អនុប្រធានគណបក្សសង្រ្គោះជាតិ លោក កឹម សុខា បានអះអាងថាគណៈកម្មាធិការជាតិរៀបចំការបោះឆ្នោត គ.ជ.ប ជាមូលហេតុចម្បង នាំឲ្យមានភាពជាប់គាំងនយោបាយក្រោយការបោះឆ្នោត ហើយចាំចាច់ត្រូវតែ​ដោះស្រាយ​បញ្ហា​នេះឲ្យបាន។

លោក កឹម សុខា (ខាងឆ្វេង) និងលោក សម រង្ស៊ី មេដឹកនាំគណបក្សសង្គ្រោះជាតិ។ (រូបថត MONOROOM.infO/ O. Vary)

នយោបាយកម្ពុជា - ក្នុងកិច្ចសម្ភាសជាមួយវិទ្យុអាស៊ីសេរី យប់ថ្ងៃទី១៤ ខែមីនា អនុប្រធាន​គណបក្សសង្រ្គោះជាតិ លោក កឹម សុខា បានបញ្ជាក់បែបប្រៀបធៀបថា៖ «ដូចមនុស្សញ្ចឹង បើយើងចេះតែដាក់ថ្នាំផ្តេសផ្តាស់ ហើយអត់​ពិនិត្យរកមេរោគ ដាក់ថ្នាំអត់ត្រូវទេ។ អញ្ចឹងមេរោគនាំឲ្យគាំងនយោបាយ គឺមកពី គ.ជ.ប ដែលបោះឆ្នោតមិន​ត្រឹមត្រូវ ទៅប្រកាសលទ្ធផលតាមទំនើងចិត្ត។»។

អនុប្រធានគណបក្សជំទាស់រូបនេះ បន្ថែមថា បើគណបក្សប្រជាជនកម្ពុជា មានសុឆន្ទះ ពិតប្រាកដក្នុងការកែទម្រង់​ការបោះឆ្នោត និងដោះស្រាយភាពជាប់គាំងផ្នែកនយោបាយ គឺត្រូវកែទម្រង់លើ គ.ជ.ប មុនគេ ទើបអាចធានាទៅ​សម្រេចលើបញ្ហាផ្សេងទៀតបាន។ លោក កឹម សុខា បញ្ជាក់ថា៖ «ដូច្នេះប្រសិនបើគណបក្សសង្រ្គោះ​ជាតិនឹងចូល​ប្រជុំថ្ងៃទី១៧ គឺត្រូវលើករបៀបវារៈកែទម្រង់ គ.ជ.ប»។

ថ្ងៃទី១៧ ខែមីនា ជាថ្ងៃដែលក្រុមការងារបច្ចេកទេស គណបក្សប្រជាជនកម្ពុជា និងគណបក្សសង្រ្គោះជាតិ គ្រោង​នឹង​ជជែគ្នាបន្តទៀតលើការកែទម្រង់ការបោះឆ្នោត។ ការកែទម្រង់ការបោះឆ្នោត ដែលគណបក្សទាំងពីរបាន​ឯកភាពគ្នា​លើករណីមួយចំនួនហើយ មានការចុះឈ្មោះអ្នកបោះឆ្នោត ការបង្កើតច្បាប់ហិរញ្ញវត្តុគណបក្សនយោបាយជាដើម តែចំណុចរសើប ដែលជាឧបសគ្គដល់ការបន្តចរចា គឺគណបក្សប្រជាជនកម្ពុជា មិនទាន់ឯកភាពដាក់ស្ថាប័ន​បោះឆ្នោត ទៅជាស្ថាប័នធម្មនុញ្ញ តាមការស្នើសុំរបស់គណបក្សសង្រ្គោះជាតិនៅឡើយ។

គណៈកម្មាធិការជាតិរៀបចំការបោះឆ្នោត គ.ជ.ប បានប្រកាសលទ្ធលផលផ្លូវការ ក្រោយការបោះឆ្នោតជាតិខែកក្កដា ឆ្នាំ២០១៣ ថាគណបក្សប្រជាជនកម្ពុជាទទួលបាន៦៨អាសនៈ រីឯគណបក្សសង្រ្គោះជាតិទទួបាន៥៥អាសនៈ។ លទ្ធផលនេះ ត្រូវបានគណបក្សប្រជាជនកម្ពុជា ទទួលយក តែគណបក្សសង្គ្រោះជាតិ បានបដិសេធ ហើយបន្ត​ធ្វើ​ពហិការមិនចូលប្រជុំសភា រហូតដល់ពេលនេះ ដោយទាមទារឲ្យបោះឆ្នោតមុនអាណត្តិឡើងវិញ។

ជុំវិញករណីនេះ លោក សុខ ទូច អ្នកវិភាគនយោបាយឯករាជ្យកម្ពុជា បានពន្យល់ថា បើស្ថាប័នរៀបចំការបោះ​ឆ្នោត​នៅកម្ពុជាមានភាពឯករាជ្យ និងអព្យាក្រិត្យ គ្រប់គ្រាន់ នោះកម្ពុជាមិនបាច់កែទម្រង់ នោះទេ តែស្ថាប័នបោះឆ្នោត​នៅ​កម្ពុជា បានធ្វើឲ្យមានឧបសគ្គនយោបាយក្រោយការបោះឆ្នោត ច្រើនអាណត្តិមកហើយ ព្រោះគណបក្សនយោបាយ មិនជឿជាក់លើស្ថាប័នមួយនេះ។ លោកសុខ ទូច បញ្ជាក់ថា៖ «ស្ថាប័នបោះឆ្នោត មិនមែនជាឧបករណ៍របស់​អ្នក​នយោបាយឬ គណបក្សនយោបាយ ទេ គឺត្រូវឯករាជ្យ អព្យាក្រិត្យ »៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៥ មីនា ២០១៤