បើគេចង់រកដំណោះស្រាយជូនកម្មករ គេពិតជាអាចរកបាន។ នោះគឺត្រូវលប់បំបាត់អំពើពុករលួយ សូកប៉ាន់ក្រោម​តុ និងបំបាត់ចោលនូវភាគហ៊ុន«ខ្យល់» ដែលភាគហ៊ុនទាំងនោះ គ្រាន់តែឈរជាជំហរឲ្យរោងចក្រ តែអង្គុយចាំ​យក​តែប្រាក់ចំណេញពីរោងចក្រមកវិញ។ នេះជាការលើកឡើង របស់មន្ត្រីអង្គការសង្គមស៊ីវិលមួយរូប ដែលធ្វើការ​ស្និត​នឹងសំនុំរឿង ជាពិសេសទាក់ទងនឹងសិទ្ធិកម្មករ។

ក្រុមកម្មករធ្វើបាតុកម្មនៅខាងមុខក្រសួងការងារ លើវិថីសហព័ន្ធរ៉ូស្ស៊ី កាល់ពីថ្ងៃទី៣១ខែធ្នូឆ្នាំ២០១៣។  (រូបថត MONOROOM.info/O.Vary)

វិបត្តិការងារ - ការតម្លើងប្រាក់ខែ១៦០ដុល្លា នៅជាបញ្ហាដែលស្មុកស្មាញ ពិបាកក្នុងការដោះស្រាយ រហូតមកទល់​ពេលនេះ។ ក្រុមកម្មករដែលកំពុងធ្វើបាតុកម្ម-កូដកម្ម បានប្រកាសនូវគោលជំហរបស់ខ្លួន ម្ដងហើយម្ដងទៀតថា បើមិនបាន១៦០ដុល្លា ពួកគេនឹងមិនព្រមបញ្ឈប់បាតុកម្ម-កូដកម្មឡើយ។ ចំណែកឯរដ្ឋាភិបាលកម្ពុជាឯណោះវិញ បានបង្ហាញជំហរតាមរយៈសេចក្ដីថ្លែងការណ៍ ឬនៅតាមការផ្ដល់សម្ភាសទៅអ្នកសារព័ត៌មានថា ការតម្លើង​ប្រាក់​ខែ​កម្មករ រហូតដល់១៦០ដុល្លារក្នុងឆ្នាំ២០១៤នេះ នឹងមិនអាចទៅរួចនោះទេ ហើយក៏គ្មានប្រទេសណា ដែលតម្លើង​ប្រាក់ខែកម្មករ ម្តងមួយរយភាគរយនោះដែរ។

ប៉ុន្តែសម្រាប់ លោកអំ សំអាត ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្សលីកាដូវិញ បាន​អះអាង​ថា បើគេចង់មានដំណោះស្រាយទាក់ទងបញ្ហនេះ ប្រាកដជាអាចធ្វើបាន។ លោកបានពន្យល់ ប្រាប់ទស្សនាវដ្ដី​មនោរម្យព័ងអាំងហ្វូថា៖ «ខ្ញុំគិតថាការដោះស្រាយវា អាចធ្វើទៅបានបើរដ្ឋាភិបាលអាច លុបបំបាត់ការសូក​លុយ​ក្រោមតុ និងកុំអោយមានភាគហ៊ុនខ្យល់នៅក្នុងរោងចក្រ។ ភាគហ៊ុនខ្យល់នេះមានន័យថា មនុស្សដែលឈឈ្មោះ នៅក្នុងរោងចក្រ ឬអ្នកដែលចាំការពារោងចក្រ ក៏អាចទទួលភាគលាភនៅក្នុងរោងចក្របានដែរ។ បើយើង​យក​លុយ​ទាំងអស់នេះ មកចំណាយនោះលើប្រាក់ខែកម្មករ នោះវានឹងអាចធានាបាននូវប្រាក់ខែ ១៦០ដុល្លា។»

ដូច្នេះអ្វីដែលលោក អំ សំអាត បានពោលឡើងនេះ ជាបញ្ហាដែលប្រទេសកម្ពុជាខ្លួនឯង បានជាប់ជំពាក់ដោះស្រាយ​មិនចេញ នោះគឺអំពើ«ពុករលួយ»ដ៏ស្អុយអាសោធខ្លាំងជាងគេបង្អស់ ក្នុងចំណោមបណ្ដាប្រទេសអាស៊ាន និងល្បី​ឈ្មោះរហូតជាប់ចំណាត់ថ្នាក់លេខពីរ នៅអាស៊ីទាំងមូល បន្ទាប់ពីប្រទេសកុម្មុយនីស កូរ៉េខាងជើង។ នេះបើគេ​ពិនិត្យ​មើលតួលេខ ផ្ដល់ដោយអង្គការតម្លាភាព​អន្តរជាតិ ដែលមានទីស្នាក់ការនៅទីក្រុងប៊ែកឡាំង ប្រទេស​អាឡឺម៉ង់ កាលពីដើមខែធ្នូកន្លងមក។ បើដូច្នេះ គេត្រូវ​ស្វែងយល់ទៀតថា តើពិតជាអំពើពុករលួយនេះឬ ដែលធ្វើឲ្យ​រដ្ឋាភិបាល​រាទឹកក្ដៅ មិនអាចលើកតម្កើងជីវភាព​របស់​កម្មករ តាមរយៈប្រាក់ឈ្នួលរបស់ពួកគេ?

