លោកនាយករដ្ឋមន្ត្រី ហ៊ុន សែន កាលពីថ្ងៃអង្គារមិ្សលមិញ បានស្នើឲ្យមន្ត្រីរបស់ខ្លូន ត្រៀមបែងចែកទី​កន្លែងជាពីរ​ផ្សេងៗគ្នា ទុកសម្រាប់ក្រុមអ្នកតវ៉ាប្រឆាំង និងក្រុមអ្នកគាំទ្រ នៅពេលដែលពួកគេធ្វើបាតុកម្ម។ គំនិតយោបល់​របស់​លោក ហ៊ុន សែន ត្រូវគេមើលឃើញថាមានចរិតញុះញង់ ដើម្បីឲ្យមានអំពើហិង្សារវាងប្រជាពលរដ្ឋនិងពលរដ្ឋ ពី​ព្រោះថា កន្លែងធ្វើបាតុកម្មតែមួយ បើពុះជាពីរដើម្បីឲ្យមានអ្នកធ្វើបាតុកម្មគាំទ្រ និងប្រឆាំងធ្វើជាមួយគ្នា វាច្បាស់​ណាស់អំពើហិង្សា ប្រាកដជាកើតមាន។

លោក ហ៊ុន សែន  នៅពេលលោក ចុះពិនិត្យការដ្ឋានស្ពានស្ទឹងមានជ័យ ថ្ងៃទី៣១ ខែកក្កដា ឆ្នាំ២០១៣។ (រូបថត REUTERS/Samrang Pring)

នយោបាយ - «អាជ្ញាធរទាំងអស់ ត្រូវត្រៀមរៀបចំបែងចែកកន្លែងជាពីរទុកសម្រាប់ក្រុមអ្នកតវ៉ាប្រឆាំងនិងអ្នកគាំទ្រ ព្រោះគេមានសិទ្ធិយើងក៏មានសិទ្ធិដែរ»។ នេះគឺជាសម្តីរបស់លោក ហ៊ុន សែន នាយករដ្ឋមន្រ្តីកម្ពុជា។ ការលើក​ឡើង​របស់លោក ហ៊ុន សែន បានធ្វើឲ្យមតិមហាជនមួយចំនួនសម្តែងការហួសចិត្ត និងមិននឹកស្មានដល់។ មិននឹកស្មាន​ដល់ ដោយសារថា របៀបឬយោបល់បែបនេះ គេច្រើនតែឃើញមេដឹកនាំ នៃបណ្តាលប្រទេសផ្តាច់ការនោះទេ ដែល​ចូលចិត្តប្រកាសឲ្យធ្វើបែបនេះ។ ប៉ុន្តែសម្រាប់ប្រទេសដែលប្រកាន់យកលិទ្ធិប្រជាធិបតេយ្យ មិនអាចធ្វើបែបនេះ​បាន​ឡើយ ថ្វីត្បិតតែមានសិទ្ធិដូចគ្នាក៏ដោយ តែបើអ្នកគាំទ្រ និងអ្នកប្រឆាំងធ្វើបាតុកម្មក្នុងទីតែមួយជិតគ្នា ចង់មិនចង់​អំពើហិង្សា ប្រាកដជានឹងកើតមានជាក់ជាមិនខាន។

មួយវិញទៀត ហេតុផលដែលនាំឲ្យគេហួសចិត្ត ចំពោះសម្តីរបស់លោក ហ៊ុន សែន គឺខ្លួនជានាយករដ្ឋមន្រ្តី ឬជា​ប្រមុខរដ្ឋាភិបាលកម្ពុជាទាំងមូល ដែលត្រូវតែបង្ហាញនូវឥរិយាបថអហិង្សា សម្របសម្រួល ដោះស្រាយបញ្ហា​ដោយ​សន្តិវិធី បែរជារកឃើញមធ្យោយបាយដ៏កម្សោយ យកមកអនុវត្តបែបនេះទៅវិញ។ ពីព្រោះថា មធ្យោបាយឬយោបល់​របស់លោក ហ៊ុន សែន មានចរិតចង់ឲ្យខ្មែរបែកបាក់គ្នា និងអាចឈានទៅរកការកើតឡើង នៃសង្គ្រាមស៊ីវិល​នៅ​កម្ពុជាសាជាថ្មីឡើងវិញ។ បើនិយាយឲ្យចំ គឺយោបល់របស់លោក ហ៊ុន សែន សមពាក្យមួយនិយាយថា «យកសាំង​ទៅចាក់ពន្លត់ភ្លើង»។

