«នៅផ្ទះម្តាយទីទៃ នៅព្រៃម្តាយជាមួយ» នេះជាការលើកឡើង របស់ទាហានមួយរូប នៃកងពលលេខ៣០១ ដែល​បានអះអាងថា ខ្លួនបាន​រងនូវការមើលងាយមើលថោក ពីថ្នាក់ដឹកនាំរបស់ខ្លួន។ ជាមួយនឹងការជេរប្រមាថ វាយដុំ និងបង្ខំឲ្យធ្វើការទាំង​ឈឺ នាយទាហានរូបនេះ សូមចិត្តដល់ថ្នាក់ដឹកនាំទាំងអស់កុំឲ្យអនុវត្ត ឬយកគំរូតាមសម័យ​ប៉ុលពត មកអនុវត្តក្នុង​សម័យបច្ចុប្បន្ននេះ។

ការិយាល័យអន្តោរប្រវេសន៍ នៅច្រកកោះកុង តាមព្រំដែនកម្ពុជា-ថៃ។ (រូបថតឯកសារ)

ជីវិតទាហាន - លោក ស៊ឹម សុផល ដែលជាកូនទាហាន និងមាននាទីជាគ្រូពេទ្យ សម្រាប់ព្យាបាល​សមាជិក​ទាហាន​នានាទៀតនោះ បានរងការវាយដំ ជេប្រមាថ នូវពាក្យអសុរស្ស មួយចំនួនពីថ្នាក់លើរបស់ខ្លួន។ ក្នុងនាមទាហាន​ដែល​​គោរពវិន័យ លោកយល់ និងគោរពតាមមិនប្រកែកឡើយ តែស្នើសុំឲ្យថ្នាក់ដឹក​នាំត្រូវ​មានការយោគយល់ ថ្លឹង​ថ្លែង ពីហេតុផល​ដែរ មិនត្រូវបង្ខំឲ្យធ្វើអ្វីមួយ សម្រេចតាមតែចិត្តខ្លួនជាថ្នាក់​លើចង់បាន​នោះទេ។

យុទ្ធជនអាយុ ៣២ឆ្នាំរូបនេះ បានបញ្ជាក់ថា ក្រោយពីបញ្ចប់ការសិក្សាជំនាញពេទ្យ នៃសាលាពេទ្យទាហាន​បានមួយ​ខែ ក៏ត្រូវទៅបំរើការនៅក្នុងខេត្តកាកែវ។ លោកត្រូវបានមេបញ្ជាការរបស់ខ្លួន បញ្ជូនទៅកាន់ជាយដែនកម្ពុជា-ថៃ ដែលមកទល់នឹងថ្ងៃនេះ មានរយៈពេលទើបតែបីខែប៉ុណ្ណោះ ក្នុងនាទីជាគ្រូពេទ្យ និងចុងភៅ។

ក្រោយរៀបការបានជិតមួយឆ្នាំ យុវជនរូបនេះក៏បែកចេញពីភរិយាខ្ឡួន ចូលទៅបំរើទ័ពប្រចាំការ​នៅច្រកព្រំដែន​កម្ពុជា-ថៃ។ ក្នុងការបំពេញតួនាទីរបស់ខ្លួននៅទីនោះ លោកមានការថ្នក់ចិត្តពីលោក ឈុន សិឡា នាយ​មេ​បញ្ជា​ការ​របស់ខ្លួន ព្រោះអតីតកាលខ្លួន និងមេបញ្ជាការរូបនេះ ធ្លាប់ដើរស៊ីផឹកជាមួយគ្នា ជាឯកសណ្ឋាន​ស៊ីវិល​នៅក្នុងខេត្ត​តាកែវ តែមិនដឹងថាមាននាទី ឬធ្វើការអ្វីទាំងអស់គ្នាទេ។

ទើបតែមកដល់ពេលនេះ ធ្វើការជួបមុខគ្នា លោក ឈុន សិឡា ហាក់ដំឡើងឬកជាថ្នាក់លើ និងចេះតែរករឿងនេះ រឿងនោះ មិនចេះចប់។ លោកបន្តថា មិនចំពោះតែលោកម្នាក់ទេ សូម្បីតែកូនទាហាន៣០នាក់ផ្សេងទៀត ក៏ត្រូវបាន​គាត់រករឿង ជេរប្រមាថ និងបង្ខំមនុស្សឲ្យធ្វើការទាំងឈឺ ទាំងជា ចាត់ទុកកូនទាហានទាំងអស់ដូចជាទាសករដាច់ថ្លៃ មិនខុសពីសម័យប៉ុលពតអញ្ចឹងដែរ។ «ទាហានមានបញ្ជាផ្តាច់ការអញ្ចឹង។ តែត្រង់ថាមនុស្សឈឺ ទោះសម័យណា​ក៏ដោយ ក៏គេមិនអាចប្រើមនុស្សឈឺបានដែរ។»

