វិបត្តិដីធ្លី - លោក ធន សារ៉ាយ ប្រធានសមាគមការពារសិទ្ធិមនុស្សអាដហុក បានថ្លែងនៅក្នុងសន្និសិទ្ធសារព័ត៌មាន ដែលមាន​ប្រជាតំណាងប្រជាពលរដ្ឋរងគ្រោះមកពីខេត្តចំនួន៦បានចូលរួមនោះ បានថ្លែងឲ្យដឹងថា ការផ្តើមបើក​យុទ្ធនាការ​ទទួលពាក្យបណ្តឹងពីប្រជាពលរដ្ឋទូទាំងប្រទេស ដើម្បីជំរុញឲ្យតុលាការសើរើរឿងបណ្តឹងដីធ្លីចាស់ៗ ដែល​ជាប់​គាំង​យូរឆ្នាំមកហើយ ពុំទាន់មានដំណោះស្រាយ ហើយនៅថ្ងៃដំបូងមានប្រជាពលរដ្ឋចំនួន១៧ខេត្ត ដែល​មានជម្លោះដីធ្លី បានដាក់ពាក្យបណ្តឹងចំនួន ១០៥ ស្មើរនិង១០៥ករណី ក្នុងនោះទៅស្នាក់ការសូរិយោដីថ្នាក់​ស្រុក​ចំនួន ១៥ ពាក្យ​បណ្តឹង ហើយនៅក្នុងសូរិយោដីថ្នាក់ខេត្តចំនួន៣ ពាក្យបណ្តឹងនិងទៅអភិបាលខេត្ត​ចំនួន៧៧ពាក្យ​បណ្តឹង និងទៅ​តុលាការចំនួន១០ពាក្យបណ្តឹង ដែលមានប្រជាពលរដ្ឋរងគ្រោះ ១១០០១គ្រួសារ ដែលបានប៉ះពាល់​ដីធ្លី​ចំនួន​២៦៥១៨ ហិកតា។

លោកបានថ្លែងថា ចំនួននេះពុំមែនជាជំនួនសរុបនោះទេ គឺគ្រាន់តែចំនួនមួយប៉ុណ្ណោះ ពុំមែនជាចំនួនសរុប​ទាំងមូល​ដែលមាននោះទេ ហើយពាក្យបណ្តឹងដែលបានដាក់ថ្ងៃនេះ គឺជាពាក្យបណ្តឹងចាស់យូរណាស់មកហើយ ដែល​រឿង​ខ្លះមានរហូតដល់១០ ឆ្នាំមកហើយ ពុំទាន់បានដោះស្រាយ។ លោកបានថ្លែងឲ្យដឹងទៀតថា៖ «នេះគឺជាការំលឺក​ឡើង​វិញដល់ស្ថាប័នមានសមត្ថកិច្ច ដែលបានអូសបន្លាយនៃការដោះស្រាយបញ្ហានេះ ហើយក៏ជាការធ្វើឲ្យខ្ទរខ្ទារ​ដល់​ថ្នាក់ជាតិដែរ ពីព្រោះថារដ្ឋាភិបាលអាណត្តិថ្មីនេះ បានបង្កើតនៅគណកម្មាធិការក្រុមការងារ​ពិសេសសម្រាប់​កែ​ទម្រង់​ដីធ្លី ហើយលោកបានប្រកាសថាកំណែទម្រង់ស៊ីជម្រៅ ដូច្នេះយើងក៏បានធ្វើការងារនេះ ដើម្បីអំពាវនាវដល់​រដ្ឋាភិបាល ឲ្យធ្វើការឲ្យបានត្រឹមត្រូវឡើងវិញ ដើម្បីដោះស្រាយទុក្ខលំបាកប្រជាពលរដ្ឋ ដែលបានរងនូវការឈឺចាប់​យូរឆ្នាំណាស់មកហើយ»។

«...តែទីបំផុតខ្ញុំរកតែដី១ដុំចិញ្ចឹមកូន មិនបាន»

