ជួន មុំថុល៖ អ្នកទាមទារប្រាក់ឈ្នួល១៦០ដុល្លារ គឺជាអ្នកអុកឡុកសង្គម
សហភាពសហព័ន្ធសហជីពជាតិកម្ពុជា ដឹកនាំដោយលោក ជួន មុំថុល បានលើកឡើងថា ការដំឡើងប្រាក់ឈ្នួលដោយរដ្ឋាភិបាល និងភាគីក្រុមហ៊ុនមិនទាន់បានអនុវត្តពេញលេញផង ហេតុអ្វីចាំបាច់ត្រូវទាមទារដំឡើងប្រាក់ឈ្នួលគោលបន្ថែមទៀត? ហើយការដែលសហជីពមួយចំនួន បន្តទាមទារប្រាក់ឈ្នួលគោល នោះគ្រាន់តែជាការអុកឡុកសង្គមឲ្យចលាចលតែប៉ុណ្ណោះ។
លោក ជួន មុំថុល ប្រធានសហភាពសហព័ន្ធសហជីពជាតិកម្ពុជា។ (រូបថត ហ្វេសប៊ុក)
វិបត្តិការងារ - លោក ជួន មុំថុល ប្រធានសហភាពសហព័ន្ធសហជីពជាតិកម្ពុជា បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ នៅថ្ងៃទី១១ ខែកុម្ភៈ នេះថា ៖ «ដំឡើងប្រាក់ខែមិនទាន់សើមគូតផង ប្រាក់ខែ១០០ដុល្លារមិនទាន់បានចាយផង ទៅទាមទារឡើងអ្វីទៀត។ ចូលធរមានថ្ងៃទី១ ឥឡូវថ្ងៃ១១ មិនទាន់បានបើកមូយខែផង។ អាហ្នឹងគេហៅថាអុកឡុកសង្គម។ ខ្ញុំមិនមានអ្វីទេ តែរដ្ឋាភិបាលមានវិធីដោះស្រាយហើយ។»
ការអត្ថាធិប្បាយរបស់លោក ជួន មុំថុល នៅពេលនេះ គឺស្របពេលដែលមេដឹកនាំសហជីព និងសមាគម សំខាន់ៗមួយចំនួនដូចជា លោក រ៉ុង ឈុន លោក អាត់ ធុន និងលោក ជា មុន្នី ជាដើម បានព្រមានក្នុងពេលចុងក្រោយនេះថា មហាកូដកម្មទូទាំងប្រទេសនឹងផ្ទុះឡើងជាថ្មីនៅក្នុងពេលឆាប់ៗខាងមុននេះ។ ហើយមហាកូដកម្មនេះ គឺក្នុងបំណងទាមទារដំឡើងប្រាក់ឈ្នួលគោលឲ្យបាន១៦០ដុល្លារ។
ស្របគ្នាក្នុងពេលចុងក្រោយនេះ លោក សម រង្ស៊ី ប្រធានគណបក្សសង្រ្គោះជាតិ ក៏បានបន្តសម្តែងការគាំទ្រដល់ការទាមទាររបស់សហជីព និងកម្មករ ក្នុងការដំឡើងប្រាក់ឈ្នួលផងដែរ។ ប្រធានគណបក្សជំទាស់រូបនេះ អះអាងថា បច្ចុប្បន្ន មានក្រុមហ៊ុនមួយចំនួន បានយល់ព្រមដំឡើងប្រាក់ឈ្នួលគោល១៦០ដុល្លារហើយ ដូច្នេះរដ្ឋាភិបាល និងក្រុមហ៊ុនគួរតែសហការគ្នា ជំរុញឲ្យមានការដំឡើងប្រាក់ឈ្នួលដល់កម្មករ។ ហើយក្រុមហ៊ុនដែលមិនទាន់យល់ព្រមដំឡើង គួរធ្វើការចរចាបន្តទៀត។
ចំពោះករណីនេះ លោក ជួន មុំថុល បានពន្យល់ថា បច្ចុប្បន្ននេះ នៅភ្នំពេញមានរោងចក្រប្រហែលជា៩៦០ ហើយក្នុងចំណោមនោះ មានតែ៣០រោងចក្រទេដែលអាចដំឡើងប្រាក់ឈ្នួលគោលដល់៣០០ដុល្លាក៏បានដែរ។ តែ៩៣០ រោងចក្រផ្សេងទៀត មិនមានលទ្ធភាពដំឡើងប្រាក់ឈ្នួលគោលដល់១៦០ដុល្លារ ដូចការទាមទាររបស់សហជីព និងកម្មករ«មួយចំនួន»នោះទេ៕
--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១១ ខែកុម្ភៈ ឆ្នាំ២០១៤