បាតុកម្មបក្សសង្គ្រោះជាតិ នឹងត្រូវ«ផ្អាកមួយរយះ ឬផ្អាករហូត»?
រហូតមកដល់ថ្ងៃនេះ ពាក្យថា«បាតុកម្មនឹងត្រូវផ្អាកមួយរយះ»នេះ នៅមិនទាន់រកអត្ថន័យទាក់ទងនឹងកាលកំណត់ថាយ៉ាងដូចម្ដេចនោះនៅឡើយ ដោយសារសេចក្ដីប្រកាសព័ត៌មានមួយរបស់ក្រសួងមហាផ្ទៃ ចុះហត្ថាលេខាតាំងពីថ្ងៃសៅរ៍ទី០៤ ខែមករា បានហាមប្រាមការជួបជុំ ទោះនៅក្នុងរូបភាពធ្វើបាតុកម្មឬអ្វីក៏ដោយ រហូតដល់ស្ថានភាពត្រឡប់មករកភាពប្រក្រតីវិញ។
លោក កឹម សុខា ក្នុងមហាបាតុកម្មរបស់គណបក្សសង្គ្រោះជាតិរបស់លោក ថ្ងៃទី១៥ខែធ្នូឆ្នាំ២០១៣។ (រូបថត គណបក្ស)
នយោបាយកម្ពុជា - ថ្លែងទៅកាន់អ្នកចូលរួមប្រហែលមួយពាន់នាក់ កាលពីថ្ងៃទី ០៥ ខែមករាម្សិលមិញនេះ នៅទីស្នាក់ការរបស់គណបក្សសង្រ្គោះជាតិ ក្នុងពិធីបង្សុកូលរំលឹកវិញ្ញាណក្ខន្ធ ដល់កម្មករដែលបានបាត់បង់ជីវិតក្នុងពេលប៉ះទង្គិចជាមួយកងកម្លាំងរបស់អាជ្ញាធរ នោះមក លោក កឹម សុខា បានបញ្ជាក់ថា «រយះកាលចុងក្រោយនេះ យើងឃើញថាអំពើឃោឃៅបានកើតមានឡើង ហើយបងប្អូនវីរៈបាតុករយើងគោរពនូវអហឹង្សា ដោយមិនចង់ប្រឈមមុខនឹងអំពើហឹង្សា ដែលអ្នកកាន់អំណាចសព្វថ្ងៃ រិះរកមធ្យោបាយធ្វើមកលើប្រជាពលរដ្ឋយើង យើងនឹងមិនចូលអន្ទាក់ពួកជនឧក្រិដ្ឋផ្តាច់ការនេះទេ»។
កាលពីថ្ងៃសៅរ៍ ទី០៤ ខែមករា ឆ្នាំ២០១៤ កន្លងទៅ សមត្ថកិច្ចបានចាត់វិធានការក្តៅមួយដោយបណ្តេញ និងរុះរើរោងបន្ទាយបាតុកម្ម របស់បាតុករគណបក្សសង្គ្រោះជាតិ នៅឯទីលានប្រជាធិបតេយ្យ។ បន្ទាប់មក អាជ្ញាធរក៏បានដាក់កម្លាំងសមត្ថកិច្ច យាមកាមនៅតំបន់ជុំវិញទីនោះ យ៉ាងតឹងរ៉ឹងដែរ។ លោក កឹម សុខា បានអះអាងថា គណបក្សលោកបានផ្អាកការធ្វើបាតុកម្មមួយរយះសិន ដោយមិនចង់អោយបាតុករ មានការប្រឈមជាមួយកងកម្លាំងសមត្ថកិច្ចឡើយ។
លោក កឹម សុខា បាននិយាយថា «យើងមិនចង់ឃើញវិរៈបាតុករយើងស្លាប់ និងមិនចង់ឃើញឈាមខ្មែរហូរទៀតទេ អញ្ចឹងហើយបានជាយើងសុខចិត្ត សុំអោយវីរៈបាតុករដកថយមួយរយះសិន ដើម្បីរិះរកមធ្យោបាយសមរម្យ ដើម្បីតស៊ូតទៅទៀត»។