ថ្លែងទាំងទឹកភ្នែកនិងអួលដើមក លោក ភួង សូរិយា តំណាងប្រជាពលរដ្ឋចំនួន ៤៧៤ គ្រួសារ មកពីឃុំស្រែណូយ ស្រុកវ៉ារិន ខេត្តសៀមរាបដែលមានទំនាស់ដីធ្លីជាមួយទាហាន បានថ្លែងឲ្យដឹងថា នៅក្នុងជម្លោះដីធ្លីនោះ អាជ្ញាធរ​ពុំបានរកដំណោះស្រាយជូនពួកលោកនោះទេ បើទោះបីជាខាងទាហានបានបាញ់ និងគំរាមសម្លាប់​គ្រួសារលោក​មួយពូជក៏ដោយ ហើយក៏បានប្តឹងមកដល់ខន្ទកាល័យលោកនាយករដ្ឋមន្ត្រីជាច្រើនលើក តែពុំដែលទទួល​បាន​លទ្ធផល​នោះទេ។ លោកបានពោលដោយអួលដើមកថា៖ «ខ្ញុំឈឺចាប់ណាស់ ខ្ញុំយកជីវិតរបស់ខ្ញុំទៅបំរើជាតិ ដោយ​ធ្វើ​ជា​ទាហាន៣៤ឆ្នាំ តែទីបំផុតខ្ញុំរកតែដី១ដុំចិញ្ចឹមកូន មិនបាន»។

លោកបានថ្លែងឲ្យដឹងទៀតថា អាជ្ញាធរគេចុះមកដោះស្រាយដីឲ្យ តែគេពុំបានដោះស្រាយឲ្យពលរដ្ឋ​ដែលរង​គ្រោះ​ពិតប្រាកដនោះទេ គឺគេដោះស្រាយឲ្យតែបក្សពួករបស់គេដែលទើបតែទិញដីមកនៅថ្មីប៉ុណ្ណោះ។ ចំណែក​ពលរដ្ឋ​រងគ្រោះពិតប្រាកដ គេចោទថាជាអ្នកបោះបោរ។ លោកបានបញ្ជាក់ដូច្នេះទៀតថា៖ «ខ្ញុំសូមអំពាវនាវឲ្យសម្តេច​នាយករដ្ឋមន្ត្រី មេត្តាណែនាំកងទ័ពឲ្យបានល្អ កុំប្រើសិទ្ធិជ្រុលហួសហេតុទៅបំពានពលរដ្ឋ»។

រវាងរដ្ឋាភិបាល និងតុលាការ ...

លោក ផៃ ស៊ីផាន អ្នកនាំពាក្យទីស្តី ការគណៈរដ្ឋមន្ត្រីបានថ្លែងឲ្យដឹងថា តាមពិតនោះរដ្ឋាភិបាលបានព្យាយាម ដោះស្រាយច្រើនមកហើយនៅរយៈពេលកន្លងមក តាមរយៈគោលនយោបាយចាស់សកម្មភាពថ្មីលើវិស័យដីធ្លី ប៉ុន្តែធ្វើតាមជំហាន ប្រសិនបើពលរដ្ឋទាំងនោះ គាត់ពុំអាចរងចាំបាន គាត់អាចប្រើសិទ្ធិជាពលរដ្ឋរបស់ពួកគាត់ ដើម្បីដាក់ពាក្យបណ្តឹងទៅស្ថាប័នតុលាការ។ លោកបានពន្យល់បន្ថែមទៀតថា ៖ «បើស្ថាប័នណាមិនដោះស្រាយ ពលរដ្ឋអាចដាក់ពាក្យបណ្តឹងនោះទៅតុលាការ។ ខ្ញុំជឿថា តុលាការនឹងដោះស្រាយ ហើយនឹងអាចរកឃើញថា​អ្នកណាខុសអ្នកណាត្រូវ»។

បើយោងទៅតាមរបាយការណ៍បូកសរុបការងារកសិកម្ម រុក្ខាប្រមាញ់ និងនេសាទ ប្រចាំឆ្នាំ ២០១២-២០១៣ និង​ទិសដៅឆ្នាំ២០១៣-២០១៤ បង្ហាញឲ្យដឹងថា មកទល់ពេលនេះរដ្ឋាភិបាលកម្ពុជា បានផ្តល់គោលការណ៍វិនិយោគ ជូនក្រុមហ៊ុនសម្បទានសេដ្ឋកិច្ច និងបានចុះកិច្ចសន្យាជាមួយ ក្រសួងកសិកម្ម រុក្ខាប្រមាញ់ និងនេសាទ សរុបចំនួន ១២១ ក្រុមហ៊ុន លើផ្ទៃដីកិច្ចសន្យាសរុបចំនួន ១.២៣០.៣៦៤ ហិកតា ស្ថិតនៅក្នុងខេត្តចំនួន១៧ ដែលនៅក្នុងនោះ ក្រុមហ៊ុនមកពីបរទេសសរុបចំនួន ៨២ ក្រុមហ៊ុន លើផ្ទៃដីសរុបចំនួន ៦២០.៩៨៧ ហិកតា៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី១៩ មីនា ២០១៤