បុគ្គលិកពេទ្យសម្ភពក្រុុង តវ៉ាព្រោះខ្លាចអាគារមន្ទីរពេទ្យ នឹងត្រូវ«លក់»
បុគ្គលិកពេទ្យនៅមន្ទីពេទ្យបង្អែករាជធានីភ្នំពេញ ហៅ សម្ភពក្រុង ប្រមាណ៣០០នាក់ បាននាំគ្នាតវ៉ាដោយជំទាស់ទៅនឹងការផ្លាស់ប្តូរ ពីអាគារចាស់ខាងមុខ ទៅកាន់អាគារដែលសាងសង់ថ្មី នៅខាងក្រោយវិញ ដោយពួកគេបារម្ភថាថ្នាក់ដឹកនាំមន្ទីរមានគម្រោងនឹងយកអាគារចាស់ ដាក់លក់ដូរ។
ការតវ៉ាររបស់ក្រុមគ្រូពេទ្យ នៃមន្ទីរពេទ្យបង្អែក រាជធានីភ្នំពេញ ថ្ងៃទី២៥ ខែកុម្ភៈ ឆ្នាំ២០១៤។ (រូបថតហ្វេសប៊ុក)
បាតុកម្ម - បញ្ហាលក់ដូរសម្បត្តិអចលនវត្ថុសាធារណៈ ស្ថិតនៅជាបញ្ហាក្ដៅគគុក នៅក្នុងសង្គមកម្ពុជាសព្វថ្ងៃ។ នេះជាក្ដីបារម្ភ របស់ក្រុមគ្រូពេទ្យប្រមាណជា៣០០នាក់ នៃមន្ទីរពេទ្យបង្អែក រាជធានីភ្នំពេញហៅ សម្ភពក្រុង ដែលមានទីតាំងស្ថិតនៅ ក្នុងសង្កាត់វាលវង់ក្នុងខណ្ឌ៧មករា ហើយបានប្រមូលគ្នាតវ៉ា នៅថ្ងៃទី២៥ ខែកុម្ភៈ ឆ្នាំ២០១៤នេះ។ ការតវ៉ាដែលកើតឡើងនៅមុខមន្ទីពេទ្យតែម្ដងនេះ បានលើកឡើងប្រឆាំងទៅនឹងការផ្លាស់ប្ដូរកន្លែងធ្វើការ ពីអាគារចាស់ ទៅអាគារសង់ថ្មីដែលមានទំហំតូចជាងគ្នាបីដង របស់ប្រធានមន្ទីរសុខាភិបាលរាជធានីភ្នំពេញ។ ក្រុមគ្រូពេទ្យដែលតវ៉ាទាំងនោះបារម្ភថា ថ្នាក់ដឹកនាំមន្ទីរពេទ្យមានគម្រោងលក់អគារមន្ទីរពេទ្យនេះ ។
ក្រុមគ្រូពេទ្យដែលចូលរួមតវ៉ាថ្ងៃនេះបានអះអាងថា ពួកគាត់មិនចង់ផ្លាស់ប្តូរពីអាគារខាងមុខនេះ ទៅអាគារខាងក្រោយនោះទេ ព្រោះវាតូចមិនអាចដាក់បុគ្គលិក គ្រប់គ្រាន់បាន។ លោកគ្រូពេទ្យផ្នែកជំងឺឆ្លងម្នាក់ បានបញ្ជាក់ថាពួកគាត់ចង់អោយអាគារចាស់នេះ រក្សាស្ថានភាពដើម ព្រោះថាវាក៏អាចនៅដំណើការបាន។ លោកបានអះអាងទៀតថា កន្លែងថ្មីដែលបានសាងសង់នោះ មានលក្ខណៈតូចចង្អៀតណាស់ ហើយមិនទាន់ធ្វើហើយទៀត។
ទោះយ៉ាងណាក៏ដោយ មានគ្រូពេទ្យមួយចំនួន ក៏មិនបានអើពើនឹងការផ្លាស់ប្តូនៃមន្ទីរពេទ្យនេះដែរ ។ ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ បុគ្គលិកផ្នែកចក្ខុ លោកគ្រូពេទ្យ គង់ វណ្ណៈ បានប្រាប់ថាលោកមិនជំទាស់ទៅការផ្លាស់ប្តូនេះទេ។ ប៉ុន្តែលោកបានពន្យល់យ៉ាងនេះថា «អាគារថ្មីដែលគេសង់ គឺមិនគ្រប់ទំហំដូចអាគារចាស់នោះទេ វាតូចជាងមិនអាចដាក់បុគ្គលគ្រប់គ្រាន់បាន»។
ប្រធានមន្ទីរសុខាភិបាល រាជធានីភ្នំពេញ លោក សុខ សុគន្ធ មិនអាចសុំការអត្ថាធិប្បាយបានទេនៅថ្ងៃទី២៥ ខែកុម្ភៈនេះ ដោយលោកជាប់រវល់ប្រជុំ។ តែខណៈពេលក្រុមគ្រូពេទ្យធ្វើបាតុកម្ម លោកបានមកសម្របសម្រួលដោយផ្ទាល់ ចំពោះការតវ៉ារបស់ក្រុមគ្រូពេទ្យទាំងនោះ និងបានស្នើឲ្យពួកគាត់ធ្វើការជាធម្មតា នៅកន្លែងដដែល ដោយរង់ចាំការដោះស្រាយនៅពេលក្រោយជាបន្តទៀត។
ការតវ៉ានៅព្រឹកនេះផង មានគ្រូពេទ្យមួយចំនួន បានលើកឡើងថា អាគារមន្ទីពេទ្យចាស់នេះនឹងត្រូវលក់ ហើយពួកគាត់មកតវ៉ាថ្ងៃនេះ ដើម្បីមិនអោយលក់អាគារមន្ទីពេទ្យនេះ ព្រោះប្រជាពលរដ្ឋច្រើនណាស់ដែលមានជីវភាពក្រីក្រគាត់ត្រូវការមន្ទីពេទ្យដើម្បីពិនិត្យជំងឺ។ ប្រសិនបើអត់មានមន្ទីពេទ្យនេះ តើថ្ងៃក្រោយពួកគាត់ជាប្រជាជនក្រីក្រមានអ្វីត្រូវរំពឹង។ តែសម្រាប់គ្រូពេទ្យ គង់ វណ្ណៈ បានឆ្លើយតបទៅនឹងការលើកឡើងនេះថា «ចំពោះខ្ញុំមិនបានទទួលព័ត៌មានពីការលក់នេះទេ គ្រាន់តែប្រធានមន្ទីសុខាភិបាល គាត់មានការផ្លាស់ប្តូរពីអគារខាងមុខមក អាគារខាងក្រោយ ហើយពាក្យដែលគេចោទថាលក់នោះ មិនដឹងជាគេសំអាងទៅលើអីទេ វាគ្រាន់ពាក្យចចាមអារាម»៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) -ភ្នំពេញ ថ្ងៃទី ២៥ កុម្ភៈ ២០១៤