មជ្ឈដ្ឋានអ្នកច្បាប់បានសម្តែងការសាទរ ចំពោះគោលជំហរដែលមន្រ្តីជាន់ខ្ពស់រដ្ឋាភិបាលអាណត្តិទី៥នេះ និងអ្នក​តំណាងរាស្រ្តមួយចំនួន បានអះអាងជាបន្តបន្ទាប់ថា នឹង​បើកឲ្យសមាជិករដ្ឋាភិបាល មានរដ្ឋមន្រ្តីនិង​អ្នកទទួល​ខុសត្រូវមួយចំនួនទៀត ត្រូវទៅឆ្លើយបំភ្លឺឬជជែកដេញដោល​ ជាមួយអ្នកតំណាងរាស្រ្តនៅក្នុងរដ្ឋសភា។

រដ្ឋសភាជាតិ នៃព្រះរាជាណាចក្រកម្ពុជា មើលពីខាងក្រៅ។ (រូបថត wikimedia.org)

នយោបាយនិងច្បាប់ - លោកសុខ សំអឿន ប្រធានអង្គការក្រុមអ្នកច្បាប់ការពារសិទ្ធិកម្ពុជា បានអត្ថាធិប្បាយ​ប្រាប់​ទស្សនាវដ្តី មនោរម្យ.អាំងហ្វូ នៅថ្ងៃទី០៤ ខែមីនា នេះថា ការហៅសមាជិករដ្ឋាភិបាល ឬរដ្ឋមន្រ្តីទៅឆ្លើយបំភ្លឺ​ចំពោះ​មុខអ្នកតំណាងរាស្រ្ត នៅក្នុងរដ្ឋសភា គឺបានផ្តល់ផលប្រយោជន៍ច្រើនណាស់ ដល់ការដឹកនាំប្រទេស​ដោយមិនមាន​កំហុសឆ្គង។ លោកសុខ សំអឿន បន្តថា បើរដ្ឋាភិបាល និងរដ្ឋសភាផ្តើមធ្វើដូច្នេះ វាមានន័យថា ជាការព្រមានដល់​សមាជិករដ្ឋាភិបាល និងអ្នកទទួលខុសត្រូវផ្សេងៗទៀត ឲ្យមានការប្រុងប្រយ័ត្ន ក្នុងការបំពេញតួនាទីរបស់ខ្លួន។

ប្រធានអង្គការក្រុមអ្នកច្បាប់ការពារសិទ្ធិកម្ពុជា រូបនេះបញ្ជាក់ ថា៖ «យ៉ាងហោចណាស់ ក៏ធ្វើឲ្យរដ្ឋមន្រ្តីខ្លាចរអា គឺ​ត្រូវធ្វើការឲ្យស្អាត ឲ្យល្អ។ កាលពីអាណត្តិមុនៗ មិនសូវឃើញហៅមកសួរ ដល់ញ្ចឹងរដ្ឋាភិបាលធ្វើអ្វីស្រេចតែចិត្ត អត់មានអ្នកណាដឹង ហើយក៏អត់មានអ្នកសួរនាំ។ ត្រង់នឹងហើយដែលធ្វើឲ្យមានបញ្ហាច្រើន ដូចជា បញ្ហាដីធ្លី អភិបាលកិច្ច ជាដើម ផ្ទុះឡើងច្រើន ហើយអត់មានការដោះស្រាយ។»

ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និង ព័ត៌មានរបស់រដ្ឋសភា លោក ឈាង វុន បានថ្លែងទៅកាន់អ្នកសារព័ត៌មាន នៅវិមានព្រឹទ្ធសភា ថ្ងៃទី០៣ ខែមីនា ថា នៅអាណត្តិទី៥ នេះ អ្នក​តំណាងរាស្រ្ត នឹងបង្កើនការកោះហៅរដ្ឋមន្រ្តីសាមី តាមក្រសួងរបស់រដ្ឋនីមួយៗ ទៅសាកសួរនៅរដ្ឋសភា អំពី​បញ្ហា​រសើបទាំងឡាយ ដែលបានកើតឡើង នៅតាមក្រសួងទាំងនោះ។ លោក ឈាង វុន បានបញ្ជាក់ដូចនេះ ដោយ​យោងសម្តីលោក ហ៊ុន សែន ថា៖ «រដ្ឋមន្ត្រីនឹងត្រូវចូលខ្លួន ទៅបំភ្លឺពីកិច្ចការរបស់ខ្លួនក្នុងរដ្ឋសភា ហើយបើមិនហ៊ាន​ចូលទេត្រូវចុះចេញពីតំណែង»។

លោកនាយករដ្ឋមន្រ្តី ហ៊ុន សែន កន្លងមកដែលបានថ្លែងសារនយោបាយ ជំរុញឲ្យបេក្ខជនជាប់ឆ្នោតតំណាងរាស្រ្ត គណបក្សសង្រ្គោះជាតិ ជាគណបក្សជំទាស់ គួរចូលប្រជុំសភានោះ បានពន្យល់ថា អ្នកតំណាងរាស្រ្ត​គណបក្ស​សង្រ្គោះជាតិ នឹងមានសិទ្ធិហៅសមាជិករដ្ឋាភិបាល ទៅបភ្លឺ ក្នុងរដ្ឋសភាបាន ហើយថា បើរដ្ឋមន្ត្រីណាមិនចូលខ្លួន​ទៅបំភ្លឺពីកិច្ចការរបស់ខ្លួនក្នុងរដ្ឋសភា គឺត្រូវប្រឈមចុះចេញពីតំណែង។

គួរកត់សម្គាល់ថា បើទោះជាលោកនាយករដ្ឋមន្រ្តី ហ៊ុន សែន និងលោក ឈាង វុន បានអះអាងយ៉ាងនេះក៏ដោយ ក៏កាលពីអាណត្តិកន្លងមក រដ្ឋសភាកម្ពុជា តែត្រូវបានគណបក្សជំទាស់ អ្នកច្បាប់ និងក្រុមអង្គការសង្គមស៊ីវិល វាយតម្លៃ ថា បានប្រព្រឹត្តទៅដោយខ្វះតម្លាភាព ពោលគឺមិនផ្តល់ឱកាសគ្រប់គ្រាន់ ឬមិនបានសហការល្អ ជាមួយ ក្រុមអ្នកតំណាងរាស្រ្តគណបក្សជំទាស់ និងក្រុមអង្គការសង្គមស៊ីវិលនោះទេ ។

--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី០៤ មីនា ២០១៤