ការសង្ស័យពីឯករាជ្យភាពនៃតុលាការកម្ពុជា ដែលមជ្ឈដ្ឋានទូទៅតែងតែចោទប្រកាន់ថា មានភាពលំអៀង និង​គ្រាន់តែជា«ម៉ាស៊ីនកាត់ក្ដី»របស់គណបក្សកាន់អំណាចនោះ ត្រូវបានបង្ហាញឲ្យយល់កាន់តែច្បាស់ឡើង តាម​រយៈការថ្លែងជាសាធារណៈដោយពាក្យសម្ដីប៉ុន្មានម៉ាត់ របស់នាយករដ្ឋមន្ត្រីកម្ពុជា លោក ហ៊ុន សែន។ ការថ្លែង​ដែលធ្វើឲ្យគេកាន់តែមើលឃើញថា បុរសខ្លាំងរូបនេះ មានឥទ្ធិពលយ៉ាងលើសលប់ ទៅលើស្ថាប័នយុត្តិធម៌នៃ​ព្រះរាជា​ណាចក្រ។

នាយករដ្ឋមន្ត្រីខ្មែរ លោក ហ៊ុន សែន។

នយោបាយកម្ពុជា - ថ្លែងជាសាធារណៈនៅក្នុងខេត្តក្រចេះ កាលពីថ្ងៃទី១៨ ខែមករាឆ្នាំ២០១៤ បុរសខ្លាំងដែល​ក្រុមប្រឆាំងចាត់ទុកជានាយករដ្ឋមន្ត្រីចាំផ្ទះ នៅប្រទេសកម្ពុជា បានបញ្ជាក់តាមពាក្យសម្ដីរបស់លោក ដែលធ្វើ​ឲ្យ​គេកាន់តែយល់ច្បាស់ខ្លាំងឡើង ពីឥទ្ធិពលរបស់មេដឹកនាំរូបនេះ ទៅលើប្រព័ន្ធតុលាការខ្មែរ។ ក្នុងពិធី​សម្ពោធ​អាគារ​ភូមិ អេសអូអេស លោក ហ៊ុន សែន បានធ្វើការវាយប្រហារដោយពាក្យសម្ដី ទៅលើគូបដិបក្ខនយោបាយ​របស់​លោក ទាក់ទងនឹងសកម្មភាពធ្វើបាតុកម្មនាពេលកន្លងមក ដោយលោកចាត់ទុកថា នោះបានផុតហួសពីអ្វី​ដែលច្បាប់​បាន​អនុញ្ញាត។

តែឆ្លងចេញពីពាក្យសម្ដីនោះ គេបានមើលឃើញពីការដាក់កំណត់របស់លោក ទៅលើ​ស្ថាប័ន​តុលាការ និង​បាន​ធ្វើ​ឲ្យស្ថាប័ន​មួយនេះ ក្លាយជាស្ថាប័នលំអៀង ចាំតែធ្វើតាមបញ្ជា និងមិន​មាន​ឆន្ទានុសិទ្ធ​​ដោយ​គតិយុត្តិ​ពិត​ដូច​ដែល​​ពលរដ្ឋ​​ទូទៅ​​ចង់​​បាន​​នោះ​​​ឡើយ។

លោក ហ៊ុន សែន បានលើកជាសំនួរ ទាក់ទងនឹងការធ្វើបាតុកម្ម-កូដកម្ម របស់ក្រុមកម្មករកន្លងមកថា «ហើយ​ហិង្សាកន្លងទៅ នរណាជាអ្នកទទួលខុសត្រូវ លើហិង្សា? (...) អ្នកណាបង្កហេតុ?»

នាយករដ្ឋមន្ត្រីចាស់វស្សា ដែលទទួលបានការបោះឆ្នោតទុកចិត្តជាថ្មី ពីរដ្ឋសភាឯកបក្សរូបនេះ បានឆ្លើយដោយ​ខ្លួន​ឯងថា «មេដឹកនាំ នាំគ្នាទៅបំផុសតាមរោងចក្រ ចូលក្នុងរោងចក្រគេ។ គេមិនចេញមក គម្រាមគេ វ៉ៃទ្វា វ៉ែអីគេ។ អ្នកណាអ្នកទទួលខុសត្រូវ?» ការលើកឡើងពី«មេដឹកនាំ»របស់លោក ហ៊ុន សែន ទំនងជាចង់សំដៅទៅលោក សម រង្ស៊ី និងលោក កឹម សុខា ដែលក្នុងពេលដែលក្រុមសហជីព និងក្រុមកម្មករចេញធ្វើបាតុកម្មជាបន្តបន្ទាប់នោះ មេ​ដឹក​នាំគណបក្សប្រឆាំងទាំងពីររូប បានចុះទៅជួបជាមួយក្រុមកម្មករ ដោយផ្ទាល់ ដូចជានៅតំបន់ឧស្សាហកម្មពិសេស នៅក្រុងបាវិត ជាប់ព្រំដែនវៀតណាម និងនៅតាមរោងចក្រនៅខេត្តកំពង់ចាមជាដើម។

ច្បាប់ដែលស្ថិតនៅពីក្រោយការយោគយល់របស់បុរសខ្លាំង !

