ទេព វន្នី៖ កែវដែលបែកប្រេះស្រាំហើយ វាមិនអាចដូចដើមទេ
«កែវដែលបែកប្រេះស្រាំហើយ វាមិនអាចដូចដើមទេ ព្រោះយើងឈឺចាប់រាប់ឆ្នាំហើយ» នេះជាការលើកឡើងរបស់ជនរងគ្រោះពីការរំលោភដីធ្លី អ្នកស្រីទេព វន្នី ដោយអ្នកស្រីបានធ្វើការប្រៀបធៀបសហគមន៍របស់អ្នកស្រី ទៅនឹងកែវមួយដែលត្រូវបានគេធ្វើអោយបែក ហើយមិនអាចយកអ្វីមកផ្ជិតវិញបាន។
អ្នកស្រី ទេព វន្នី (អាវក្រហម) បន្ទាប់ពីត្រូវបានដោះលែង ពីការឃុំខ្លួននៅថ្ងៃទី២១ ខែមករា។ (រូបថត MONOROOM.info/ O.Vary)
សិទ្ធិដីធ្លី - «វាមិនអាចដូចដើមទេ បើទោះបីជាពួកយើងទទួលបានដំណោះស្រាយពីរដ្ឋាភិបាលវិញក៏ដោយ តែយើងមិនទាន់បានយុត្តិធម៌នៅឡើយទេ ព្រោះយើងឈឺចាប់រាប់ឆ្នាំហើយ» នេះជាការរៀបរាប់របស់សកម្មជនតវ៉ាដីធ្លីដ៏ល្បីឈ្មោះ ពីសហគមន៍បឹងកក់។ អ្នកស្រី ទេព វន្នី ដែលបានតស៊ូមតិមិនចេះនឿយហត់់ ដើម្បីសិទ្ធិដីធ្លីរបស់សហគមន៍ បានពន្យល់ប្រាប់ទស្សនាវដ្ដីមនោរម្យ.អាំងហ្វូ ទៀតថា បើទោះបីជារដ្ឋាភិបាលធ្វើការដោះស្រាយ លើករណីនៃដីធ្លីរបស់សហគមន៍បឹងកក់ ដោយសមរម្យក៏ដោយ ក៏ការឈឺចាប់ពីភាពអយុត្តិធម៌មកលើអ្នកនៅតំបន់បឹងកក់ នៅតែដក់ជាប់មិនអាចបំភ្លេចបានឡើយ។
កន្លងមកឃើញថា នៅរាល់សកម្មភាពតវ៉ារបស់សកម្មជនដីធ្លីទាំងនោះ តែងទទួលរងនូវការបង្ក្រាបដោយហិង្សាពីសំណាក់កងកម្លាំងសមត្ថកិច្ច និងថែមទាំងមានការចាប់ខ្លួននោះទៀតផង។ កត្តាទាំងនេះ ធ្វើអោយគម្លាតនៃសេចក្តីទុកចិត្តរបស់ប្រជាពលរដ្ឋលើរដ្ឋាភិបាលសព្វថ្ងៃ កាន់តែមានទំហំធំឡើង ហើយបានអនុញ្ញាតអោយសកម្មជនដីធ្លីទាំងនោះ បន្ថែមការរិះគន់ទៅលើរដ្ឋាភិបាលកាន់តែខ្លាំងទ្វេឡើង។
«សេចក្ដីទុកចិត្ត»ដែលសម្រាប់ អ្នកស្រី ទេព វន្នី ផ្ទាល់បានអះអាងថា ដកចេញទាំងស្រុងតែម្តងទៅលើរដ្ឋាបាល ដឹកនាំឲ្យលោកនាយករដ្ឋមន្ត្រី ហ៊ុន សែន។ អ្នកស្រីនិយាយថា «ចង់អោយគាត់ចុះចេញ ហើយបោះឆ្នោតសារជាថ្មី (...) បើគាត់ជានាយករដ្ឋមន្រ្តីល្អគាត់គួរតែ រកដំណោះស្រាយអោយប្រជាពលរដ្ឋ»។
ទោះជាយ៉ាងណាក៏ដោយ សកម្មជនដីធ្លីរូបនេះ នៅតែរក្សាគោលជំហរ ចេញតវ៉ារកដំណោះស្រាយនិងរកយុត្តិធម៌សំរាប់សហគមន៍អ្នកស្រីដដែល។ អ្នកស្រីបន្ថែមឲ្យដឹងទៀតថា នៅសប្ដាហ៍ក្រោយ អ្នកភូមិបឹងកក់នឹងធ្វើការតវ៉ាឲ្យដោះលែងអ្នកទាំង២៣នាក់បន្តទៀត។
គួរបញ្ជាក់ថា កាលពីឆ្នាំ១៩៩៧ រដ្ឋាភិបាលបានចុះហត្ថលេខាជាមួយក្រុមហ៊ុន ស៊ូកាគូ វិនិយោគបឹងកក់ ចំនួន ៧៩លានដុល្លារ សម្រាប់រយៈពេល ៩៩ឆ្នាំ លើដី ១៣៣ហិកតា។ ពលរដ្ឋអតីតអ្នករស់នៅទីនោះមួយភាគ បានយល់ព្រមទទួលយកសំណង តែពលរដ្ឋមួយចំនួនទៀត មិនទទួលយកសំណងដែលពួកគេយល់ថា មិនសមរម្យនោះ ហើយបាននៅក្រាញននៀលមិនចាកចេញ និងបន្តការតវ៉ារបស់ពួកគេរហូតដល់សព្វថ្ងៃ៕
-----------------------------------------------
ដោយ ក. ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី ០៦ ខែកុម្ភៈ ឆ្នាំ២០១៤