ប្រធានគណបក្សសង្គ្រោះជាតិ លោក សម រង្ស៊ី បានបង្ហាញនូវការចាប់អារម្មណ៍របស់ខ្លួន ចំពោះវត្តមាន​នៃ​លោក ហ៊ុន សែន នៅក្នុងប្រទេសវៀតណាមថា លោក ហ៊ុន សែន បន្ទាប់ពីទៅប្រទេស«យួន»ប៉ុន្មានថ្ងៃ ត្រលប់​មកវិញ​ផ្ទុះអំពើហិង្សាតែម្តង។ ផ្ទុះហិង្សា ដែលបានបណ្តាលឲ្យមនុស្សយ៉ាងហោចណាស់ ៥ នាក់ បានស្លាប់បាត់បង់ជីវិត និងរងរបួសចំនួន ៣០ នាក់។

លោក សម រង្ស៊ី នៅមុខសំណាក់ព្រះអង្គចេកព្រះអង្គចម ក្រុងសៀមរាប-អង្គរ ថ្ងៃទី១០ ខែធ្នូ ឆ្នាំ២០១៣។ (រូបថត MONOROOM.info/ O. Vary)

នយោបាយកម្ពុជា -គ្រាន់តែឆ្នាំថ្មីឆ្នាំ ២០១៤ ឈានចូលមកដល់មិនបានប៉ុន្មានថ្ងៃផង កម្ពុជាបានរីកមុខល្បីសុស​សាយនៅពាសពេញសកលលោក។ ភាពល្បីល្បាញរបស់កម្ពុជាប្រាប់ទៅពិភពលោក គឺការកាប់សម្លាប់​បង្ហូ​ឈាម​ខ្មែរគ្នាឯង ដែលគ្មានជនណាមួយចេញមកទទួលខុសត្រូវនោះទេ ពោលគឺអ្នកស្លាប់ទាំងអយុត្តិធម៌ក្រៃពេក។ ការផ្ទុះ​ហិង្សាសម្លាប់ខ្មែរគ្នាឯងបែបនេះ សម្រាប់ក្រសែភ្នែកមេដឹកនាំគណបក្សសង្គ្រោះជាតិលោក សម រង្ស៊ី បានមើល​ឃើញថា​ កើតឡើងក្រោយពីលោក ហ៊ុន សែន ត្រលប់ពីប្រទេសវៀតណាមវិញ។

លោក សម រង្ស៊ី ប្រធានគណបក្សសង្គ្រោះជាតិ បានថ្លែងនៅក្នុងសន្និសិទការសែត នៅទីស្នាក់ការគណបក្ស​សង្គ្រោះជាតិនៅចាក់អង្រែលើ កាលពីម្សិលមិញដោយបាននិយាយចំអកនិងដៀមដាមឲ្យលោក ហ៊ុន សែន ថា «ខ្ញុំចាប់អាម្មណ៍ បន្ទាប់ពីលោក ហ៊ុន សែន ទៅយួន ហើយមកវិញបានប៉ុន្មានថ្ងៃផ្ទុះហិង្សាតែម្តង គាត់ទៅ​យួន​ឲ្យ​មិត្តគាត់ការពារ មិនដឹងថា មិត្តគាត់បានផ្តល់យោបល់អ្វីខ្លះទេ បានជាត្រឡប់មកវិញផ្ទុះអំពើហិង្សាតែម្តង»។

ប្រធានគណបក្សសង្គ្រោះជាតិរូបនេះបន្តថា អំពើហិង្សាដែលកើតឡើងនេះ មិនមែនភាគីទី ៣ មកពីណានោះទេ គឺមានតែភាគីទី ២ ភាគគីទី ២ គឺគណបក្សប្រជាជនកម្ពុជានេះឯង។ លោក សម រង្ស៊ី ក៏បានស្នើឲ្យសហគមអន្តរជាតិ បើកកការស៊ើបអង្កេតរក្នុងរឿងនេះ ឲ្យបានច្បាស់លាស់ផងដែរ។