នៅក្នុងសេចក្ដីប្រកាសព័ត៌មានមួយ របស់ក្រសួងមហាផ្ទៃចុះនៅថ្ងៃទី០៤ ខែមករា ឆ្នាំ២០១៤ បានឲ្យដឹងថា «ការធ្វើបាតុកម្ម តាមរយៈការជួបជុំជាសាធារណៈ ឬការដង្ហែក្បួននានា ត្រូវផ្អាកជាបណ្ដោះអាសន្ន រហូតដល់សភាពការណ៍សន្តិសុខ និងសណ្ដាប់ឆ្នាប់សាធារណៈត្រូវបានធានា និងវិលមករកប្រក្រតីភាពឡើងវិញ»។ គេនៅមិនទាន់យល់ពីពាក្យ«ប្រក្រតីភាព»ដែលមានបញ្ជាក់ នៅលើសេចក្ដីប្រកាសនេះ នឹងមានអត្ថន័យយ៉ាងណានោះនៅឡើយ ព្រោះបើយោងតាមស្ថានការណ៍នយោបាយរបស់ប្រទេសកម្ពុជា ក្នុងបរិបទសព្វថ្ងៃ កាន់តែមានភាពតឹងតែងជាលំដាប់នោះ។ ដូច្នេះ បាតុកម្មដែលគណបក្សសង្គ្រោះជាតិបានបញ្ជាក់ថា នឹង«ផ្អាកមួយរយៈ»នោះ អាចនឹងមានរយៈពេលទៅតាមការបកស្រាយរបស់អាជ្ញាធរ គ្រប់គ្រងដោយរដ្ឋាភិបាល លោក ហ៊ុន សែន ដៃគូរបដិបក្ខនយោបាយមិនរីងស្ងួត របស់ក្រុមប្រឆាំងនោះ។
តែយ៉ាងណាក៏ដោយ ក៏អនុប្រធានគណបក្សប្រឆាំង លោក កឹម សុខា នៅតែបង្ហាញ ពីគោលជំហរបស់មេដឹកនាំគណបក្សសង្រ្គោះជាតិ គឺមិនថយក្រោយទេ។ លោកបន្តថា «យើងនឹងនូវតែរក្សាគោលជំហរទាមទាររកយុត្តិធម៌ និងការពារឆន្ទៈជូនប្រជារាស្រ្ត។ យើងមានវិធីច្រើនទៀតក្នុងការដោះស្រាយបញ្ហនេះ សូមអោយបងប្អូនប្រជាពលរដ្ឋ ចូលរួមជាមួយគណបក្សសង្រ្គោះជាតិបន្តទៅទៀត ដើម្បីទាមទារនូវយុត្តិធម៌។»
សូមបញ្ជាក់ថា ចាប់ពីថ្ងៃទី១៥ ខែធ្នូ ឆ្នាំ២០១៣ រហូតមកដល់ថ្ងៃទី០៤ ខែមករា ឆ្នាំ២០១៤នេះ គណបក្សសង្រ្គោះជាតិ បានរៀបចំធ្វើបាតុកម្មជារៀងរាល់ថ្ងៃ នៅឯទីលានប្រជាធិបតេយ្យ និងមានការដង្ហែក្បួន តាមដងវិថីនានាក្នុងរាជធានីភ្នំពេញផង ក្នុងគោលបំណងទាមទារ នូវគោលបំណងច្រើនយ៉ាង ក្នុងនោះមានដូចជា ទាមទារឲ្យលោក ហ៊ុនសែន ចុះចេញពីតំណែង និងស្នើឲ្យមានការបោះឆ្នោតឡើងវិញជាដើម។ នៅថ្ងៃអាទិត្យទី០៥ ខែមករាម្សិលម៉ិញ គណបក្សប្រឆាំងមួយនេះ ធ្លាប់បានប្រកាសត្រៀមរៀបំធ្វើមហាបាតុកម្មដ៏ធំមួយ តែក្នុងពេលឥឡូវ គម្រោងមហាបាតុកម្មនេះ បាននៅត្រឹមតែជាក្ដីសុបិន្តរបស់ក្រុមអ្នកគាំទ្រប៉ុណ្ណោះ៕
--------------------------------------------
ដោយ ៖ ក. ចាន់នីតា - ភ្នំពេញ ថ្ងៃទី០៦ ខែមករា ឆ្នាំ២០១៤
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