ក្រុមជនជាតិដើមភាគតិចគួយ នៅក្នុងស្រុកត្បែងមានជ័យ ខេត្តព្រះវិហារ បានរៀបរាប់ទុកលំបាករបស់ខ្លួន ប្រាប់​ក្រុមអ្នកសារព័ត៌មាន នៅពេលដែលក្រុមហ៊ុនវិនិយោគចិនចំនួន ២ គឺក្រុមហ៊ុន ឡានហ្វេង និង​ក្រុមហ៊ុន រូយហ្វេង បានរំលោភបំពានមកលើដីស្រែចម្ការរបស់ពួកគេ។ ក្រុមជនជាតិដើមទាំងនេះ បានស្នើឲ្យរដ្ឋាភិបាលកម្ពុជា ត្រូវ​ចាត់វិធានការជាបន្ទាន់ ដោយដកអាជ្ញាប័ណ្ណពីក្រុមហ៊ុនទាំងពីរនេះ កុំឲ្យវិនិយោគតទៅទៀត។

សន្និសិទសារព័ត៌ របស់តំណាងជនជាតិដើមភាគតិចគួយ នៅក្នុងមជ្ឈមណ្ឌលវប្បធម៌អាលឺម៉ង់ មេត្តាហៅស៍ (Meta House) ​នៅថ្ងៃទី២៨ ខែមករានេះ(រូបថត MONOROOM.info/ Thyrith)

ជនជាតិដើមភាគតិច - តំណាងប្រជាសហគមន៍ជនជាតិដើមភាគតិចគួយ ស្ថិតនៅក្នុងភូមិបុស្សធំ និងភូមិស្រែ​ព្រាង ឃុំប្រមេរភូមិ ស្រុកត្បែងមានជ័យ ខេត្តព្រះវិហារ មានគ្នាប្រមាណជាង ២០ នាក់ នៅថ្ងៃអង្គារទី ២៨ ខែធ្នូ នេះ បាន​ជួបជុំគ្នាធ្វើសន្និសិទកាសែត​នៅភ្នំពេញ ដើម្បីបង្ហាញពីក្តីកង្វល់របស់ពួកគេ ក្នុងគោលបំណងផ្ញើសារទៅ​រដ្ឋាភិបាល ឲ្យបញ្ឈប់សកម្មភាពផ្តល់ដីសម្បទានសេដ្ឋកិច្ច ដល់ក្រុមហ៊ុនវិនិយោគចិនចំនួន ២ គឺក្រុមហ៊ុន ឡានហ្វេង និង​ក្រុមហ៊ុន រ៉ូយហ្វេង ដែលបានរំលោភលើដីស្រែរបស់ជនជាតិភាគតិច។

នៅក្នុងសន្និសិទសារព័ត៌មួយ នៅក្នុងមជ្ឈមណ្ឌលវប្បធម៌អាលឺម៉ង់ មេត្តាហៅស៍ (Meta House) នារាជធានី​ភ្នំពេញ​នៅថ្ងៃទី២៨ ខែមករានេះ តំណាងជនជាតិដើមភាគតិចគួយ បានអំពាវនាវឲ្យរដ្ឋាភិបាលកម្ពុជា ត្រូវចាត់វិធានការឲ្យ​បានលឿន និង​លុបអាជ្ញាប័ណ្ណរបស់ក្រុមហ៊ុនចិនទាំងពីរ ដើម្បីទប់ស្កាត់ការរំលោភដីធ្លីរបស់ក្រុមហ៊ុនទាំងនេះ មក​លើដីស្រែ​ចម្ការរបស់សហគមន៍ជនជាតិដើមភាគតិចគួយ ដែលពេលនេះ ពួកគេកំពុងប្រឈមមុខនឹងការលំបាក​ក្នុងជីវភាព​រស់នៅ។

