ប្រធានគណបក្សសង្រ្គោះជាតិ លោក សម រង្ស៊ី បានបញ្ជាក់ពីគោលជំហរគណបក្សខ្លួនថា គណបក្សសង្រ្គោះជាតិ នឹងមិនចូលរួមប្រជុំសភាជាមួយគណបក្សប្រជាជនកម្ពុជា ជាដាច់ខាត ល្គឹកណាមិនទាន់មានដំណោះស្រាយ​ចំពោះ​ការបោះឆ្នោតឡើងវិញ។ ការលើកឡើងរបស់លោក បានធ្វើឡើងទន្ទឹមនឹងក្រុមការងារបច្ចេកទេស របស់គណបក្ស​ទាំងពីរគ្រោងនឹងបន្តការចរចានយោបាយនៅថ្ងៃទី១០ ខែមីនា នេះទៀត។

លោកសម រង្ស៊ី ចុះជួបពលរដ្ឋអ្នកលក់ត្រកួន មុនពេលលោកឡើងយន្ដហោះ ថ្ងៃទី០៧ខែតុលាឆ្នាំ២០១៣។ (រូបថត គណបក្ស)

នយោបាយកម្ពុជា - តាមរយៈទំព័រហ្វេសប៊ុកផ្លូវការរបស់ខ្លួន នៅថ្ងៃទី០៦ ខែមីនា នេះ លោក សម រង្ស៊ី ប្រធាន គណបក្សសង្រ្គោះជាតិ ដែលជាគណបក្សជំទាស់បានពន្យល់ថា បញ្ហាចូលប្រជុំសភា និងបញ្ហាបោះឆ្នោតឡើងវិញ គឺជាបញ្ហាពីរដាច់ដោយឡែកពីគ្នា។ ហើយគណបក្សសង្រ្គោះជាតិ នឹងមិនចូលប្រជុំសភាដាច់ខាត ដរាបណាការ​បោះឆ្នោតឡើងវិញត្រឹមត្រូវ មិនទាន់បានដោះស្រាយរួច។

ប្រធានគណបក្សជំទាស់រូបនេះ បញ្ជាក់ថា៖ «ដូច្នេះពេលនេះ គឺយើងគ្រាន់តែនិយាយពីការរៀបចំការបោះឆ្នោត។ ការរៀបចំការបោះឆ្នោតចែកជាពីរចំណុច។ ទី១.គឺការកំណត់ថ្ងៃ ខែ ឆ្នាំ បោះឆ្នោតឡើងវិញ នេះជាបញ្ហានយោបាយ​ដែលយើងមិនទាន់ជជែកគ្នា។ តែបញ្ហាទី២.គឺបញ្ហាកែទម្រង់ ជាបញ្ហាបច្ចេកទេសសុទ្ធសាធដែល​យើងកំពុងជជែក​គ្នា។»

លោក ប៊ិន ឈិន ប្រធានក្រុមការងារបច្ចេកទេសខាងគណបក្សប្រជាជនកម្ពុជា ជាគណបក្សគ្រប់គ្រងអំណាច បាន​ថ្លែងប្រាប់អ្នកសារព័ត៌មាន ក្នុងសន្នីសីទការសែត ក្រោយការចរចារវាងគណបក្សទាំងពីរ ថ្ងៃទី០៣ មីនា នៅវិមាន​ព្រឹទ្ធសភា ថា មានត្រា៧៨នៃរដ្ឋធម្មនុញ្ញបានចែងច្បាស់ណាស់ ថាអាណត្តិរបស់រដ្ឋសភា មានរយៈពេល៥ឆ្នាំ ហើយ​មិនអាចរំលាយមុនអាណត្តិបានទេ លុះត្រាតែរដ្ឋាភិបាល ត្រូវបានទម្លាក់ ២ដង ក្នុងរយៈពេល១២ខែ។ តែលោក ប៊ិន ឈិន បានបញ្ជាក់ថា៖ «តែបើមានការព្រមព្រៀងធ្វើមិចទេអាហ្នឹង នយោបាយ ជួនកាលមួយពព្រិចភ្នែក»។

