ស្ត្រី​អ្នក​ការសែត​មួយ​រូប​ ​ឈប់​ពី​ទូរទស្សន៍​រ៉ូស្សី ដើម្បី​ប្រឆាំង​រ៉ូស្សី (vdo)

អ្នកការសែត និងជាពិធីការិនីសញ្ជាតិអាមេរិកាំងមួយរូប ដែលធ្វើការឲ្យទូរទស្សន៍រ៉ូស្សីថ្ងៃនេះ (Russia Today) បាន​ជ្រើសរើសការលាឈប់ពីការងារ ដោយមូលហេតុនយោបាយរបស់វិមានក្រឹមឡាំង (រដ្ឋាភិបាលរ៉ូស្សី) នៅប្រទេស​អ៊ុយក្រែន។ នាងបានប្រកាសការលាឈប់នេះ នៅពេលដែលនាងកំពុងធ្វើការ ផ្សាយបន្ដផ្ទាល់ នូវកម្មវិធីព័ត៌មាន​របស់នាង តាមកញ្ចក់ទូរទស្សន៍។
Loading...
  • ដោយ: កេសរ កូល
  • កែប្រែចុងក្រោយ: March 06, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

អ្នកការសែត និងជាពិធីការិនីសញ្ជាតិអាមេរិកាំងមួយរូប ដែលធ្វើការឲ្យទូរទស្សន៍រ៉ូស្សីថ្ងៃនេះ (Russia Today) បាន​ជ្រើសរើសការលាឈប់ពីការងារ ដោយមូលហេតុនយោបាយរបស់វិមានក្រឹមឡាំង (រដ្ឋាភិបាលរ៉ូស្សី) នៅប្រទេស​អ៊ុយក្រែន។ នាងបានប្រកាសការលាឈប់នេះ នៅពេលដែលនាងកំពុងធ្វើការ ផ្សាយបន្ដផ្ទាល់ នូវកម្មវិធីព័ត៌មាន​របស់នាង តាមកញ្ចក់ទូរទស្សន៍។


នាងលីស វ៉ាហ៍ ពិធីការិនីអាមេរិកាំង នៅក្នុងទូរទស្សន៍រ៉ូស្សីថ្ងៃនេះ។ (រូបថត nbcnews.com)

អ៊ុយក្រែន - ស្ត្រីអ្នកសារព័ត៌មានអាមេរិកាំង របស់បណ្ដាញទូរទស្សន៍ រ៉ូស្សីថ្ងៃនេះ ដែលឧបត្ថម្ភធុនដោយ​ប្រទេស​រ៉ូស្សី បានប្រកាសលាឈប់ពីការងារ ដើម្បីប្រឆាំងទៅនឹងនយោបាយរបស់វិមានក្រឹមឡាំង នៅប្រទេសអ៊ុយក្រែន។ នាងលីស វ៉ាហ៍ (Liz Wahl) បាន​ពន្យល់នៅក្នុងកញ្ចក់ទូរទស្សន៍ ក្នុងពេលដែលនាងកំពុងធ្វើការផ្សាយ​បន្តផ្ទាល់​នោះថា នាង«មិនអាចធ្វើការសម្រាប់បណ្ដាញទូរទស្សន៍មួយ ដែលទទួលហិរញ្ញាវត្ថុ​ពីរដ្ឋាភិបាល​រ៉ូស្សី និងដែល​កាន់ជើងប្រធានាធិបតី​ វ្លាឌីមៀរ ពូទីន នោះទេ»។

ដោយខ្លួននាងជាកូនអ្នកភៀសខ្លួនពីប្រទេសហុងគ្រី ក្នុងសម័យកុម្មុយនីសសូវៀតនោះផង នាងបានថ្លែងយ៉ាង​ម៉ឺងម៉ាត់ថា «ខ្ញុំមានមោទនភាព ដែលបានក្លាយខ្លួនជាជនជាតិអាមេរិកាំង ហើយខ្ញុំចង់ឲ្យមានការផ្សព្វផ្សាយ នៃ​ហេតុការណ៍​ដ៏ពិតមួយ។ ហេតុដូច្នេះហើយ ទើបខ្ញុំជ្រើសរើសការលាលែង បន្ទាប់ពីការផ្សាយបន្តផ្ទាល់នេះទៅ។»