ជុំវិញការលើកឡើងរបស់លោក សម រង្ស៊ី បែបនេះ លោក ជាម យៀប មន្រ្តីជាន់ខ្ពស់គណបក្ស​ប្រជាជនកម្ពុជា​បាន​ចាត់ទុកសម្តីរបស់លោក សម រង្ស៊ី ថា គ្មាននមូលដ្ឋានច្បាស់លាស់នោះទេ។ លោកថា រដ្ឋាភិបាលកម្ពុជា ដែល​ដឹក​នាំដោយគណបក្សប្រជាជនកម្ពុជា ជារដ្ឋាភិបាលឯករាជ្យ មិនស្តាប់បង្គាប់បរទេសណានោះឡើយ។

បណ្ឌិតរូបនេះ បាន​បដិសេធមិនអាចទទួលយកបាននោះទេចំពោះសម្តីរបស់លោក សម រង្ស៊ី។ ម្យ៉ាងវិញទៀត ទាក់​ទងនឹងការផ្ទុះហិង្សានេះ លោក សម រង្ស៊ី ទៅវិញទេ ដែលជាអ្នកបង្កឡើង ហើយត្រវទទួលខុសត្រូវ​ចំពោះមុខប្រវត្តិ​សាស្រ្តនូវអំពើដែលខ្លួនធ្វើ ព្រោះគណបក្សប្រជាជនកម្ពុជា មិនមានមានជាប់ពាក់ព័ន្ធទាល់តែសោះ។

សូមបញ្ជាក់ថា បើតាមរបាយការណ៍របស់អង្គការសិទ្ធិមនុស្សអាដហុក បានឲ្យដឹងថា ហិង្សាដែលបានកើត​ឡើង​រវាងអាជ្ញាធរ និងក្រុមអ្នកតវ៉ា នៅតាមបណ្តោផ្លូវវេងស្រេង សួនកាណាឌីយ៉ា កាលពីថ្ងៃទៅ ០៣ ខែមករា គិតត្រឹម​ថ្ងៃសៅរិ៍ទី ០៤ ខែមករា មានមនុស្សចំនួន ៥ នាក់ បានស្លាប់បាត់តបង់ជីវិត និងមនុស្សយ៉ាងហោចណាស់ ៣០ នាក់ បានរងរបួសធ្ញន់និងស្រាល។

ដោយឡែកក្រៅពីការបង្ក្រា​បនៅផ្លូវវេងស្រេងកាលពីថ្ងៃទី ០៣ ខែមករា នៅឯទីលានប្រជាធិបតេយ្យ ដែលជាទី​គណបក្សសង្គ្រោះជាតិធ្វើបាតុកម្មឯណេះវិញកាលពីម្សិលមិញ ក៏ត្រូវបានកងកម្លាំងរបស់លោក ហ៊ុន សែន មាន​ស៊ីវិល និងប្រដាប់ដោយអាវុធ ប្រមាណជាង ១ ពាន់នាក់បើកយុទ្ធនាការបោះសម្អាតបាតុករ និងសម្ភារៈនៅទីនោះ​អស់រលីង មិនឲ្យគណបក្ស​នេះធ្វើបាតុកម្មបន្តទៀត។ ការបំបែកមិនឲ្យធ្វើបាតុកម្មនៅទីលានប្រជាធិតេយ្យនេះ ត្រូវ​បានអ្នកសិទ្ធិមនុស្ស អ្នក​ច្បាប់ចាត់ទុកថា ជាការរំលោភច្បាប់ និងរំលោភសិទ្ធិមនុស្សនៅកម្ពុជាយ៉ាងធ្ញន់ធ្ញរ និងធ្វើ​ឲ្យលិទ្ធិប្រជាធិបតេយ្យ​ដើរ​ថយក្រោយ៕

-----------------------------------------
ដោយៈ ជា ធីរិទ្ធ - ភ្នំពេញថ្ងៃទី ០៥ ខែមករា ឆ្នាំ២០១៤
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