ពែកមី៖ ប្រតិកម្មរបស់អង្គការជនពិការ ជាការភ័ន្តច្រលំ
ប្រធានក្រុមកំប្លែងប្រចាំស្ថានីយ៍ទូរទស្សន៍ស៊ីធីអ៊ីន និងជាតារាចម្រៀង នាយ ពែកមី បានថ្លែងបដិសេធ តាមរយៈទស្សនាដ្ដីមនោរម្យ.អាំងហ្វួ ចំពោះការលើកឡើង របស់អគ្គលេខាធិការក្រុមប្រឹក្សាសកម្មភាពជនពិកា លោក ឯម ចាន់មករា ថា ជាការភ័ន្តច្រលំ ព្រោះក្រុមសម្តែងរបស់លោក មិនមានបំណងណាមួយ ប្រមាថមើលងាយជនពិការឡើយ។
លោក ពែកមី នៅក្នុងចម្រៀងមួយរបស់ផលិតកម្មថោន។ (រូបផ្ដិតពីវីដេអូថោន)
កំប្លែង - «សូមជម្រាបបងប្អូន កុំអោយយល់ច្រលំ ខ្ញុំបាទគ្មានបំណងអ្វីនឹងមើលងាយ ឬសើចចំអកទៅលើបងប្អូនជនពិការទេ គឺកន្លងមក យើងខ្ញុំតែងលើករឿងមកសម្តែងលេង លើកទឹកចិត្តអោយជនពិការ ផ្តល់តម្លៃអោយជនពិការច្រើន» នេះជាការបកស្រាយរបស់តារាកំប្លែង លោក ចែម ចាន់ដារ៉ា ហៅនាយ ពែកមី ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ បន្ទាប់ពីមានប្រតិកម្មថា ក្រុមសម្តែងរបស់លោកបានមើលងាយ និងប្រមាថយ៉ាងធ្ងន់ធ្ងរដល់ជនពិការ រហូតដល់ស្នើអោយមានការសុំទោសជាសាធារណៈ។
កាលពីថ្ងៃទី២០ ខែមិនា អគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា បានសម្តែងនូវការសោកស្តាយ តាមបណ្តាញសង្គមហ្វេសប៊ុករបស់លោកថា លោកពិតជាមានការសោកស្តាយ ជាខ្លាំងចំពោះក្រុមកំប្លែងរបស់លោក ពាក់មី សម្តែងរឿង «គ្រូជួយ មិនជួយគ្រូវិញ» ដែលសាច់រឿងនេះ បានសម្តែងអំពីការត្រាប់ជាជនពិការប្រភេទCP ហើយយកទៅព្យាបាលដោយប្រើធូប/ដំបង វាយទៅលើតួអង្គដែលជាជនពិការ និងបានប្រើពាក្យចំអកមួយចំនួន ប៉ះពាល់ដល់ជនពិការជើង ដែលប្រើជើងរណបសប្បនិម្មិត។
អគ្គលេខាធិការក្រុមប្រឹក្សាសកម្មភាពជនពិការរូបនេះ បានសរសេរបន្តថា «ទង្វើនេះ គឺបានប៉ះពាល់ជាខ្លាំងទៅលើជនពិការ ពិសេសប្រឆាំងនឹងមាត្រា២ នៃច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ដែលបានចែងអំពី ការទប់ស្កាត់ កាត់បន្ថយ និងលុបបំបាត់ ការរើសអើងចំពោះជនពិការ រួមនឹងអនុសញ្ញាស្តីពីសិទ្ធិជនពិការ ក្នុងការការពារ ការមាក់ងាយ ការរើសអើងលើជនពិការ ដែលច្បាប់នេះក៏បានចូលជាធរមាន»។
ជាការបកស្រាយនូវការលើកឡើងរបស់ អគ្គលេខាធិការក្រុមប្រឹក្សាសកម្មភាពជនពិកាខាងលើ តារាកំប្លែងប្រចាំស្ថានីយ៍ទូរទស្សន៍ស៊ីធីអ៊ិន និងជាតារាចម្រៀងរបស់ផលិតកម្មថោន បានពន្យល់ថា វាគ្រាន់តែជាការភ័ន្តច្រលំនោះទេ តាមពិតឈុតហ្នឹង ពែកមី ជាគ្រូចូលរូប គ្រូអារក្ស រីឯនាយតាក់ស៊ីហ្នឹង គឺខ្មោចចូលមានអាការៈប្រកាច់ ហើយយកមកអោយ ពែកមី មើល ពែកមី ក៏ព្យាបាលដោយប្រើធូបវាយ អញ្ចឹងតាក់ស៊ីមិនមែនជាជនពិការទេ។
សំណេរក្នុងទំព័រហ្វេសប៊ុករបស់លោក ឯម ច័ន្ទមករា ដដែលបានបញ្ជាក់ថា «បើការសម្តែងនេះ ពិតជាទង្វើអចេតនារបស់ក្រុមកំប្លែងលោក ពែកមី លោកត្រូវធ្វើការសុំទោសជាសាធារណៈ ចំពោះករណីខាងលើនេះ»។ ចំពោះបញ្ហានេះ លោកចែម ចាន់ដារ៉ា ហៅ«ពែកមី» បានបន្តថា «វាអត់មានកំហុសអីធ្ងន់ ព្រោះខ្ញុំអាត់បានមានបំណងអញ្ចឹងផង។ តែបើខ្ញុំខុស ខ្ញុំនឹងចេញមុខជាសារធាណៈធំដុំ ប៉ុន្តែនេះវាជាការយល់ច្រលំ ហើយអត់មានអ្វីធំដុំផង។»។
តារាកំប្លែងរូបនេះ ធ្លោយសម្តីបញ្ចើចបញ្ចើបែបកំប្លែងថា «ប៉ុន្តែកន្លងមក ខ្ញុំបានលេងរឿងច្រើនទាក់ទងនឹងការសរសើរ ការលើកទឹកចិត្តជនពិការ ការជួញដូរស្រ្តី ការជួញដូរកុមារ ទាក់ទងនឹងការអប់រំផ្សេងៗ តែអត់ដែលមានខាងអង្គការណា សសើរពាក់មីសោះ។ រាប់សិបរឿងហើយ អត់ដែលមានខាងចេញលិខិតសរសើរ អង្គុយចាំមើលតែរៀងទំនង រៀងខុស រិះគន់តែម្តង។»
សូមរំលឹកដែរថា កាលពីថ្ងៃទី២០ ខែមីនាកន្លងមក អង្គការជនពិការកម្ពុជា (អពក) បានចេញសេចក្តីប្រកាសមួយរបស់ខ្លួន សម្តែងការមិនសប្បាយចិត្តរ ចំពោះការសម្តែងអាយ៉ៃឆ្លើយឆ្លងរបស់លោក ព្រហ្ម ម៉ាញ ក្នុងឈុតមួយចាក់ផ្សាយ ជាស្ពតពាណិជ្ជកម្មរបស់ផលិតកម្មហង្សមាស លើកញ្ចក់ទូរទស្សន៍ហង្សមាស ដែលនិយាយយកត្រាប់តាមអ្នកនិយាយមិនច្បាស់។ អង្គការនេះ បានស្នើឲ្យទូរទស្សន៍ដកឈុតនេះចេញវិញ និង ស្នើមិនឲ្យប្រព័ន្ធផ្សព្វផ្សាយនានា ចាក់ផ្សាយនូវសកម្មភាពអ្វី ដែលប៉ះពាល់ដល់អារម្មណ៍ជនពិការ៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ២១ មិនា ២០១៤