តែនាង លីស វ៉ាហ៍ មិនមែនជាមនុស្សដំបូងដែលប្រឆាំងនឹងអន្តរាគមន៍យោធារបស់ប្រទេសរ៉ូស្សី នៅក្នុងប្រទេស​អ៊ុយក្រែននេះទេ ព្រោះកាលពីថ្ងៃអង្គារមុននេះ ពិធីការិនីម្នាក់ទៀត ក៏បានបរិហាក្នុងទូរទស្សន៍ដដែល ពីការឈ្លាន​ពានផ្នែកយោធា របស់រដ្ឋធានី ម៉ូស្គូ នៅប្រទេសអ៊ុយក្រែននេះដែរ។ ការឈ្លានពានដែលត្រូវបានប្រព័ន្ធ​ផ្សព្វផ្សាយ​របស់រ៉ូស្សី មួយភាគធំ បិទបាំងនិងផ្សព្វផ្សាយគាំទ្រកិច្ចអន្តរាគមន៍យោធានេះ។ អ្នកសារព័ត៌មានដែលមានឈ្មោះថា អាប៊ី ម៉ាទីន បានថ្លែងនៅក្នុងកម្មវិធីរបស់នាងថា «អ្វីដែលរ៉ូស្សីកំពុងធ្វើ ជារឿងមួយដ៏អាក្រក់»។


នាង អាប៊ី ម៉ាទីន អ្នកសារព័ត៌មានម្នាក់ទៀត ដែលបរិហាអន្តរាគមន៍យោធា រ៉ូស្សី ក្នុងទូរទស្សន៍រ៉ូស្សី។ (រូបថតផ្ដិតពីរីដេអូ)

នៅចុងបញ្ចប់នៃកម្មវិធីផ្សាយរបស់នាង នាង អាប៊ី ម៉ាទីន បាននិយាយថា «នាងខ្ញុំរំលឹកហើយរំលឹកទៀត ថានាងខ្ញុំ​ប្រឆាំងនឹងអន្តរាគមន៍ណាក៏ដោយ នៅក្នុងកិច្ចការរបស់ប្រទេសមួយ ដែលមានអធិបតេយ្យភាព»។ នាងម៉ាទីន បាន​បញ្ជាក់ទៀតថា «កិច្ចអន្តរាគមន៍យោធាមិនអាចដោះស្រាយអ្វីរួចនោះទេ ហើយនាងខ្ញុំក៏មិនស្វែងរកការ​អត់អោន​ណា​មួយ ដើម្បីការពារការឈ្លានពានផ្នែកយោធានោះដែរ។ ជាពិសេសទៅទៀតនោះ នាងខ្ញុំខកចិត្តខ្លាំងណាស់ នៅ​ពេល​ដែលឃើញការផ្សព្វផ្សាយជាច្រើន ដែលមានលក្ខណៈលំអៀងខុសការពិត។»

ទូរទស្សន៍ រ៉ូស្សីថ្ងៃនេះ មានការិយាល័យផ្សាយរបស់ខ្លួន សឹងតែនៅជុំវិញពិភពលោក ហើយផ្សាយចេញជា​ច្រើន​ភាសា។ តែផ្នែកភាសាអង់គ្លេស របស់ទូរទស្សន៍នេះ ត្រូវបានផ្សាយចេញពីរដ្ឋធានីវ៉ាស៊ីនតោន សហរដ្ឋអាមេរិក៕

-----------------------------------------------
ដោយ កេសរកូល (ទំនាក់ទំនង៖ [email protected]) - ភ្នំពេញ ថ្ងៃទី០៦ មីនា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...