សាលាដំបូងរាជធានីភ្នំពេញ នឹងបើកសវនាកាជាថ្មីម្តងទៀត នៅថ្ងៃទី១៨ ខែមេសា ឆ្នាំ២០១៤ ខាងមុខនេះ​សម្រាប់​កម្មករ និងអ្នកការពារសិទ្ធិមនុស្សដែលបានចាប់ខ្លួនកាលពីដើមខែមករា ។

អាគារសាលាដំបូងរាជធានីភ្នំពេញ ក្នុងទីតាំងថ្មី។ (រូបថត ឯកសារ)

ប្រព័ន្ធយុត្តិធម៌ - តាមការបញ្ជាក់របស់លោក សំ សុគង់ មេធាវីការពារក្តីអោយ ជនត្រូវចោទ បានអោយដឹងថា សវនាការចំនួន៣ នឹងត្រូវបើកក្នុងពេលតែមួយនៅព្រឹកថ្ងៃទី១៨មេសា ដើម្បីជំនុំជម្រះជនជាប់ចោទទាំង២៣រូប។ សាលាដំបូងរាជធានីភ្នំពេញ នឹងបើកអង្គជំនុំជម្រះពីរផ្សេងគ្នាសម្រាប់ អ្នកដែលបានចាប់ខ្លួនកាលពីថ្ងៃទី ៣ ខែ​មករា។ សវនាការមួយ សម្រាប់សំណុំរឿង ជា សារ៉ាត់ យន់ សុខជា និង ប៊ូ សារិទ្ធ ខណៈពេលដែលសវនាការ ទី៣ គឺសម្រាប់អ្នកដែលសេសសល់ ១០នាក់ក្នុងចំណោម ២៣នាក់ ដែលត្រូវបានចាប់ខ្លួនកាលពីដើមខែមករា កន្លងមក។

លោក វន់ ពៅ ប្រធានសមាគមឯករាជ្យប្រជាធិបតេយ្យនៃសេដ្ឋកិច្ចក្រៅប្រព័ន្ធ លោក ថេង សាវឿន អ្នកសម្រប​សម្រួល​របស់សម្ព័ន្ធសហគមន៍កសិករកម្ពុជា និងលោក ច័ន្ទ ពុទ្ធិស័ក្ក មេដឹកនាំសហគមន៍បឹងកក់ និងកម្មករ​ប្រាំមួយ​នាក់ផ្សេងទៀតដែលត្រូវបានចាប់ខ្លួន កាលពីថ្ងៃទី២ ខែមករា និងត្រូវបានជំនុំជម្រះនៅសាលាដំបូងរាជធានីភ្នំពេញ វេលាម៉ោង ៨ព្រឹក ថ្ងៃទី១៨ ខែមេសា។

មេធាវីការពារអោយលោក វន់ ពៅ ដដែលបានបញ្ជាក់ថា លោកក៏ដូចជាក្រុមមេធាវីផ្សេងៗ បានត្រៀមខ្លួនរួច​ជា​ស្រេច ក្នុងការចូលរួមស្រាយបំភ្លឺសវនាការនៅថ្ងៃខាងមុខនេះ។ លោកបានប្រាប់ទស្សនាវដ្ដីមនោរម្យ.អាំងហ្វូដឹងថា ដើម្បីធានាថាកូនក្តីរបស់លោកបាននៅក្រៅឃុំ លោកបានត្រៀមសារណា ក៏ដូចជាអំណះអំណាងផ្សេងៗ ដើម្បី​យក​ទៅតស៊ូមតិ និងបង្ហាញទៅក្រុមប្រឹក្សាជំនុំជម្រះ ដើម្បីជាការពិចារណាថាកូនក្តីរបស់លោកទាំងអស់ហ្នឹង មិនមាន​ការប្រព្រឹត្តិដូចការចោទប្រកាន់នោះទេ។

លោក សំ សុគង់ បានពន្យល់យ៉ាងដូច្នេះទៀតថា «ក្នុងនាមយើងជាមេធាវីការពារគាត់ គឺយើងសូមអោយតុលាការ​ដោះលែងហើយ។ តែបើតុលាការមិនដោះលែងទេ ខាងក្រុមមេធាវីនឹងពិភាក្សជាមួយកូនក្តីថា តើគួរតែដាក់​ពាក្យ​បណ្តឹងទៅឧទ្ធរណ៍ចំពោះសេចក្តីសម្រេចរបស់របស់សាលាដំបូងរាជធានីភ្នំពេញឬមួយក៏មិនប្តឹង។ ប៉ុន្តែភាគច្រើន​គិតថាកូនក្តីអាចនឹងប្តឹងឧទ្ធរណ៍ប្រសិនបើគ្មានការដោះលែង។»

សកម្មជនសិទ្ធិមនុស្ស ២នាក់ និងសកម្មជនដីធ្លី១នាក់រួមទាំងកម្មករ២០នាក់ត្រូវបានចាប់ខ្លួនកាលពីដើមខែមករា ឆ្នាំ២០១៤កន្លងទៅ ក្នុងព្រឹត្តិការទាមទារប្រាក់ខែគោល១៦០ដុល្លា។ ជនត្រូវចោទ២នាក់ក្នុងចំណោម ២៣នាក់នោះ គឺ យន់ សុខជា និង ប៊ូ សារិទ្ធ ត្រូវបានដោះលែងឲ្យនៅក្រៅឃុំបណ្តោះអាសន្ន កាលពីថ្ងៃទី៨ ខែកុម្ភៈ។ ថ្ងៃទី១១ ខែកុម្ភៈ អ្នកទាំង ២១នាក់ផ្សេងទៀតត្រូវបានសាលាឧទ្ធរណ៍បដិសេធការដោះលែងឲ្យនៅក្រៅឃុំ បណ្តោះអាសន្ន ហើយនៅតែបន្តឃុំខ្លួនក្នុងមណ្ឌលអប់រំកែប្រែទី ៣។ លោក វន់ ពៅ ត្រូវបានសាលាឧទ្ធរណ៍បដិសេធ​ ការស្នើសុំ​ឲ្យ​នៅក្រៅ ឃុំបណ្តោះអាសន្នរង់ចាំសវនាការជាថ្មីម្តងទៀតនៅថ្ងៃទី២៤ ខែមីនា៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០១ មេសា ២០១៤