ព្រុំ សុខា៖ ការបោះឆ្នោតមុនអាណត្តិនឹងមិនលើកមកចរចា
ក្នុងជំនួបប្រជុំចរចានៅថ្ងៃទី១៨ ខែកម្ភៈនេះ គណបក្សជាប់ឆ្នោតទាំងពីរ មិនបានលើកយកបញ្ហា នៃការបោះឆ្នោតមុនអាណត្តិយកមកពិភាក្សា ដូចការទាមទារកន្លងមករបស់គណបក្សសង្រ្គោះជាតិឡើយ។
លោក ព្រំ សុខា (ខាងឆ្វេង) និងលោក សុន ឆៃ ថ្លែងទៅកាន់អ្នកសារព័ត៌មាន បន្ទាប់បីកិច្ចប្រជុំថ្ងៃទី១៨ ខែកុម្ភៈ ឆ្នាំ២០១៤។ (រូបថត MONOROOM.info/ O. Vary)
នយោបាយកម្ពុជា - ក្នុងអំឡុងធ្វើបាតុកម្មរបស់គណបក្សសង្រ្គោះជាតិ មេដឹកនាំគណបក្សប្រឆាំងទាំងពីរ គឺលោក សម រង្ស៊ី និងលោក កឹម សុខា តែងបានប្រកាសក្តែងៗថា ការបោះឆ្នោតមុនអណត្តិត្រូវតែកើតមាន ហើយពួកលោកតែងព្យាយាមមធ្វើយ៉ាងណា ដើម្បីអោយរដ្ឋាភិបាលដែលគ្រប់គ្រង ដោយលោកនាយករដ្ឋមន្រ្តីហ៊ុន សែន ចុះចេញពីតំណែង មុនឹងធ្វើការបោះឆ្នោតសារឡើងវិញ។ ការទាមទារនេះ ដោយសារតែគណបក្សប្រឆាំង និងក្រុមអ្នកគាំទ្ររបស់ខ្លួន មិនបានយល់ស្របឡើយ ទៅនឹងលទ្ធផលបោះឆ្នោតសកល កាលពីថ្ងៃទី២៨ ខែកក្តដា ឆ្នាំ២០១៣ កន្លងទៅ។
នៅឱកាសសន្និសិទកាសែត នៅវិមានព្រឹទ្ធសភា ថ្ងៃទី១៨ ខែកុម្ភៈ ឆ្នាំ២០១៤នេះ ខណៈពេលអ្នកសារព័ត៌មាន សួរថាតើការបោះឆ្នោតមុនអណត្តិ នឹងត្រូវលើកមកពិភាក្សាដែរឬទេ? ឆ្លើយតបជាមួយសំណួរនេះ លោក ព្រុំ សុខា ប្រធានក្រុមការងារគណបក្សប្រជាជានកម្ពុជាបានបញ្ជាក់ថា «យើងអត់និយាយទេ ដូចដែលយើងខ្ញុំបានបញ្ជាក់ហើយ យើងនិយាយតែការរៀចចំក្របខណ្ឌកំណែទម្រង់បោះឆ្នោត នៅពេលខាងមុខនោះទេ»។
រីឯគណៈបក្សសង្រ្គោះជាតិវិញ ក៏នៅមិនទាន់មានជំហរណាមួយ ក្នុងការធ្វើបាតុកម្មអោយមានការបោះឆ្នោតសារឡើងវិញនោះដែរ។ នេះបើតាមការបញ្ជាក់របស់លោក ស៊ុន ឆ័យ ប្រធានក្រុមការងារ គណបក្សសង្រ្គោះជាតិ។ លោកបានបន្តថា «យើងកំពុងធ្វើការងារដោះស្រាយបញ្ហា តាមដានចរចាដោយសន្តិវិធី ជាគោលការណ៍យើងមិនមានគម្រោងណាដើម្បីធ្វើការចរចាផង បាតុកម្មផងនៅឡើយទេ»។
លោកកែម ឡី អ្នកវិភាគសង្គមឯករាជ្យ និងឃ្លាំងមើលស្ថានភាពនយោបាយកម្ពុជា បានទទួលស្គាល់ថា បើកាលណាប្រជុំតែម្តងគណបក្សនីមួយលើកមិនអាចលើរឿងមកនិយាយអស់ទេ នៅពេល មានការប្រជុំច្រើនដង ទើបគណបក្សនីមួយៗលើកបញ្ហារៀងៗខ្លួនមកនិយាយ។ រីឯរឿងបញ្ហាធំៗទៀតសោតត្រូវការអ្នកនយោបាយជាន់ខ្ពស់ជាអ្នកសម្រេច៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ១៨ ខែកុម្ភៈ ឆ្នាំ២០១៤