«រាល់ការអភិវឌ្ឍន៍ពិតជាល្អ តែធ្វើយ៉ាងណាកុំឲ្យមានការប៉ះពាល់ដល់ដីប្រជាពលរដ្ឋ។ រដ្ឋាភិបាល ឬក្រុមហ៊ុន​ទាំង​នោះធ្វើការអភិវឌ្ឍន៍ ក្នុងទម្រង់ដីសម្បទាននឹងមានការរីកចំរើន បើមិនមានការប៉ះពាល់ដីប្រជាពលរដ្ឋ។ ហើយ​បើ​អភិវឌ្ឍន៍ប៉ះពាល់ដីប្រជាពលរដ្ឋ នោះមិនមានការរីកចំរើនទេ។» នេះជាកាលើកឡើងរបស់ពលរដ្ឋមួយរូប ដែល​ជា​ជនរងគ្រោះដោយការរំលោភដីធ្លី ដើម្បីដំណាំស្ករអំពៅ។

សន្និសីទសារព័ត៌មាន របស់តំណាងរាស្ត្រ​សភាអឺរ៉ុប លោក ប៉ាទ្រីក ទីរ៉ូឡែន (Patrice Tirolien) ថ្ងៃទី៣១ ខែមករា ឆ្នាំ២០១៤។ (រូបថត MONOROOM.info/ O.Vary)

សិទ្ធិលំនៅដ្ឋាន - លោក យឹម យៀវ តំណាងពលរដ្ឋមួយរូប មកពីភូមិជក់ ស្រុកស្រែអំបិល ខេត្តកោះកុង បានត្អូញ​ត្អែរថា ដីធ្លីរបស់​លោកផ្ទាល់ចំនួន១១ហិកតា ដែលរងការប៉ះពាល់នឹងគម្រោងអភិវឌ្ឍន៍តាំងពីឆ្នាំ២០០៦ រហូត​មក​ទល់នឹងពេលនេះ មានរយៈពេលប្រាំពីឆ្នាំហើយ នៅមិនមានដំណោះស្រាយ​​សោះឡើយ។ លោកបានរំលឹក​ថា «ក្រុមហ៊ុន​យក​គ្រឿងចក្រមកឈូសឆាយតែម្តង មិនមានការជូនដំណឹង ឬដោះស្រាយជាមួយប្រជាពលរដ្ឋ​ជាមុន​នោះឡើយ។ (…) ពេលឈូសឆាយនោះ បើមានសត្វគោក្របីចូលក្នុងតំបន់នោះ ក៏បានបាញ់សម្លាប់ចោល។»

ចំណែកលោក ផល វណ្ណៈ តំណាងសហគមន៍ស្ករអំពៅមកពីខេត្តកំពង់ស្ពឺ បានលើកឡើងពីផលប៉ះពាល់​នៃដំណាំ​អំពៅរបស់ក្រុម ហ៊ុន លី យ៉ុងផាត់ ក្នុងការទន្រ្ទានយកដីរបស់ពលរដ្ឋដោយខុសច្បាប់ ដែលជាការរំលោភសិទ្ធិ​មនុស្ស​យ៉ាងធ្វន់ធ្ងរ។ លោកបន្តរថា មុនឆ្នាំ២០១០ ប្រជាកសិករទាំងអស់រស់នៅដោយអាស្រ័យផល​លើដីស្រែចំការដោយ​សុខសប្បាយ។ តែចាប់ពីខែកុម្ភៈឆ្នាំ២០១០ ដោយមានសម្បទានដីសេដ្ឋកិច្ចទៅឲ្យក្រុមហ៊ុន លី យ៉ុងផាត់ ចំនួនពីរ​ម៉ឺន​ហិចតា។

លោកបានបន្តរថា នេះជាមូលហេតុបណ្តាលឲ្យមានការប៉ះពាល់ដល់ជីវភាព និងការរស់នៅរបស់ពលរដ្ឋរាប់​ពាន់​គ្រួសារ ដោយគ្មានស្រូវ«ជង្រុក»។ លោកបានបញ្ជាក់យ៉ាងដូច្នេះថា «អាជ្ញាធរបានប្រើកម្លាំង មកគម្រាមយកដី​ប្រជាពលរដ្ឋ។ (…) គ្មានសំណងសមរម្យ។ ផ្តល់ដីទួល គ្មានប្រភពទឹក ជាមួយនឹងការប្តឹងពួកយើងឡើងតុលាការ ព្រមទាំងចាប់ពួកយើងដាក់គុកទៀត។»

