បន្ទាប់ពីប្រព័ន្ធរណបរបស់ប្រទេសអូស្ត្រាលី ឆ្លុះរកឃើញវត្ថុចំនួនពីរ កាលពីពាក់ណ្ដាលសប្ដាហ៍កន្លងមកនោះ នៅ រសៀលថ្ងៃសៅរ៍នេះ ប្រទេសចិនបានចូលខ្លួនមកប្រកាសម្ដងវិញថា ប្រព័ន្ធផ្កាយរណបរបស់ខ្លួន ក៏បានថត​ឆ្លុះ​រក​ឃើញវត្ថុផ្សេងទៀត ដែលអណ្ដែតនៅលើផ្ទៃសមុទ្រ ហើយអាចឲ្យគេសន្និដ្ឋានថា វាជាបំណែកនៃយន្ដហោះប៊ូអីង ​របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ បាត់ខ្លួនកាលពីពីរសប្ដាហ៍មុន។

រូបភាពឆ្វេង៖ បានមកពីផ្កាយរណបចិន។ រូបខាងស្ដាំលើ៖ រដ្ឋមន្ត្រីក្រសួងដឹកជញ្ជូនម៉ាឡេស៊ី។ រូបខាងស្ដាំក្រោម៖ យន្ដហោះប៊ូអីង ៧៧៧ របស់ក្រុមហ៊ុន ម៉ាឡេស៊ីអ៊ែឡាញ។

បាត់យន្ដហោះ - ប្រទេសចិនបានផ្សាយនៅថ្ងៃសៅរ៍ទី២២ ខែមីនានេះថា រូបថតដែលឆ្លុះថតដោយ​ប្រព័ន្ធផ្កាយ​រណប​របស់ខ្លួន បានបង្ហាញពីវត្ថុទំហំធំមួយ អណ្ដែតនៅលើមហាសមុទ្រឥណ្ឌា ដែលអាចជាបំណែកនៃ​យន្ដហោះ​ប៊ូអីង បាត់ខ្លួនតាំងពីជាង២សប្ដាហ៍មកហើយ។ ការិយាល័យវិទ្យាសាស្ត្រ បច្ចេកវិទ្យា និងឧស្សាហកម្ម នៃរដ្ឋការចិន បាន​ថ្លែង​ថា រូបថតនេះ ត្រូវបានថតនៅថ្ងៃទី១៨ ខែមីនា បានបង្ហាញពីវត្ថុមួយ មានបណ្ដោយប្រវែងប្រមាណជា ២២,៥​​ម៉ែត្រ និងទទឹងប្រមាណជា ១៣ម៉ែត្រ។

អាជ្ញាធររបស់ប្រទេសម៉ាឡេស៊ី ត្រូវបានជូនដំណឺងរួចហើយ ពីការរកឃើញរបស់ប្រទេសចិន ទាក់ទងនឹង​រូបភាព​ទាំងនេះ។ រដ្ឋមន្ត្រីក្រសួងដឹកជញ្ជូនរបស់ប្រទេសម៉ាឡេស៊ី លោក ហ៊ីសហាមូឌីន ហ៊ូសេន (Hishammuddin Hussein) បានថ្លែងនៅក្នុងសន្និសីទកាសែត ជាលក្ខណៈប្រចាំថ្ងៃថា «គេនឹងបញ្ជូននាវា ទៅធ្វើការត្រួតពីនិត្យពី​បញ្ហា​នេះ»។

សារព័ត៌មានចិនថ្មី បានផ្សាយនៅក្នុងទំព័រព័ត៌មានរបស់ខ្លួនថា វត្ថុថ្មីដែលបានរកឃើញនេះ ស្ថិតនៅកណ្ដាលលំហ​មហាសាគរដ៏ល្វឹងល្វើយ ប្រមាណជា១២០គីឡូម៉ែត្រ ពីវត្ថុចំនួនពីរ ដែលត្រូវបានឆ្លុះឃើញដោយប្រព័ន្ធផ្កាយរណប​របស់ប្រទេសអូស្ត្រាលី។

យុទ្ធនាការរុករក មានទាំងនាវានិងយន្ដហោះ ដើម្បីស្វែងរកវត្ថុដែលថតបាន ដោយប្រព័ន្ធផ្កាយរណបទាំងនេះ ត្រូវ​បានកំណត់ធ្វើនៅលើផ្ទៃក្រឡាសមុទ្រប្រមាណជា ២៦ពាន់ គីឡូម៉ែត្រការ៉េ ស្ថិតនៅចម្ងាយ ២៥០០គីឡូម៉ែត្រ ពី​ទីក្រុង​ភើត (Perth) នៃតំបន់ឆ្នេរខាងលិចរបស់កោះអូស្ត្រាលី។ ប៉ុន្តែការរុករកទាំងនេះ រហូតមកទល់នឹងថ្ងៃនេះ នៅ​មិនទាន់រកឃើញតម្រុយណាមួយ ជាលទ្ធផលនៅឡើយ។

សូមអានអត្ថបទដែលទាក់ទងឡើងវិញ៖

- ផ្កាយ​រណប​អូស្ត្រាលី រក​ឃើញ​«វត្ថុពីរ» ទំនង​ជា​របស់​យន្ដហោះ​បាត់​ខ្លួន
- ហេតុអ្វី​យន្ដហោះ​ប៊ូអីង​បាត់​ខ្លួន ​ហោះ​ទៅ​ធ្លាក់​នៅ​ជិត​កោះ​អូស្ត្រាលី?

បន្ទាប់ពីយន្ដហោះបានបាត់ខ្លួនពីប្រព័ន្ធចាប់រលកអាកាស នៅលើផែនដី នៅយប់ថ្ងៃទី៨ ចូលមកយប់ថ្ងៃទី៩ ខែមីនា​កន្លង ការស្វែងរកយន្ដហោះនៅតែបន្តធ្វើ ហើយអាជ្ញាធរម៉ាឡេស៊ី បានកំណត់ទិសដៅនៃការរុករក មកត្រឹមតែ​ពីរ​ទិសប៉ុណ្ណោះ៖ ពីប្រទេសថៃ ទៅកាន់តំបន់អាស៊ីកណ្ដាល និងពីប្រទេសឥណ្ឌូនេស៊ី ទៅកាន់មហា​សមុទ្រ​ឥណ្ឌា។ អ្នក​ជំនាញជាច្រើន បានបញ្ជាក់ថាទិសដៅទៅកាន់មហាសមុទ្រឥណ្ឌាទំនងជាត្រឹមត្រូវជាង ព្រោះសម្រាប់ទិសដៅ​ទីមួយ​នោះវិញ យន្ដហោះប្រាកដជាត្រូវបាន ប្រព័ន្ធចាប់រលកអាកាសរបស់ប្រទេសចិន និងប្រទេសផ្សេងទៀត ចាប់ដំណើរ​របស់វាបានជាមិនខាន៕

------------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២២ មីនា ២០១៤