សកម្មជនតវ៉ាដីធ្លីនៅសហគមន៍បុរីកីឡា អ្នកស្រីទឹម សាក់មុនី បានប្រតិកម្មខ្លាំងៗ ចំពោះអាជ្ញាធរដែលបានប្រើ​កម្លាំងធ្វើការបង្រ្កាប ទៅលើប្រជាពលរដ្ឋដែលធ្វើការតវ៉ា នៅទីលានប្រជាធិបតេយ្យ កាលពីថ្ងៃទី២៦ ខែមករានេះ។ ពលរដ្ឋរងគ្រោះ ដែលមានរូបអ្នកស្រីផ្ទាល់ម្នាក់ដែរ បានរងនូវការសំពងយ៉ាងចាស់ដៃ ពីក្រុមកងកម្លាំង​ទាំង​នោះ ដោយបាន​ចាត់ទុកប្រតិបត្តិការរបស់ពួកគេ គ្រាន់តែជាការរក្សាសណ្តាប់ធ្នាប់សង្គមប៉ុណ្ណោះ។

អ្នកស្រីទឹម សាក់មុនី សកម្មជនតវ៉ាទាមទារសិទ្ធិដីធ្លី មកពីសហគមន៍បូរីកីឡា។ (រូបថត MONOROOM.info/ O.Vary)

សិទ្ធិមនុស្ស - «គេប្រើសំដីថា មូលហេតុដែលគេធ្វើការបង្រ្កាប ដោយសារយើងមកឈរតវ៉ា ខូចសណ្តាប់ធ្នាប់​សាធារណៈ។ (...) ចុះដែលគេទៅឈូសឆាយផ្ទះប្រជាពលរដ្ឋ អោយនៅ​អណាធិបតេយ្យ នៅលើគំនរសម្រាម ឲ្យនៅរងទុក្ខ ចាប់និងសម្លាប់ហ្នឹង ជាសណ្តាប់ធ្នាប់របស់គេឬយ៉ាងណា?» នេះជាការលើកឡើងរបស់ អ្នកស្រី ទឹម សាក់មុនី ប្រតិកម្មទៅនឹងការឆ្លើយតបរបស់ក្រុមសន្តិសុខ ដែលបានប្រើអំពើហិង្សាលើអ្នកស្រី និងពលរដ្ឋ ដោយ​គ្រាន់តែឆ្លើយថា ជាការរក្សាសណ្តាប់ធ្នាប់។

អ្នកស្រីនិយាយថា ការធ្វើបាតុកម្មរបស់អ្នកស្រីក្នុងថ្ងៃនេះ គឺដើម្បីជួយរកយុត្តិធម៌អោយជនរងគ្រោះ ​ដែលត្រូវ​បាន​ចាប់​ខ្លួនទាំង២៣នាក់ និងទាមទារអោយមានដំណោះស្រាយ​លើបញ្ហាដីធ្លីរបស់​សហគមន៍អ្នកស្រី។ អ្នកស្រីថ្លែងថា «ខ្ញុំមកទីនេះដើម្បីរកខុស និងត្រូវ ខ្ញុំមិនបានបំពានលើគេនោះទេ»។

រស់ក្នុងនាមជាជនរងគ្រោះ និងស្ថិតក្រោមគំនាបនៃការគម្រាមកំហែង គ្រប់បែបយ៉ាងដែលតែងត្រូវបានគេធ្វើ ទៅ​លើសហគមន៏អ្នកស្រី និងសកម្មជនតវ៉ាទាមទារសិទ្ធិដីធ្លីដទៃទៀត ក្នុងរយៈពេលកន្លងមក វាបានធ្វើឲ្យក្រុមអ្នកស្រី លែងមានការភ័យរអានោះតទៅទៀត។ ផ្ទុយទៅវិញ វារឹតតែធ្វើឲ្យអ្នកស្រីយល់ថា «រដ្ឋាភិបាលធ្វើនេះ មិនមែន​ធ្វើ​ដើម្បី​រាស្រ្តខ្មែរនោះទេ គឺធ្វើដើម្បីបំបាត់ពូជខ្មែរហើយយកដីលក់។ គាត់មានលុយ តែអ្នកដែលរងទុក្ខវេទនា​គឺរាស្រ្ត​ខ្មែរ។»

សកម្មភាពរបស់រដ្ឋាភិបាលកម្ពុជាកន្លងមក ដែលបានធ្វើទៅលើសហគមន៍របស់អ្នកស្រី ឬការបង្ក្រាបទៅលើការ​ទាមទារនានានោះ វាកាន់តែបង្កការព្រួយបារម្ភដល់មជ្ឈដ្ឋានជនរងគ្រោះ ក៏ដូចជារូបអ្នកស្រីផ្ទាល់ ស្ដីពីស្ថានភាព​សិទ្ធិមនុស្សនៅកម្ពុជា។ អ្វីដែលអ្នកស្រីអាចធ្វើបានក្នុងពេលបច្ចុប្បន្ន មានតែស្នើទៅកាន់អន្តរជាតិ អោយជួយ​ឈឺ​ឆ្អាលនិងអន្តរាគមន៏ ដល់ប្រទេសកម្ពុជា អោយមានការគោរពសិទ្ធិមនុស្សឡើងវិញ ជាពិសេសរកដំណោះ​ស្រាយ​អោយជនរងគ្រោះពីការរំលោភដីធ្លី និងរកយុត្តិធម៌អោយជនដែលត្រូវបានចាប់ខ្លួនដោយគ្មានកំហុស។

អ្នកស្រីបាននិយាយថា «មានតែអស់លោក (អន្តរជាតិ) នេះទេ ​បើនៅតែអញ្ចឹងគេមានអំណាច មានកម្លាំង គេនៅ​តែចាប់អ្នកតវ៉ាដាក់គុក គេនៅតែធ្វើការបង្រ្កាប»។ ពាក្យថា«គេ» គឺអ្នកស្រីចង់សំដៅលើរដ្ឋាភិបាលលោកហ៊ុន សែន ដែលគ្រប់គ្រង់ប្រទេសកម្ពុជាជិត៣០ឆ្នាំ ក្រោមកណ្ដាប់ដៃដែក។

សកម្មជនដីធ្លីរូបន បានធ្វើការរិះគន់ចំៗទៅលើរដ្ឋាភិបាលថា «កន្លងមក ខ្ញុំមិនដែលឃើញ​គេរកសុខអោយ​ប្រជា​ពលរដ្ឋនោះទេ ឃើញតែធ្វើបាបរាស្រ្ត ជាពិសេសអ្នកបុរីកីឡា។ គេថាអភិវឌ្ឍន៍អោយអ្នកបុរីកីឡាអោយរស់ស្រួល និងរីកចម្រើន តែទីបញ្ចប់គេអោយក្រុមហ៊ុនធ្វើសំរាប់អោយប្រជាជន អោយអត់មានផ្ទះនៅ។ គេធ្វើបែបនេះ គេចង់​វាយម្តងមួយៗ សំលាប់ម្តងមួយៗ អោយអស់ ហើយគេធ្វើអញ្ចឹង ដើម្បីអោយអ្នកជំនាន់ក្រោយមិនហ៊ានចេញ​តវ៉ា​ទៀត៕»

-----------------------------------------------
ដោយ ក. ចាន់នីតា (ទំនាក់ទំនង៖ [email protected] )-ភ្នំពេញ ថ្ងៃទី ២៦ ខែមករា ឆ្នាំ២០១៤