនធានពីថ្នាកជាតិទៅថ្នាក់ក្រោមជាតិ។ និង
ទី៣. ការអនុវត្តន៍ធនធានមនុស្ស និងបន្តពង្រឹងតួនាទីរបស់ប្រឹក្សាថ្នាក់ក្រោមជាតិជាដើម៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០៩ មេសា ២០១៤