«ទ្រង់រណឬទ្ធិ គ្មានសមត្ថភាពក្នុងការបង្រួបបង្រួម ឬការដឹកនាំនោះទេ។ លោកចេះតែទំលាក់កំហុសលើអ្នកនេះ លើ​អ្នកនោះ មិនចេះទទួលស្គាល់កំហុសខ្លួនឯង ដែលគ្មានលទ្ធភាពក្នុងការដឹកនាំ។ គណបក្សថ្មីរបស់ទ្រង់(វា) គ្មានន័យ​នោះទេ (...) មានតែការរិះគន់ច្រើន សឹងតែរកអ្នកគាំទ្រម្នាក់គ្មាន»។ នេះជា​ការលើកឡើងរបស់លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច អតីតដៃគូរសត្រូវនយោបាយរបស់ ព្រះអង្គ​ម្ចាស់ នរោត្ដម រណឬទ្ធិ។

ព្រះអង្គម្ចាស់ នរោត្តម រណឬទ្ធិ ថ្លែងទៅអ្នកសារព័ត៌មាន នាថ្ងៃទី១៦ ខែមីនា​ ឆ្នាំ២០១៤។ (រូបថត MONOROOM.info/ Channita)

នយោបាយកម្ពុជា - ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ នាល្ងាចថ្ងៃទី១៨ ខែមីនានេះ លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បានបដិសេធថា លោកមិនដែលមានចេតនាណាមួយ ទំលាក់​ព្រះអង្គ​ចេញពីតំណែងនោះទេ ព្រោះលោកគ្មានបំណងធ្វើជាប្រធានហ្វុនស៊ីនប៉ិច។ លោកបន្តរថាព្រះអង្គ ជាអ្នកចាកចេញ​ដោយអង្គឯងដើម្បីបង្កើតគណបក្សថ្មី ព្រោះតែមិនសព្វព្រះទ័យនឹងការសម្រេចរបស់សមាជ ដែលលើកទ្រង់​ឲ្យធ្វើ​ជា​ «អគ្គមគ្គុទេសប្រវត្តិសាស្រ្ត គណបក្សហ្វុនស៊ីនប៉ិច»។

លោក ញឹក ប៊ុនឆៃ បានថ្លែងថា «ជាសេចក្តីសម្រេចរបស់សមាជ ក្នុងការលើកទ្រង់អគ្គមគ្គុទេសប្រវត្តិសាស្រ្ត​ របស់​គណបក្សហ្វុនស៊ីនប៉ិច និងគ្រាន់តែមានការកែទម្រង់កិច្ចការផ្ទៃ របៀបរបការដឹកនាំ រដ្ឋបាលមួយចំនួនប៉ុណ្ណោះ មិន​មានអ្នកណាដេញលោកទេ។ ព្រះអង្គក៏សម្រេច (ទៅ) បង្កើតគណបក្សនរោត្តមរណឬទ្ធិ។»

ការថ្លែងខាងលើ របស់ដៃគូរសត្រូវនយោបាយរបស់ ព្រះអង្គម្ចាស់នរោត្តម រណឬទ្ធិ អាចជាការឆ្លើយតបទៅនឹង​ការ​ចោទរបស់ព្រះអង្កម្ចាស់អង្គនេះ ក្នុងវេទិការសំណេះសំណាល​មួយ នាសណ្ឋាគារ​​សាន់វេ កាលពីព្រឹកថ្ងៃទី១៦ ខែមីនា ឆ្នាំ២០១៤ ដោយមានបន្ទូលថា ព្រោះតែមានរដ្ឋប្រហារបស់លោក ញឹក ប៊ុនឆៃ ក្នុងឆ្នាំ២០០៦ បានបណ្តាលឲ្យមាន​ការបាត់បង់ ការបែក​បាក់​អ្នករាជានិយម ឬនាំឲ្យអ្នក​រាជានិយម​ចុះខ្សោយ​ជាបន្តបន្ទាប់។