បន្ទាប់មកលោក ហ៊ុន សែន ចាប់ផ្ដើមថ្លែងទាក់ទងនឹងប្រព័ន្ធតុលាការយ៉ាងដូច្នេះថា «អញ្ចឹងត្រូវហៅចូលតុលាការ។ បន្ធូរដៃហើយ ប៉ុណ្ណឹងនោះ។ (...) បើនិយាយឲ្យត្រឹមត្រូវតាមច្បាប់ (...) ត្រូវចាប់ខ្លួនភ្លាម ព្រោះនេះជាបទល្មើស​ជាក់​ស្ដែង។» ដែលធ្វើឲ្យគេយល់បានថា លោក ហ៊ុន សែន មិនបានប្រើប្រាស់វិធានការផ្លូវច្បាប់ពិតប្រាកដ ប្រឆាំង​មេដឹក​នាំប្រឆាំងនោះទេ តែជាវិធានការ«បន្ធូរដៃ»មួយតាមរបៀបលោក ដោយសារតែលោក ហ៊ុន សែន ចង់​បញ្ជាក់​ពីការ​យោគយល់។

តែអ្វីដែលធ្វើឲ្យអ្នកផងកាន់តែយល់ថា តុលាការកម្ពុជារងឥទ្ធិពលនយោបាយ ឬធ្វើតាមបញ្ជារបស់លោក ហ៊ុន សែន នោះ គឺនៅត្រង់ឃ្លារបស់បុរសខ្លាំងរូបនេះ និយាយថា «ហើយពេលចូលតុលាការហើយ តុលាការក៏មិនបាន​ចេញ​ដីការឃុំខ្លួនទេ។ សូមឲ្យយល់ផង កុំទទឹងទិស។» ពាក្យសម្ដីនេះ មានន័យថា តុលាការមិនមានឆន្ទានុសិទ្ធិផ្ទាល់ខ្លួន ក្នុងការឃុំខ្លួនឬផ្ដល់សេរីភាពទៅក្រុមមេដឹកនាំប្រឆាំងនោះទេ ដោយសារតែលោកហ៊ុន សែន ចង់ឲ្យមានការយោគ​យល់ ផ្នែកនយោបាយនោះសិន ឬនិយាយបែបផ្សេង តុលាការត្រូវរងចាំការបង្គាប់បញ្ជាពីលោក ហ៊ុន សែន ជាមុន ទើបអាចសម្រេចការឃុំខ្លួន ឬធ្វើការចោទប្រកាន់នរណាម្នាក់។

ភាពលំអៀងរបស់តុលាការកម្ពុជា ដែលអ្នកផងចោទប្រកាន់ថា ជា«ម៉ាស៊ីនកាត់ក្ដី»របស់គណបក្សកាន់អំណាចនេះ មិនមែនជារឿងថ្មីនោះទេ ដោយគ្រាន់តែពេលនេះលោក ហ៊ុន សែន បានធ្លោយមាត់និយាយចេញជាសាធារណៈ ដោយ​ខ្លួនលោក ហើយបានទម្លាយនូវមន្ទិលទាំងឡាយ ដែលមានកន្លងមកតែប៉ុណ្ណោះ។ ​ក្នុងសន្និសីទ​សារព័ត៌មាន​មួយ បន្ទាប់ពី​ចេញពីសាលា​ដំបូង​រាជធានី កាលពីថ្ងៃទី១៤ ខែ​មករា អនុប្រធានគណបក្ស​សង្គ្រោះ​ជាតិ លោក កឹម សុខា ក៏បានអះអាងដែរ ទាក់ទងនឹងឯករាជ្យភាព​របស់តុលាការ​នៅពេលនោះថា «ក្នុងសវនាការ​សាលា​ដំបូង​ព្រឹក​មិញនេះ ខ្ញុំ​សង្កេត​ឃើញ​ទឹក​មុខព្រះរាជអាជ្ញា និងក្រឡាបញ្ជី​ហាក់​បីដូចជា មានសំពាធនយោបាយ ពីមេ​ដឹកនាំ​ផ្ដាច់​ការ​គណបក្ស​ប្រជាជន​​កម្ពុជា»។

យ៉ាងណាក៏ដោយ ការចោទប្រកាន់របស់លោក ហ៊ុន សែន ខាងលើនេះ ធ្លាប់ត្រូវបានក្រុមមេដឹកនាំគណបក្ស​សង្គ្រោះជាតិ បកស្រាយរួចហើយថា ពួកលោកគ្រាន់តែជួយឈឺឆ្អាល និងគាំទ្រនូវអ្វីដែលក្រុមសហជីព និងក្រុម​កម្មករទាមទារប៉ុណ្ណោះ។៕

-------------------------------------------------
ដោយ ដារា រិទ្ធ (ទំនាក់ទំនង៖ [email protected]) - ភ្នំពេញ ថ្ងៃទី១៨ ខែមករា ឆ្នាំ២០១៤