នេះមិនមែនជាលើកទីមួយឡើយ ដែលតុលាការនៃសាលាដំបូងរាជធានីភ្នំពេញ បដិសេធសំណើរសុំនៅក្រៅឃុំរបស់ លោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ បើទោះជាមេធាវីរបស់ព្យាយម លើក​ហេតុផលតាមផ្លូវច្បាប់ជាច្រើនក៏ដោយ។ សូមអានការបកស្រាយរបស់លោកមេធាវី គីម សុជាតិ ពីហេតុផល​ចំនួន​ពីរ របស់ចៅក្រម ដែលបានបដិសេធការសុំនៅក្រៅឃុំ ទាំង«គ្មាន»ហេតុផលច្បាស់លាស់។

លោក វ៉ន ពៅ ប្រធានសមាគមន៍​សេដ្ឋកិច្ចក្រៅប្រព័ន្ធនៅកម្ពុជា នៅក្នុងការតវ៉ារបស់លោក ជាមួយកម្មករ នៅមុខការចាប់ខ្លួន។ (រូបថត ហ្វេសប៊ុក)

ប្រព័ន្ធយុត្តិធម៌ - ក្នុងកិច្ចសម្ភាស ជាមួយទស្សនាវដ្ដីមនោរម្យ.អាំងហ្វូ លោក គីម សុជាតិ មេធាវីការពារក្តីឲ្យ​លោក វន់ ពៅ ប្រធានសមាគម ប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានអោយដឹងថា ការបដិសេធសំណើរសុំ​នៅក្រៅឃុំកូនក្តីនៅថ្ងៃទី០៤ ខែមេសានេះ ដោយតុលាការសំអាងទៅលើហេតុផលពីរ៖

ទី១. ប្រសិនបើដោះលែងលោកវន់ ពៅ នឹងធ្វើអោយលោក វន់ ពៅ អាចទៅបង្កបញ្ហាដល់សណ្តាប់ធ្នាប់​សាធារណៈ។
ទី២. ពាក់ព័ន្ធទៅនឹងការដែលគ្មានឯកសារ បញ្ជាក់ពីប្រធានពន្ធនាគារអះអាងថា វន់ ពៅ មានបញ្ហាសុខភាព។

លោកមេធាវី បានប្រតិកម្មថា តុលាការមិនគួរសម្រចបែបនេះទេ ព្រោះវាគ្មានអ្វីបញ្ជាក់ថាលោកវន់ ពៅ ទៅធ្វើ​អញ្ចឹង​ទេ នេះគ្រាន់តែជាការយល់ឃើញរបស់តុលាការ ហើយក៏គ្មានភស្តុតាងណាមួយបញ្ជាក់ថា លោក វន់ ពៅ ទៅធ្វើ​សកម្មភាព​​បង្ក​បញ្ហា​ ដល់សណ្តាប់ធ្នាប់សាធារណៈដែរ។ រីឯហេតុផលទី២ លោក គីម សុជាតិបានបក​ស្រាយ​ថា៖ «យើងបានលើកឡើងហើយ ដោយយើងបានបង្ហាញភស្តុតាងទៅតុលាការថា មានឯកសារបញ្ជាក់មកពីរ​មន្ទីរពេទ្យ​បំរុងរ៉ាត់ ដែលអះអាងថា វន់ ពៅ ត្រូវទទួលការវះកាត់ អញ្ចឹងត្រូវទៅជួបពេទ្យ»។

ឆ្លងតាមការបកស្រាយ ទៅលើបញ្ហាទាំងពីរនេះ លោកមេធាវី យល់ថា «អញ្ចឹងតុលាការគួតែអនុញ្ញាតអោយ វន់ ពៅ នៅក្រៅឃុំសិន ដើម្បីព្យាលបានរបួស ព្រោះអីបញ្ហាដែលប្រឈម គឺបញ្ហាសុខភាពរបស់គាត់ទេ។ បើថ្ងៃក្រោយ​តុលាការរកឃើញថា វន់ ពៅ មានពិរុទ្ធភាព ឬក៏មានប្រព្រឹត្តបទល្មើសទៅតាមផ្លូវច្បាប់មែន អញ្ចឹងតុលាការចាប់ វន់ ពៅ យកទៅឃុំទៅ វាក៏មិនទាន់ហួសពេលដែរ។»

លោក អង្គ វង្សវឌ្ឍានា រដ្ឋមន្រ្តីក្រសួងយុត្តិធម៌កាលពីថ្ងៃទី២៥ ខែមីនាកន្លងមកក្នុងសន្និសិទថ្នាក់ជាតិមួយ ស្តីពីការ​ឃុំខ្លួនបណ្តោះអាសន្ន និងជម្រើសជំនួសឲ្យការឃុំខ្លួន លោកបានថ្លែងបញ្ជាក់ពី​គោលការណ៍ និងសារាចរណែនាំ​ដូច្នេះថា «ជំរុញចៅក្រមឲ្យមានការទទួលខុសត្រូវខ្ពស់ ក្នុងការសម្រេចឃុំខ្លួនបុគ្គលណាមួយ ដែលជាការធ្វើឲ្យប៉ះ​ពាល់ដល់គោលការណ៍ទូទៅ ដែលមានបញ្ញត្តិក្នុងមានត្រា២០៣ នៃក្រមនីតិព្រហ្មទណ្ឌថា “ជាគោលការណ៍​ជន​ត្រូវ​ចោទ ត្រូវតែមានសេរីភាព”»។

ពាក់ព័ន្ធនឹងសារាចរណ៍ណែនាំនេះ មេធាវីការពារក្តីអោយលោក វន់ ពៅរូបនេះ បានបញ្ជាក់ថា៖ «បញ្ហាហ្នឹងយើងក៏​លើកឡើងដែរ ហើយមិនមែនតែសារាចរណ៍ហ្នឹងទេ យើងក៏បានលើកឡើងដល់សារាចរណ៍មួយទៀត ដែល​សម្រេច​អំពី​ការព្យួរទោស បើករណីតុលាការរកឃើញថា ថ្ងៃ១៨ ក្រោយនេះ វន់ ពៅ មានពិរុទ្ធភាពមែន តុលាការក៏អាច​ព្យួរ​ទោស​បានដែរ ស្របតាមសារាចរណ៍របស់រដ្ឋមន្រ្តីក្រសួងយុត្តិធម៌ដែលបានចេញថ្មីនេះ។ (...) តែតុលាការ​គាត់មិន​ពិចារណាទេ។»៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០៤ មេសា ២០១៤