នៅពេលនោះ ព្រះអង្គម្ចាស់ អតីត«ព្រះ»ប្រធានគណបក្សហ្វុនស៊ីនប៉ិច រាជបុត្រនៃអង្គព្រះបរមសព បានបញ្ជាក់​បន្ថែមថា បញ្ហាសំខាន់​ក្នុងរឿងនេះ ព្រោះតែព្រះអង្គផ្ទាល់យល់ថា ប្រទេសជាតិ (កម្ពុជា) ត្រូវមានរបប​រាជានិយម​មួយ ដែលប្រមូលផ្តុំទៅដោយអ្នករាជានិយម សីហនិយម អ្នកសេរីនិយមក្នុងក្របខណ្ឌគណបក្សថ្មីរបស់ព្រះអង្គ។ ហើយ​ជាមួយគ្នានេះ ក៏មានតែព្រះអង្គតែមួយអង្គគត់ ដែលអាច​ធ្វើការប្រមែប្រមូលអ្នករាជានិយម ដែលបានបែក​បាក់​ទៅ​ទាំងអស់នោះបាន។

តែលោក ញឹក ប៊ុនឆៃ បានលើកឡើងបញ្ច្រាសមកវិញថា ព្រះអង្គដឹកនាំមានតែការ«បែកបាក់»។ អគ្គលេខាធិការ គណបក្សហ៊្វុនស៊ិនប៉ិចរូបនេះ បានលើកជាឧទាហរណ៍ថា ក្រោយការឈ្នះឆ្នោតឆ្នាំ១៩៩៣ ក្រោមការដឹកនាំ​របស់​ទ្រង់បានធ្វើឲ្យលោក សម រង្សី ចាកចេញពីគណបក្ស។ ដល់ឆ្នំ ១៩៩៧ ក្រោមការដឹកនាំរបស់ព្រះរាជបុត្រដដែលនេះ ហ្វុនស៊ីនប៉ុច បានបែក​ជាប្រាំពីរជម្រៀក។ ក្រោយមកទៀតលោក កឹម សុខា ក៏បន្តចេញពីហ្វុនស៊ីនប៉ិចទៀត។ តាម​ករណីនេះ លោកបានសង្ខេបបានយ៉ាងនេះថា «ហ្នឹងធ្វើឲ្យចុះខ្សោយ។ បានន័យថា លោក (ទ្រង់រណឬទ្ធិ) គ្មាន​សមត្ថភាពក្នុងការបង្រួបបង្រួម ការដឹកនាំទេ។ ហើយចេះតែទំលាក់កំហុសលើអ្នកនេះ លើអ្នកនោះ មិនចេះទទួល​ស្គាល់កំហុសខ្លួនឯង ដែលគ្មានលទ្ធភាពក្នុងការដឹកនាំ។»

ទ្រង់ (រណឬទ្ធិ) មានព្រះបន្ទូលបន្តរថា តាមការប្រមើលមើលរបស់ព្រះអង្គ ក្នុងបច្ចុប្បន្នភាពនិងទៅអនាគត ឃើញ​ថា​ការប្រមូលផ្តុំអ្នករាជានិយម មិនអាចពឹងផ្អែកលើលោក ញឹក ប៊ុនឆៃ និងព្រះអង្គម្ចាស់ក្សត្រី នរោត្ដម អរុណរស្មី បាន​ទេ ព្រោះ​គ្មាន​លទ្ធភាព នឹងទៅប្រមែរប្រមូលអ្នករាជានិយមទាំងអស់នោះ ឲ្យក្លាយជាកម្លាំងជាតិពិតប្រាកដ ដើម្បី​ដោះស្រាយ​ញ្ហាជាតិឡើយ។ លើកឡើងដោយមោទនភាព ព្រះអង្គមានព្រះបន្ទូលយ៉ាងមុតមាំដូច្នេះថា «មានតែខ្ញុំទេ ដែលមានលទ្ធភាព អាចប្រមែប្រមូល (អ្នករាជានិយម) បាន»។

លោកញឹក ប៊ុន ឆៃ បានចាត់ទុកថា គណបក្សថ្មីរបស់ទ្រង់រណ ឬទ្ធិថា គ្មានន័យនោះទេ ព្រោះបើមើលតាមប្រព័ន្ធ​ផ្សព្វផ្សាយសង្គម ឃើញមានតែការរិះគន់ គ្មានអ្នកណាម្នាក់សសើព្រះអង្គថា ជាអ្នកបង្រួបបង្រួមអ្នករាជជានិយម អាចនឹងដោះស្រាយបញ្ហាប្រទេសជាតិជាហូហែរនោះទេ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៨ មីនា ២០១៤