ការបង្កើតគណបក្សថ្មីរបស់ព្រះអង្គម្ចាស់ នរោត្ដម រណឫទ្ធិ អាចធ្វើទៅកើត ដោយសារតែទ្រង់បាន​ទទួលភ្លើង«ខៀវ» ពីគណបក្ស​កាន់អំណាច ក្នុងគោលបំណងទាញយកសម្លេងឆ្នោត ពីបក្សប្រឆាំងក្នុងពេលខាងមុខ។ នេះជាការបង្ហើប​ឲ្យដឹងពី​ប្រភពមួយ​ដែល​ស្និតនឹងគណបក្សប្រជាជនកម្ពុជា។

ព្រះអង្គម្ចាស់នរោត្តម រណឫទ្ធិ ក្នុងព្រះរាជពិធីថ្វាយព្រះភ្លើង នៃព្រះបុរមសពនរោត្ដម សីហនុ។ រូបថត wikimedia.org

របាយការណ៍ពិសេស - តើការបង្កើត«គណបក្សសង្គមរាស្ត្ររាជាធិបតេយ្យ» របស់ព្រះអង្គម្ចាស់នរោត្តម រណឫទ្ធិ ពិតជាមានការ«គាំទ្រ»​ដោយ​គណបក្សប្រជាជនឬយ៉ាងណា? តើរាជបុត្ររបស់អតីតព្រះមហាវិរៈក្សត្រ បានក្លាយ​ទៅជា«កូនជឹង»របស់លោកនាយករដ្ឋមន្ត្រី ហ៊ុន សែន ទៅហើយមែនឬ?

តាមប្រភពខាងលើ ដែលថ្លែងក្នុងលក្ខខ័ណ្ឌមិនបញ្ចេញឈ្មោះ ដោយបញ្ជាក់ប្រាប់ទស្សនាវដ្តីមនោរម្យ.អាំងហ្វូ ព្រឹក​ថ្ងៃទី២៧ ខែកុម្ភៈនេះថា មានគណបក្សតូចៗមួយចំនួន ដែលមានឈ្មោះនាពេលកន្លងមកនេះ ត្រូវបានទទួល​ការ​«គាំទ្រ»ទាំងផ្នែកច្បាប់ និងថវិការ ពីគណបក្សប្រជាជនកម្ពុជាទាំងអស់ ក្នុងគោលបំណង«បំបែក»​សម្លេងឆ្នោតពី​គណបក្ស​សង្គ្រោះជាតិ។

ការលើកឡើងរបស់មន្ត្រីរូបនេះ ជាមួយនឹងការអនុញ្ញាតឲ្យថតសម្លេងទុកនោះ បាន​បន្ថែម​ទៀតថា ទាំងនេះ​សុទ្ធ​តែ​ជារឿង«នយោបាយ» ដែលអ្នកនយោបាយនីមួយៗព្រោះតែចង់ឈ្នះរៀងៗខ្លួន ត្រូវតែប្រើ​នូវ«កលល្បិច» ដើម្បី​«អំណាច»។ លោកបញ្ជាក់យ៉ាងដូច្នេះថា «មានសញ្ញាពិសេសពីគណបក្សប្រជាជនកម្ពុជា ហើយមានគម្រោង​យូរ​ដែរមកហើយ ទើបតែពេលនេះ​បានការ​បង្ហាញនូវព័ត៌មានជាផ្លូវការប៉ុណ្ណោះ។ (…) គណបក្ស​តូចៗមួយចំនួននោះ ត្រូវបានរៀបចំឡើងដោយ​គណបក្ស​ប្រជាជនកម្ពុជា ក្នុងគោលបំណងធ្វើជាអ្នកប្រឆាំង ស្រូប​យកសន្លឹកឆ្នោត។»

