ចុងក្រោយនេះ យ៉ាងហោចណាស់ក៏មានប្រទេសបីដែរ ដែលបានស្នើដល់ប្រទេសឡាវ គម្បីផ្អាការសាងសង់​ទំនប់​វារីអគ្គីសនីដនសាហុង។ ការផ្អាកមួយរយៈ គឺដើម្បីផ្តល់ឱកាសដល់ប្រទេសទាំងអស់ ដែលជាសមាជិកគណៈ​កម្មា​ធិការអន្តរជាតិ ទន្លេមេគង្គ សិក្សាថា ត្រូវធ្វើយ៉ាងណា សមស្រប ឬមិនសមស្រប ហើយមានផលប៉ះពាល់ ដល់​បរិស្ថាន​កម្រិតណា ដើម្បីធ្វើការសម្រេច។

ទិដ្ឋភាពនៃតំបន់ដនសាហុង ដែលស្ថិតនៅត្រើយមួយចំហៀងពីព្រំដែនកម្ពុជា។ (រូបថត niimuray)

បរិស្ថាន - មិនត្រឹមតែភាគីកម្ពុជាទេ ដែលធ្វើលិខិត សុំឲ្យរដ្ឋាភិបាលឡាវផ្អាកការ សាងសង់ទំនប់វារីអគ្គីសនី​ដនសាហុង នោះ ត្បិតអីភាគីប្រទេសថៃ និងប្រទេសវៀតណាម ក៏បានធ្វើលិខិតសុំផ្អាកការសាងសង់ផងដែរ។ នេះ​ជាការអះអាងរបស់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការ​ជាតិ ទន្លេមេគង្គកម្ពុជា។

ទន្ទឹមនឹងនេះ មន្រ្តីសង្គមស៊ីវិលជាតិ អន្តរជាតិ សកម្មជនផ្នែកបរិស្ថាន ជាបន្តបន្ទាប់ បានសម្តែងការព្រួយបារម្ភ ពី​ផលប៉ះពាល់ជាច្រើន ប្រសិនបើប្រទេសឡាវនៅតែបន្តគម្រោងសាងសង់ទំនប់វារីអគ្គិសនី ដន សាហុង ស្តិតនៅ​ខេត្តចំប៉ាសាក់ មានកម្លាំង២៨០មេកាវ៉ាត ដោយមិនមានការសិក្សា និងការពិគ្រោះយោបល់ ជាមួយភាគីពាក់ព័ន្ធ អោយបានល្អិតល្អន់ ជាមុននោះ។

ថ្លែងប្រាប់ក្រុមអ្នកសារព័ត៌មាន នៅព្រមានយន្តហោះអន្តរជាតិ នៅថ្ងៃទី ០៤ ខែ មេសា ឆ្នាំ ២០១៤ មុនធ្វើដំណើរ ទៅចូលរួមកិច្ចប្រជុំកំពូលលើកទី២ នៃគណៈកម្មាធិការអន្តរជាតិទន្លេមេគង្គ នៅប្រទេសវៀតណាម លោកលឹម គានហោ បានព្រលយឲ្យដឹងថា បើមានការសាង ក៏ត្រូវលើកយកហេតុផល ប៉ះពាល់បរិស្ថាន មកពីគ្រប់ភាគី​ទាំង​អស់ ដើម្បីពិចារណាដាក់ ពិភាក្សាសម្រេច ក្នុងកិច្ចប្រជុំ គណៈកម្មាធិការទន្លេមេគង្គ។

រហូតមកដល់ពេលនេះ បើទោះជារដ្ឋាភិបាលឡាវបានចុះកិច្ចព្រមព្រៀង ជាមួយក្រុមហ៊ុនសាងសង់ ហើយក៏ដោយ ក៏រដ្ឋសភាឡាវមិនទាន់បានអនុម័តលើគម្រោងនោះនៅឡើយ។ ហើយទំនប់វារីអាគ្គីសនីដនសាហុងស្ថិតនៅ​ប្រទេស​ឡាវនេះ ក៏នៅមិនទាន់ដំណើរការសាងសង់នៅឡើយដែរ ដោយរង់ចាំដល់ខែធ្នូ ឆ្នាំ២០១៤។

លោក យុក សេងឡុង ប្រធានគ្រប់គ្រងកម្មវិធី របស់អង្គការសម្ព័ន្ធភាព ដើម្បីអភិរក្សធនធានជលផល បានលើក​ឡើងថា គោលជំហររបស់ប្រទេសកម្ពុជា វៀតណាម និងថៃ ជាការសម្រេចិត្តត្រឹមត្រូវ តែប្រទេសទាំងនោះ​មិន​បាន​បង្ហាញបំណងឲ្យបញ្ឈប់ការសាងសង់ទាំងស្រុង។ លោកយុក សេងឡុង បញ្ជាក់ថា៖ «សម្រាប់យើងជា​សង្គម​ស៊ីវិល គឺចង់ឲ្យបញ្ឈប់តែម្តង។ យ៉ាងណា យើងមិនអាចធ្វើអ្វីបាន ក្រៅពីការទទូចសុំ តែប្រទេសឡាវ គម្បីពិគ្រោះ​យោបល់​ជាមួយគ្នា៕»

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៤ មេសា ២០១៤