ការថ្លែងរបស់តំណាងពលរដ្ឋទាំងនេះ បានធ្វើឡើងនៅក្នុងក្នុងសន្និសីទសារព័ត៌មាន របស់តំណាងរាស្ត្រ​សភាអឺរ៉ុប លោក ប៉ាទ្រីក ទីរ៉ូឡែន (Patrice Tirolien) ពីយុទ្ធនាការលុបបំបាត់«ស្ករប្រឡាក់ឈាម» ក្នុងបេសកម្មរបស់​លោក​នៅកម្ពុជា។ មន្ត្រីសភាអ៊ឺរ៉ុប និងជាសមាជិកគណបក្សសង្គមនិយមបារាំងផងនោះ បានថ្លែង​ក្នុង​ឱកាស​នេះថា លោក​មកទស្សនកិច្ចប្រទេសកម្ពុជា ធ្វើការ​ស៊ើបអង្កេតលើករណីរំលោភសិទ្ធិមនុស្ស ដោយក្រុមហ៊ុនកសិឧស្សាហកម្ម មកលើប្រជាពលរដ្ឋកម្ពុជា។ ក្រុមហ៊ុនកសិឧស្សាហកម្ម ដែលទទួលបានការអនុគ្រោះ ពីការបញ្ជាទិញ​ដោយគោល​នយោបាយ​ពាណិជ្ជកម្មសហគមន៍អឺរ៉ុប។

បញ្ហាដីធ្លី មិនមែនកើតមានតែនៅតែខេត្តតែពីរខាងលើនោះទេ តែបានផ្ទុះឡើងយ៉ាងព្រោងព្រាតពាសពេញ ព្រះ​រាជាណាចក្រ។ តំណាងសហគមន៍ម្នាក់ទៀត មកពីស្រុកសំរោង ខេត្តឧត្តរមានជ័យ អ្នកស្រី ហ៊ួយ មៃ បាន​លើក​ឡើងក្នុងឱកាសនោះដែរថា ក្នុងឆ្នាំ២០០៨ ក្រុមហ៊ុនបានធ្វើការរំលោភបំពានដីរបស់អ្នកស្រីអស់គ្មានសល់ បើទោះ​ជាអ្នកស្រីខំស្វែងរក ការជួយអន្តរាគមន៍ពី​អាជ្ញាធរ​យ៉ាងណាក៏ដោយ ក៏នៅមិនមានដំណោះស្រាយអ្វីឡើយ រហូត​មកទល់នឹងបច្ចុប្បន្ន។ មិនត្រឹមតែប៉ុណ្នឹង អ្នកស្រីត្រូវបានអាជ្ញាធរចាប់ខ្លួនដាក់ពន្ធនាគារ​ ព្រោះតែបញ្ហានៃ​ទាមទារ និងការពារដីនេះថែមទៀត។

ជាមួយនឹងបេសកកម្មក្រៅផ្លូវការរបស់លោកលើកនេះ លោកបានធ្វើការស្រាវ និងពិនិត្យឃើញថា ប្រជាពលរដ្ឋ​កម្ពុជាជាច្រើនបានរងគ្រោះដោយការបណ្ដេញចេញដោយបង្ខំ ពីក្រុមហ៊ុនទាំងនោះ។ លោកបន្តរថាលោក​បាន​ចុះទៅដល់ទីកន្លែងកើតហេតុផ្ទាល់ជាមួយប្រជាពលរដ្ឋក្នុងខេត្តបី កំពង់ស្ពឺ កោះកុង និងឧត្តមានជ័យ។ លោកក៏​បានតំណាងក្រុមហ៊ុន អង្គការសង្គមស៊ីវិល សមាជិកបក្សប្រឆាំង និងបេសកជនសហគមន៍អឺរ៉ុបប្រចាំកម្ពុជា។ ដោយឡែកមន្ត្រីរដ្ឋាភិបាលលោកមិនបានជួបទេ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ជុំវិញបញ្ហាទាំងនេះពីមន្រ្តី​រដ្ឋាភិបាល និងពីតំណាងក្រុមហ៊ុន លីយ៉ុងផាត់ បាននៅឡើយនារសៀលថ្ងៃទី៣១ ខែមករានេះ។ រីឯ លោក ប៉ាទ្រីក ទីរ៉ូឡែន បានថ្លែងនៅក្នុងសន្និសីទ​នោះថា លោកក៏មិនបានជួបជាមួយមន្ត្រីរដ្ឋាភិបាលណាម្នាក់ដែរ ខណៈលោកបានជួបជាមួយតំណាងក្រុមហ៊ុន អង្គការសង្គមស៊ីវិល សមាជិកគណបក្សប្រឆាំង និងនិងបេសកជនសហគមន៍អឺរ៉ុបប្រចាំកម្ពុជាជាច្រើននោះ។

ទោះជាយ៉ាងណាក៏ដោយ ក៏ក្រុមអ្នកតំណាងប្រជាសហគមន៍រងគ្រោះទាំងអស់ នៅតែស្នើទៅដល់រដ្ឋាភិបាល​ឲ្យ​​រកដំណោះស្រាយដល់បញ្ហានេះ ជាពិសេសធ្វើការដាក់សម្ពាធលើក្រុមហ៊ុន។ ដោយឡែក លោក ប៉ាទ្រីក ទីរ៉ូឡែន វិញបានសន្យាថា លោកនឹងព្យាយាមជួយប្រជាពលរដ្ឋ​ទាំងនោះ តាមលទ្ធភាព​ដើម្បីបានដីធ្លីត្រឡប់មកវិញ៕

សូមអានអត្ថបទដែលទាក់ទងនឹងប្រធានបទ ដោយចុចលើទីនេះ។

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី៣១ ខែមករា ឆ្នាំ២០១៤