លោក អំ សំអាត បានពន្យល់បន្តទៀតថា ប្រទេសកម្ពុជាជាប្រទេសដែលកំពុងអភិវឌ្ឍន៏ ហើយក៏សមាជិក នៃ​អង្គការពាណិជ្ជកម្មពិភពលោកដែរ ពន្ធនៃការនាំចេញមួយចំនួន ត្រូវបានលើកលែង។ លោកបន្តថា «យើងឃើញ ថាប្រទេសកម្ពុជាត្រូវបានអនុគ្រោះ យើងនាំចេញទៅដោយមិនគិតពន្ធ។ (...) បើយើងក្រលេកទៅមើល ប្រទេស​ជិតខាងយើងឃើញថា ប្រាក់ខែគោលមិនមែន៩៥ដុល្លាទេ គឺវាអាចដល់១៥០ ទៅ១៦០ដុល្លាឯណោះ។ ហេតុអី​បាន​ជាប្រទេសវៀតណាម និងប្រទេសជិតខាងអាចធ្វើបាន ចុះហេតុអីកម្ពុជាមិនអាចធ្វើបាន?»

ពាក់ព័ន្ធនិងរឿង«ពុករលួយស៊ីរូងសង្គម»នេះ ទស្សនាវដ្ដីមិនអាចសុំការស្រាយបំភ្លឺ ពីតំណាងរដ្ឋាភិបាលកម្ពុជា បានទេនៅថ្ងៃទី០១​ ខែមករា ឆ្នាំ២០១៤នេះ ដោយសារតែជាថ្ងៃបុណ្យឈប់សម្រាក។ ប៉ុន្តែ«ការប្តេជ្ញាចិត្ត»ជាថ្មី របស់​រដ្ឋាភិបាលរបស់លោក ហ៊ុន សែន អាណត្តិនេះ បានថ្លែងលើកឡើងពីការកែទម្រង់«ស៊ី»ជម្រៅ ទាក់ទង​នឹង​ការបំបាត់អំពើពុករលួយ ដូចបានបង្ហាញក្នុងយុត្តិសាស្រ្ត​«ចតុកោណដំណាក់​កាល​ទីបី» ដែលបានសន្យា​ថានឹង​ពង្រឹងអភិបាលកិច្ចល្អ និងគណនេយ្យភាពក្នុងស្ថាប័នសាធារណៈ រួមទាំងការដោះ​ស្រាយ​ នូវរាល់ទម្រង់​នៃអំពើ​ពុករលួយទាំងអស់។

យ៉ាងណាក៏ដោយ ក៏ការសង្កេតជាទូទៅ បានធ្វើឲ្យគេឃើញថា «ការប្ដេជ្ញាចិត្ត»ខាងលើ ទំនង​ជាត្រូវប្រើរយៈ​ពេល​​«ច្រើន»អាណត្តិទៅមុខទៀត ដោយសារតែក្នុងអាណត្តិមុនៗ ជានិច្ច​ជាកាលគេក៏តែងតែលឺសូររួច​ហើយដែរ នូវ​ការ​ប្ដេជ្ញាចិត្តរបៀបនេះ។ តើនោះ វាដូចទៅនឹងអ្វីដែល​ក្រុម​អ្នករិះ​គន់​តែងលើកមកនិយាយថា ជា«ការ​ប្ដេជ្ញាចិត្ត​»​នៃ​យុទ្ធសាស្ត្រអភិវឌ្ឍន៍«ជំហានគីង្គក់» ដែលត្រូវប្រើ​រយៈពេល​ជា​ច្រើនខែឆ្នាំ មុននឹងលោតមួយ​ជំហានទៅមុខ?

រាល់អត្ថបទដែលទាក់ទងនឹងប្រធានបទ «ពុករលួយ» អាចរកអានបាននៅលើខ្សែភ្ជាប់ទីនេះ៕

--------------------------------------------------
ដោយ៖ ក. ចាន់នីតា - ភ្នំពេញ ថ្ងៃទី៣១ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