ស្រ្តីជនជាតិដើមភាគតិចមួយរូបអ្នកស្រី សាន់ បានមានប្រសាសន៍ប្រាប់អ្នកការសែតថា ក្រុមហ៊ុនចិន ឡានហ្វេង និង​ក្រុមហ៊ុន រ៉ូយហ្វេង បានប្រើប្រាស់គ្រឿងចក្រមកឈូសឆាយបំផ្លាញដីស្រែចំការ​របស់ជនជាតិដើមភាគតិច​ដែលកាន់​កាប់តាងពី ឆ្នាំ ២០០០ មក។ ការរលោភបំពានពីក្រុមហ៊ុនចិនទាំងពីរនេះ បច្ចុប្បន្ននេះ បានធ្វើឲ្យប៉ះពាល់ដល់ជន​ជាតិដើមភាគតិចចំនួន ៣៦៧ គ្រួសារ ដែលស្មើនឹងចំនួន ១៨៨០ នាក់នៅក្នុងភូមិបុស្សធំ និងភូមិស្រែព្រាង ឃុំប្រមេរ ស្រុកត្បែងមានជ័យ ខេត្តព្រះវិហារ ។

ស្រ្តីតំណាងជនជាតិដើមរូបនេះ ក៏បានរិះគន់ចំពោះប្រមុខរដ្ឋាភិបាលម្ពុជាផងដែរថា មុននឹងសម្រេចផ្តល់ដីសម្បទាន​ដល់ក្រុមហ៊ុនចិនទាំងពីរនេះមិនបានសិក្សាមើលពីផលប៉ះពាល់ទៅលើជនជាតិដើមភាគតិចគួយឲ្យបានច្បាស់លាស់ ដោយចេះស្តាប់ការរាយការណ៍កុហករបស់មន្រ្តីស្នាក់ក្រោមទាំងមិនបានពិចារណា។ អ្នកស្រី សាន់ បានស្នើឲ្យ​រដ្ឋាភិបាលត្រូវដោះស្រាយបញ្ហានេះ ដោយបញ្ឈប់សកម្មភាពផ្តល់អាជ្ញាប័ណ្ណដីសម្បទានសេដ្ឋកិច្ច ដល់ក្រុមហ៊ុន​ទាំងពីរនេះតទៅទៀត។

តំណាងជនជាតិដើមមួយរូបទៀត លោក គង់ សន្ធិយា បានស្តីបន្ទោសថា ក្រុមហ៊ុនរបស់ចិនទាំងពីរនេះ បានរំលោភ​ច្បាប់សិទ្ធិកាន់កាប់ដីធ្លីរបស់ជនជាតិដើមភាគតិច ដែលធ្វើឲ្យប៉ះពាល់ដល់សេដ្ឋកិច្ច បរិស្ថាន វប្បធម៌កន្លែងគោរព​សក្ការៈបូជារបស់ជនជាតិដើមភាគិតិចគួយ។ តំណាងជនជាតិដើមរូបនេះ បានអះអាងថា អាជ្ញាធរមិនបានពិភាក្សា​ជាមួយនឹងប្រជាពលរដ្ឋឡើយអំពីផលប៉ះពាល់ទាំងនេះ គឺធ្វើតាមតែចិត្តរបស់ខ្លួន ហើយជាពិសេសគឺអាជ្ញាធរ​ការពារ​ក្រុមហ៊ុនជានិច្ចនៅពេលដល់ពលរដ្ឋតវ៉ា។

សូមបញ្ជាក់ថា ក្រុមហ៊ុនចិន ឡានហ្វេង និងក្រុមហ៊ុន រ៉ូយហ្វេង ខេមបូឌា អ៊ីធើណេសិនណលខាំភើនី ត្រូវបាន​រដ្ឋាភិបាលចេញអនុក្រឹត្យផ្តល់ដីសម្បទានសេដ្ឋកិច្ចកាលពីឆ្នាំ ២០១១ ដោយក្រុមហ៊ុន ឡានហ្វេងទទួលបានដី​សម្បទានចំនួន ៩០១៥ ហិចតា និងក្រុមហ៊ុន រូយហ្វេង ចំនួន ៨៨៤១ ហិចតា ដើម្បីឲ្យធ្វើវិនិយោគដាំដំណាំកៅស៊ូ ដើមកាស្យា និងដើមអំពៅ ៕

-------------------------------------------------
ដោយ ជា ធីរិទ្ធ (ទំនាក់ទំនង៖ [email protected]) - ភ្នំពេញថ្ងៃទី ២៨ ខែមករា ឆ្នាំ២០១៤