ប្រភពដដែលនេះបានបន្តរថា គណបក្សថ្មីរបស់ព្រះអង្គម្ចាស់ រណឬទ្ធិ នឹងគ្មានការគាំទ្រពីប្រជា​ពលរដ្ឋ​ទៀតឡើយ ព្រោះក្នុងកំឡុងឆ្នាំ១៩៩៧ បន្ទាប់ពីព្រឹត្តិការណ៍បាញ់បោះថ្ងៃទី៥-៦ ខែកក្កដាបានកើតឡើង​នោះ​មក ​គណបក្ស​​ដែលដឹកនាំដោយទ្រង់ រណឫទ្ធិ នៅតែ​ចូលរួម​ការងារជាមួយ​គណបក្សប្រជាជនកម្ពុជា​ដូចដើម។ ម្យ៉ាង​ទៀត ព្រះអង្គ​ម្ចាស់អស់ការគាំទ្រ ដោយសារតែសមាជិកភាគច្រើនដែលធ្លាប់ស្និតជាមួយទ្រង់  បានរត់ទៅចូល​រួម​ជា​មួយ​គណបក្ស​ប្រជាជនកម្ពុជា រហូត​មកដល់សព្វថ្ងៃនេះសឹងតែទាំងអស់ទៅហើយ។

ដូច្នេះអ្វីដែលអាចឲ្យក្ដីសង្ឃឹមទៅគណបក្សថ្មីនេះ គឺទាក់ទាញយកក្រុមអ្នកគាំទ្រគណបក្សសង្គ្រោះជាតិ ដែលមាន​សន្ទុះកើតឡើង​យ៉ាងខ្លាំងក្លា បន្ទាប់ពីក្រុមមេដឹកនាំគណបក្សប្រឆាំងពីរ គឺគណបក្សសម រង្ស៊ី និងគណបក្ស​សិទ្ធិ​មនុស្ស បានរួបរួម​គ្នាជាគណបក្សមួយនោះមក។

ទស្សនាវដ្តីមនោរម្យ.អាំងហ្វូ  ព្យាយាមសុំប្រតិកម្មតបពីលោក ប៉ែន សង្ហា អ្នកនាំពាក្យរបស់ព្រះអង្គម្ចាស់ នរោត្ដម រណឫទ្ធិ តែលេខរបស់លោក មិនអាចភ្ជាប់ទំនាក់ទំនងបាន។ គួររំលឹកឡើងវិញថា កាលពីថ្ងៃទី១ ខែវិច្ឆិកា ឆ្នាំ២០០៨ ព្រះអង្គម្ចាស់ នរោត្តម រណឫទ្ធិ បានទទួលតំណែងជា ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ឋានៈស្មើ​«នាយករដ្ឋមន្ត្រី» ក្រោយ​ពេលព្រះអង្គបានសម្រេចព្រះទ័យ លាឈប់ពី«ឆាក»នយោបាយ។

សម្រាប់មន្ត្រីជាន់ខ្ពស់នៃគណបក្សប្រជាជនកម្ពុជា លោក ជាម យៀប វិញ ទស្សនាវដ្ដីក៏មិនអាចសុំប្រតិកម្ម​តប​បាន​នៅឡើយដែរ ព្រោះតែទូរស័ព្ទហៅចូល តែមិនមានការទទួល។

កាលពីឆ្នាំ២០០៨ ក្រោយព្រះអង្គម្ចាស់អង្គនេះ បានប្រកាស​ថា​មិនចូលប្រឡូកក្នុងរឿងនយោបាយនោះ បែរជា​មាន​ពាក្យចចាមរាមមួយ បានលើកឡើងថា ទ្រង់នៅ«ប្រកាន់»ជំហរ​ចូល​រួម ក្នុងរឿងនយោបាយ ដោយសារតែមានការ​គាំទ្រពីលោក ហ៊ុន សែន។ ភ្លាមៗនោះ នៅថ្ងៃទី៨ ខែធ្នូ ឆ្នាំ២០១០ លោក​នាយករដ្ឋមន្ត្រី ហ៊ុន សែន បានថ្លែងសារ​នយោបាយបន្ទាន់មួយ ជាលាយលក្ខណ៍អក្សរ ដើម្បីបដិសេធ និងបញ្ចប់​ពាក្យចចាមអារ៉ាមដែលថារូបលោក (នាយករដ្ឋមន្ត្រីហ៊ុន សែន) ជាអ្នកបើកភ្លើងខៀវ ឬគាំទ្រទ្រង់ រណឬទ្ធិ អោយ​ចូលក្នុងឆាកនយោបាយ​ក្នុងអំឡុង​ពេលនោះ។