លោក ហ៊ុន សែន ខំប្រឹងស្រែកថា ប្រទេសប្រជាធិបតេយ្យ គឺមានសិទ្ធិដូចគ្នា ប្រឆាំងក៏មានសិទ្ធិ គាំទ្រក៏មានសិទ្ធិ។ វាជាការពិត ប្រទេសប្រជាធិបតេយ្យការតវ៉ា តែងតែមានអ្នកប្រឆាំងនិងអ្នកគាំទ្រ គឺមានសិទ្ធិដូចគ្នា។ ក៏ប៉ុន្តែ​ក្នុងនាម​ខ្លួនឯងជានាយករដ្ឋមន្រ្តីមិនគួរបើកផ្លូវឲ្យប្រជាពលរដ្ឋខ្លួនតវ៉ាក្នុងទីកន្លែងជាមួយគ្នានោះទេ។ គួរតែឲ្យអ្នកតវ៉ា​រកទី​កន្លែងពីផ្សេងគ្នា ហើយដែលនៅឆ្ញាយពីគ្នាវាងអ្នកតវ៉ាគាំទ្រ និងអ្នកប្រឆាំង ដើម្បីជៀសវាងការផ្ទុះអំពើហិង្សា។

ព្រឹត្តិការណ៍ដោយឡែកមួយទៀត លោក ហ៊ុន សែន បាននិយាយកាលពីម្សិលមិញដែរថា ប្រសិនបើកម្មករ​នៅតែ​ធ្វើបាតុកម្មទៀត ហើយអ្នកវិនិយោគឈប់រកស៊ីនៅកម្ពុជា នាំឲ្យកម្មករអត់ការងារធ្វើ។ បើកម្មករអត់ការងារធ្វើ មិន​អាចមករករឿងរដ្ឋាភិបាលបាននោះទេ គឺត្រូវទៅរកអ្នកដែលដឹកនាំខ្លួនធ្វើបាតុកម្មឲ្យរកការងារធ្វើទៅ។ ការលើក​ឡើង​របស់លោក ហ៊ុន សែន បាននេះ មនុស្សល្ងង់ក៏គេអាចយល់ថា គឺជាសម្តីដែលខ្វះទំនួលខុសត្រូវ ក្នុងនាមខ្លួន​ជាប្រមុខរដ្ឋាភិបាលនោះឡើយ។

យ៉ាងណាស់ក៏ដោយ ក៏យោបល់ឬយុទ្ធសាស្រ្តរបស់លោក ហ៊ុន សែន បែបនេះ ចំពោះអ្នកតាមដានស្ថានការណ៍​នយោបាយ​ជាប់ជានិច្ច គេប្រាកដជាដឹងច្បាស់ថា គ្មានអ្វីចម្លែកនោះដែរ ពីព្រោះថា សម្តីបែបកុម្មុយនីស និងបែប​កំហឹង​របស់លោក ហ៊ុន សែន តែងតែនិយាយនិងអនុវត្តជានិច្ច តួយ៉ាងដូចពាក្យសម្តីប្រចាំត្រកូលលោក ហ៊ុន សែន បិទទ្វារវ៉ៃឆ្កែ និងត្រូវតែបង្ក្រាបជាដើម៕

គួររម្លឹកថា នៅក្នុងពិធីសម្ពោធ ដាក់ឲ្យដំណើរការរោងចក្រអគ្គិសនី ប្រើដោយថាមពលធ្យូងថ្ម នៅខេត្តព្រះសីហនុ កាលពីថ្ងៃអង្គារទី ២៥ ម្សិលមិញ លោក ហ៊ុន សែន បានប្រាប់ទៅអាជ្ញាធរត្រៀម ពុះទីលានជាប្រជាធិបតេយ្យ​ជាពីរ​ប្រសិនបើមានការស្នើសុំធ្វើបាតុកម្ម ព្រោះអ្នកធ្វើបាតុកម្មមានអ្នកគាំទ្រ និងអ្នកប្រឆាំង។ ម្លោះហើយពួកគេមានសិទ្ធិ​ដូចគ្នា បើមិនឲ្យធ្វើបាតុកម្មមិនឲ្យទាំងពីរ បើឲ្យ ត្រូវឲ្យទាំងពីរ៕

-------------------------------------------------
ដោយ ជា ធីរិទ្ធ (ទំនាក់ទំនង៖ [email protected]) - ភ្នំពេញថ្ងៃទី ២២ ខែ កុម្ភៈ ឆ្នាំ២០១៤