ជម្លោះរវាង លោក ព្រាប សុវត្តិ តារាចំរៀងដ៏ល្បី ប្រចាំផលិតកម្មហង្សមាស ដែលទទួលបានការគាំទ្រពីទស្សនិក ជាង១៥ឆ្នាំ និងលោក ខេមរៈ សេរីមន្ត តារាចម្រៀងប្រចាំផលិតកម្ម សាន់ដេ ធ្វើអោយមាន​ការចាប់​​អារម្មណ៍​ជាច្រើន ពីសំណាក់អ្នកតាមដានពិភពសិល្បៈ។

ខាងឆ្វេង តារាចម្រៀង ខេមរៈ សេរីមន្ត និងតារាចម្រៀង ព្រាប សុវត្តិ។ (រូបថតហ្វេសប៊ុក)

តារា - តាមពិតទៅ យុវវ័យ និងប្រជាជនជាច្រើន មិនសូវជាចាប់អារម្មណ៍ លើជម្លោះនយោបាយ រវាងគណបក្ស​ជាប់​ឆ្នោត​ទាំងពីរប៉ុន្មានទេ ព្រោះថាគណបក្សទាំងពីរ កំពុងចង់ប្តឹងផ្តល់គ្នាទៅវិញទៅមក និងពិបាករកផ្លូវដោះស្រាយ ហើយវាបានក្លាយជាជាទម្លាប់ដ៏អាក្រក់ដដែលៗ របស់អ្នកនយោបាយ។ តែពួកគេបែរជាចាប់អារម្មណ៍ច្រើនជាង នឹង​ជម្លោះ​រវាង​តារាចម្រៀងប្រុសពីរនាក់ គឺលោក ព្រាប សុវត្តិ និង លោក ខេមរៈ សេរីមន្ត។

ជម្លោះតារាទាំងពីរ កើតចេញពីការរចនាដាក់រូប នៅលើផ្ទាំប៉ាណូផ្សាយពាណិជ្ជកម្ម ដាក់រូបតារាចម្រៀង ខេមរៈ សេរីមន្ត នៅពីលើ និងធំជាងលោក ព្រាប សុវត្តិ នៃការប្រគុំតន្រ្តីរបស់ក្រុមហ៊ុនស្មាត រហូតមានការប្តឹងឱ្យបញ្ឈប់​ភ្លាមៗ ហើយត្រូវបានបណ្តាញព័ត៌មានក្នុងស្រុកជាច្រើន ចាប់អារម្មណ៍ យកមកធ្វើការចុះផ្សាយ។

ទស្សនិកខ្លះបានលើកឡើងថា ការមិនរចនាដាក់រូបលោក ព្រាប សុវត្តិ ឲ្យធំជាងតារាស្រករក្រោយ ឬតូចជាងនោះ ជារឿងខុសឆ្គងមួយ របស់អ្នកគ្រប់គ្រងកម្មវិធី ចំណែកឯលោក ព្រាប សុវត្ថិ អន់ចិត្តថា ម៉េចក៏ដាក់រូបលោកតូចជាង ខេមរៈ សេរីមន្ត ព្រោះខ្លួនល្បីជាង។ ទស្សនិកជនមួយចំនួន ក៏រិះគន់ដែរថា គ្រាន់តែការដាក់រូបធំតួចជាងគ្នា ក៏បង្កជា​ការប្តឹងផ្តល់ដែរ។ ប្រិយមិត្តមួយរូប ដែលចាប់អារម្មណ៍រឿងជម្លោះ រវាងអ្នកទាំងពីរនេះ បានបញ្ចេញមតិដែរថា «ម៉េច​ក៏មិនដាក់រូបអោយប៉ុនគ្នាទៅ តើវាចង្រៃអី? បើ ខេមរះ សិរិមន្ត ជាតួ តើចាំបាច់ហៅ ព្រាប សុវត្ថិ ទៅច្រៀងរកងាប់អី នាំតែមានជម្លោះអត់ប្រយោជន៌?» ។

លោក ព្រាប សុវត្ថិ ជាតារាចម្រៀងកំពូលរបស់កម្ពុជា ដែលឈរតំណែងជួរមុខ ប្រមាណជា១៥ឆ្នាំជាប់ៗគ្នា។ តារា​ចម្រៀងរូបនេះ តែងធ្លាប់ធ្វើជាតំណាងឲ្យកម្ពុជា នៅក្នុងព្រឹត្តិការណ៍នានា ទាំងថ្នាក់ ជាតិ និងអន្តរជាតិ។ រីឯលោក ខេមរៈ សិរីមន្ត វិញ បើទោះបីជាលោក ចូលប្រឡូកក្នុងវិស៏យសិល្បៈក្រោយលោក ព្រាប សុវត្តិ យ៉ាងណាក្តី តែភាព​ល្បីល្បាញរបស់លោក ក៏មិនអន់ជាងលោក ព្រាប សុវត្តិ ប៉ុន្មានដែរ ជាពិសេសភាពល្បីល្បាញ ក្នុងស្រទាប់យុវវ័យ។ កាលពីឆ្នាំកន្លងទៅ តារាទាំងពីរដួងនេះក៏ធ្លាប់ទៅសម្តែងរួមគ្នា នៅប្រទេសថៃផងដែរ។

កាលពីថ្ងៃទី២៩ មីនា ការប្រគំតន្ត្រីដ៏ធំមួយ នៅខេត្តស្ទឹងត្រែងត្រូវបានបិទភ្លាមៗ ដោយសារតែតារាចម្រៀង​លំដាប់​កំពូល លោក ព្រាប សុវត្ថិ បានប្តឹងទៅកាន់ប៉េអឹមខេត្តស្ទឹងត្រែង ដោយសារតែតារាចម្រៀងរូបនេះខឹងសម្បា ទៅ​នឹង​អ្នកគ្រប់គ្រងកម្មវិធី រចនារូបនៅផ្ទាំងផ្សាយពាណិជ្ជកម្មដាក់រូបតារាចម្រៀង ខេមរៈ សេរីមន្ត នៅពីលើ និងធំជាង​ខ្លួន។ ដោយឡែក ក្រុមហ៊ុនស្មាត ក៏មានហេតុផលរបស់គេដែរ ព្រោះ ខេមរៈ សេរីមន្ត ជាអង្គទូតប្រចាំយីហោ (Brand Ambassador) របស់ខ្លួន៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០៨ មេសា ២០១៤