ហេតុការណ៍កើតចេញពី ថ្ងៃមួយដែលលោកកំពុងឈឺ មិនស្រួសខ្លួន និងមិនអាចទៅលីសែងឈើបាននោះ លោក​ត្រូវបាននាយរងវរៈ ៣០១ ព្រំដែនភ្នំប៊ិន លោក ថាច់ ស៊ីថា អាយុប្រមាណជា ៥១ឆ្នាំ  អនុញ្ញាតឲ្យលោកនៅក្នុងជំរុំ ដាំ​បាយ និងមើលថែរអ្នកជំងឺផ្សេងៗទៀត ដោយមិនចាំបាច់ទៅណាទេ។ ដោយឡែកនាយ​មេ​បញ្ជា​ការលោក ឈុន សិឡា អាយុប្រមាណជា២៥ឆ្នាំ មិនបានឯកភាពឲ្យនៅក្នុងបន្ទាយឡើយ ហើយបានបង្ខំថា ត្រូវតែទៅលីឈើពីលើភ្នំ ដើម្បីសាងសង់ស្ពានសម្រាប់កងទ័ពឆ្លងស្ទឹង។ លោក ស៊ឹម សុផល បានរៀបរាប់ទៀតថា លោក ឈុន សិឡា មិន​បានស្តាប់ពីហេតុផលនោះទេ តែបែជាចាត់ទុកការឈឺនេះ ជា«ពុទត្បុត»មួយរបស់កូនទាហាន ចង់គេចវេស​ពី​ការងារ។ មិនត្រឹមតែប៉ុណ្ណោះ មេបញ្ជាការរូបនោះ បានព្រលះលោក មួយកំភ្លៀងថែមទៀត និងបានបោះ​ពាក្យសម្ដី​ថា «ចុះអាមេហ្នឹងធំជាងអញ! អញបញ្ជាឲ្យទៅ (...) ទៅៗឲ្យលឿនទៅ! មិនចាំបាច់ស៊ីបាយ ស៊ីអីទេ។»

មាស សុភា ខ្នងធំ ...

ទស្សនាវដ្តីមនោរម្យ.អាំងហ្វូ នៅមិនអាចសុំការបំភ្លឺ ពីលោក ឈុន សិឡាមេបញ្ជាការកងពលលេខ៣០១ ក៏ដូច​ជា​លោក ថាច់ ស៊ីថា មេបញ្ជាការរងកងពលលេខ៣០១ ចំពោះការចោទប្រកាន់នៃកូនទាហានខាងលើបានទេ។

ទាហ៊ាន អាយុ៣២ឆ្នាំដដែល បានលើកឡើងទៀតថា ហេតុដែលបង្ខំឲ្យសម្រុកលីឈើ មកធ្វើស្ពានឲ្យឆាប់ហើយនេះ ក្នុងបំណងដើម្បីទទួលស្វាគមន៍លោក យឿង សុខុន (ផ្កាយបី) មេបញ្ជាការយោធភូមិភាគទីបី ក្រុងច្បារមន ខេត្ត​កំពង់ស្ពឺ ដែលនឹងមកសម្ភោធក្នុងពេលឆាប់ៗខាងមុខ។ លោក ស៊ឹម សុផល នៅតែចាត់ទុកថា មេបញ្ជាការដែល​នៅ​ជាក្មេងឈាមរាវ មិនសមជាមេបញ្ជាការដឹកនាំកងទ័ពនោះឡើយ ព្រោះគាត់តែងតែធ្វើអ្វីតាមតែចិត្តគាត់ចង់បាន មិនស្តាប់មតិនរណាទាំងអស់។ លោកបង្ហើបថា លោក ឈុន សិឡា មានខ្សែអ្នកធំម្នាក់នៅពីក្រោយ គឺលោក មាស សុភា អគ្គមេបញ្ជាការរងនៃ កងយោធពលខេមរភូមិន្ទ។ «អាងខ្សែរយៈ អាងខ្នងច្រវ៉ាក់ គ្មានបទពិសោធ មិនស្តាប់​ចាស់ទុំ»។

នៅតំបន់ក្បាលឆាយ អឺ៩១ (E91) ខេត្តកោះកុង ចំងាយជាងពីរគីឡូម៉ែត្រ ពីព្រុំដែលកម្ពុជា-ថៃ។ យ៉ាងណាក៏ដោយ កូនទាហាននៃកងពលសេនាតូច លេខ ៣០១រូបនេះ បានសំណូមពរដល់គ្រប់ថ្នាក់ដឹកនាំទាំងអស់ មិនចំពោះ​តែ​ថ្នាក់ដឹកនាំរបស់លោកទេ ឲ្យចេះគោរព ស្រលាញ់គ្នា ចេះអធ្យាស្រ័យគ្នា។ «បើចេះស្រលាញ់គ្នា សត្រូវក៏មិនអាច​បំបែក​យើងបានដែរ យើងស្រលាញ់គ្នាយើងមិនរត់ចោលជួរ ចេះជួយគ្នា នឹងអាចយកជ័យជំនះលើសត្រូវ។ (...)  នៅផ្ទះម្តាយទីទៃ នៅព្រៃម្តាយតែមួយ៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី០២ ខែមេសា ឆ្នាំ២០១៤