ក្នុងសន្និសីទការសែតដដែលនោះ លោក ស៊ុន ឆ័យ ជាប្រធានក្រុមការងារបច្ចេកទេសខាងគណបក្សសង្រ្គោះជាតិ ក៏បានលើកឡើងដែរថា ការចរចាជាបន្តបន្ទាប់រវាងគណបក្សសង្រ្គោះជាតិ និងគណបក្សប្រជាជនកម្ពុជា លើការ​កែទម្រង់ការបោះឆ្នោត មិនមែនមានន័យថា ឈានទៅដល់ការទាញឲ្យគណបក្សសង្រ្គោះជាតិ ចូលទៅប្រជុំសភា ទាំងទទឹងទទែងនោះទេ។ ចំពោះការបោះឆ្នោតឡើងវិញ លោក ស៊ុន ឆ័យ ពន្យល់ថា វាអាស្រ័យលើការមូលមាត់គ្នា​រវាងថ្នាក់ដឹកនាំ កំពូលរបស់គណបក្សសង្រ្គោះជាតិ និងគណបក្សប្រជាជនកម្ពុជា ក្នុងពេលខាងមុខ។

សម្រាប់លោក កែម ឡី ជាអ្នកស្រាវជ្រាវបញ្ហាសង្គម និងជាអ្នកវិភាគនយោបាយឯករាជ្យកម្ពុជា បានអត្ថាធិប្បាយ​ប្រាប់ទស្សនាវដ្ដីមនោរម្យ.អាំងហ្វូ ឲ្យដឹងថា ការចរចា រវាងគណបក្សប្រជាជនកម្ពុជា និងគណបក្សសង្រ្គោះជាតិ គួរ​មានការចរចានយោបាយជាមួយគ្នា ឲ្យមាន​ការឯកភាពសិន មុននឹងឈានទៅដល់ការចរចាផ្នែកបច្ចេកទេស។

អ្នកវិភាគសង្គម និងនយោបាយឯករាជ្យកម្ពុជារូបនេះ បានបញ្ជាក់ថា៖ «បើការចរចានយោបាយត្រូវគ្នាហើយ បញ្ហា​ផ្សេងទៀតមិនពិបាកទេ ហើយបញ្ហាបច្ចេកទេសគួរធ្វើក្រោយ ព្រោះវាស៊ីពេលយូរ និងស្មុគស្មាញ។ តែសំខាន់ត្រូវ​មានយន្តការគួរជឿជាក់ពីភាគីចរចា ថាអ្វីៗនឹងអនុវត្តតាមការកំណត់»។

ជុំវិញករណីនេះ អ្នកតាមដានស្ថានការនយោបាយកម្ពុជា បានកត់សម្គាល់ឃើញថា គណបក្សប្រជាជនកម្ពុជា និង​គណបក្សសង្រ្គោះជាតិ បានចរចានយោបាយចេញផ្លែផ្កា ជាបន្តបន្ទាប់ ពិសេសលើការកែទម្រង់ការបោះឆ្នោត តែ​ចំណុចដែលនៅតែមានការខ្វែងគំនិតគ្នានៅឡើយនោះ គឺការឯកភាពឲ្យមានការបោះឆ្នោត មុនបញ្ចប់​អាណត្តិឡើង​វិញ។ ដូច្នេះប្រសិនបើគណបក្សទាំងពីរ អាច«សម្បទាន» ឲ្យគ្នាត្រង់ចំណុចនេះបាន នោះវិបត្តិនយោបាយកម្ពុជា ដែលជាប់ផុងជាង៧មកហើយនោះ ទំនងជាអាចរកច្រកចេញរួច៕

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៦ មីនា ២០១៤