ទស្សនាវដ្ដីបានសាកសួរលោក ញឹក ប៊ុនឆៃ អគ្គលេខាធិការគណបក្សរាជានិយម ហ៊្វុនស៊ិនប៉ិច ដើម្បីបំភ្លឺជុំវិញការ​លើកឡើងខាងលើ លោកបានយល់ស្របថា បើ«គ្មានការគាំទ្រពីខាងណាមួយនោះទេ ទ្រង់ក៏នឹងមិនអាចបើក​បាន​ដែរ»។ លោក​បញ្ជាក់​យ៉ាងដូច្នេះថា «តាមមើលលោក មិនជាចង់ចូលរួមក្នុងឆាកនយោបាយ(វិញ)ប៉ុន្មានទេ ប៉ុន្តែ​មាន​គេ​ជំរុញ គេលើក​ឡើងថា អាចមានតែព្រះអង្គទេ ដែលអាចដោះស្រាយបញ្ហាកំពុងតែមានសព្វថ្ងៃ។»

សម្រាប់អង្គការសង្គមស៊ីវិលវិញ នៅមិនទាន់មើលឃើញថា មិនមាននូវចំណុចណាមួយ ដែលនាំអាទិ៍មិនឲ្យ​ទ្រង់​បង្កើតគណបក្សថ្មី ដើម្បីចូលរួមធ្វើនយោបាយនោះទេ នោះជារឿងបុគ្គលរបស់ទ្រង់។ ថ្លែងប្រាប់ទស្សនាវដ្ដី​តាម​ទូរស័ព្ទ អនុប្រធានផ្នែកដីធ្លី និង​ធនធាន​ធម្មជាតិ នៃសមាគមការពារសិទ្ធិមនុស្ស អាដហុក លោក ចាន់ សុវ៉េត បានបញ្ជាក់ថា តែបើទ្រង់ត្រូវបានគេគម្រាមកំហែង ទ្រង់មានសិទ្ធិក្នុងការប្តឹង ឬប្រកាស​ព័ត៌មាន​ជាសាធារណៈ​ពីបញ្ហាគៀបសង្កត់ និងគម្រាមកំហែងទាំងនោះឲ្យបានទូលំទូលាយ ថាតើ (វា) អាចបណ្តាល​មក​ពី​មូលហេតុអ្វី? តែមន្ត្រីសង្គមស៊ីវិលរូបនេះ នៅតែបង្ហាញនូវការព្រួយបារម្ភក្នុងចិត្តដែរ ប្រសិនបើគណបក្សថ្មីរបស់​ព្រះអង្គម្ចាស់ រណឫទ្ធិ ពិតជាត្រូវបានបង្កើតឡើង ក្រោមការគាំទ្រពីគណបក្សណាមួយមែននោះ។

ទោះយ៉ាងណាក៏ដោយក្នុងនាមលោក ជាសង្គមស៊ីវិល លោក ចាន់ សុវេត ក៏មិនចង់ឲ្យមានការ​«រើសអើង»​ផ្នែក​នយោបាយណាមួយនោះទេ។ ព្រោះបញ្ហានៃការរើសអើងនេះ អាចបណ្តាលឲ្យកើតមាននូវ​អំពើហិង្សា។ លោកបាន​ថ្លែងបញ្ជាក់ថា «យើង​ចង់ឲ្យរដ្ឋាភិបាលជាអ្នកធានា និងមានការតព្វកិច្ចការពានូវសិទ្ធិសេរីភាពរបស់មនុស្ស និងផ្តល់​នូវសិទ្ធិសេរីភាពដល់មនុស្ស ដែលត្រូវតែមានភាពស្មើគ្នា៕»

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៧ ខែកុម្ភៈ ឆ្នាំ២០១៤