ធម្មជាតិចម្លែក - ជាការប្រួលប្រែរូបរាង ដ៏កម្រ។ នៅថ្ងៃទី១២ ខែមីនាកន្លងមកនេះ នៅផ្នែកខាងជើងនៃ​ប្រទេស​ឥណ្ឌា អ្នកម្ដាយ​វ័យក្មេងអាយុ២៨ឆ្នាំ មួយរូប បានផ្ដល់កំណើតមកលើភពផែនដីយើងនេះ នូវទារិកាចំនួនពីរនាក់ តែមានរូបរាងដ៏ចម្លែក​ប្លែកពី​ទារកផងទាំងពួង។ នោះគឺទារិកាទាំងពីរមានក្បាលពីរប្រាកដហើយ តែក្បាល​ទាំងពីរ​នោះ ដុះពីលើដងខ្លួនតែមួយ។ គេហទំព័រ ដេល្លីមែល (Daily Mail) បានផ្សាយអះអាងថា ថ្វីត្បិតតែទារិកាទាំងពីរ​មានខ្លួនតែមួយ តែមានឆ្អឹងខ្នងព្រែកបែកជាពីរ។

«ឪពុកម្ដាយរបស់ទារិកា មិនដឹងថាត្រូវធ្វើយ៉ាងម៉េចនោះទេ។ តែយើងនឹងរិះរកគ្រប់មធ្យោបាយ ដើម្បីជួយគ្រួសារ​នេះឲ្យបាន​ប្រសើរតាមតែអាចធ្វើទៅបាន។» នេះការប្រកាសរបស់ វេជ្ជបណ្ឌិត ស៊ីកហា ម៉ាលីក (Shikha Malik) ជំនាញខាងរោគស្ត្រី។ សម្រាប់​ក្រុមគ្រូពេទ្យ ក្ដីសង្ឃឹមនៃការរស់រានមានជីវិតរបស់ទារិកា មានសភាពស្ដួចស្ដើង​ជា​ទីបំផុត ព្រោះជំនួយក្នុងការដកដង្ហើម ត្រូវបានធ្វើរួចទៅហើយ ដល់ទារកទាំងពីរ។

ការថតឆ្លុះ នៅពេលមានគភ៌បានធ្វើឡើងយឺតពេលទៅហើយ ...

បម្រែបម្រួលរូបរាងនេះ ត្រូវបានគ្រូពេទ្យចាត់វិធានការជួយសង្គ្រោះយឺតពេលទៅហើយ ដោយសារតែពីរនាក់ប្ដី​ប្រពន្ធនេះ មិន​មានលទ្ធភាពក្នុងការចំណាយប្រាក ដើម្បីថតឆ្លុះនៅក្នុងអំឡុងពេលមានផ្ទៃពោះ ដែលគេគួរតែធ្វើ​នៅពេលចាប់ផ្ដើម​មានគភ៌​ដំបូង។ លោកវេជ្ជបណ្ឌិតបានពន្យល់ថា «នៅពេលដែលអ្នកស្រី សាម៉ា បានធ្វើការថត​ឆ្លុះជាលើកទីមួយ គឺជាពេលដែលយើង​បានដឹងថា អ្នកស្រីមានកូនភ្លោះដែលជាប់អវៈយវៈគ្នា។ គភ៌មានសភាពធំ​ធាត់ដល់ដំណាក់កាល ដែលពេទ្យជួយអ្វីលែងកើត​ទៅហើយ។»

នៅក្នុងពេលនេះ អ្វីដែលគេអាចធ្វើបាននៅពេលនេះ សម្រាប់ក្រុមគ្រូពេទ្យគឺធ្វើយ៉ាងណា ដើម្បីឲ្យកូនភ្លោះដ៏​កំសត់ទាំងពីរ អាច​នៅរស់រានមានជីវិតតទៅមុខទៀត។ ក្រុមគ្រូពេទ្យនៅមិនទាន់គម្រោង​នឹងវះកាត់ទារិកាទាំង​ពីរ​នៅឡើយ ដោយហេតុថា​នាងតូច​ទាំងពីរ រស់នៅលើដងខ្លួនតែមួយបែបនេះ៕