«សូមកុំយល់ច្រលំថា អ្វីៗទាំងអស់គណបក្សសង្គ្រោះជាតិជាអ្នកចាប់ផ្តើម។ (...) ដូចករណីកម្មករធ្វើបាតុកម្ម គឺ​កម្មករខ្លួនគាត់ គាត់តវ៉ាដើម្បីផលប្រយោជន៍ខ្លួនគាត់។ អាហ្នឹងឲ្យយល់ច្បាស់! តែក្នុងនាមយើងជាអ្នក​ស្រលាញ់​ជាតិ ស្រលាញ់ប្រជាពលរដ្ឋ គោរពប្រជាពលរដ្ឋ ជាអ្នកការពារឆន្ទៈប្រជាពលរដ្ឋ គោរពសិទ្ធិសេរីភាពប្រជាពលរដ្ឋ យើងត្រូវតែគោរពសិទ្ធិប្រជាពលរដ្ឋដើម្បីធ្វើអ្វី បំរើ និងការពារនូវសិទ្ធិសេរីភាពរបស់ពួកគាត់ ហើយយើងតែងតែ​អំពាវនាវ​គាត់ឲ្យអហិង្សា។» នេះជាសម្ដីរបស់មេដឹកនាំគណបក្សសង្គ្រោះជាតិ ឆ្លើយតបទៅនឹងការលើកឡើង​របស់​លោក អ៊ិត សំហេង រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ដែលបានចោទប្រកាន់កាល​ពីថ្ងៃ​ទី២៧ ខែធ្នូ ម្សិលម៉ិញនេះនៅទីស្តីការក្រសួងការងារថា បាតុកម្មរបស់កម្មករទាំងអស់នេះ មានការនាំមុខដោយ​គណបក្ស​នយោបាយ។

លោក កឹម សុខា (ខាងឆ្វេង) និងលោក សម រង្ស៊ី នៅក្នុងសន្និសីទការសែតរបស់គណបក្សសង្គ្រោះជាតិ ថ្ងៃទី២៨ ខែធ្នូ ឆ្នាំ២០១៣។ (រូបថត MONOROOM.info/ O.Vary)

បាតុកម្មកម្មករ - ជាមួយនឹងការកើនឡើងនៃបាតុកម្មយ៉ាងគំហ៊ុក របស់កម្មករនិយោជិក ក្នុងពេលប៉ុន្មានថ្ងៃមុន​ជាប់ៗគ្នានេះ ត្រូវបានលោក អ៊ិត សំហេង រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា ធ្វើការចោទ​ប្រកាន់ថា មានការពាក់ព័ន្ធនឹងរឿងនយោបាយ។ ក្នុងការធ្វើបាតុកម្មរបស់កម្មករទាំងអស់ នាពេលកន្លងមកមាន​ការលូកដៃចូល ដោយគណបក្សនយោបាយ។ លោកបានលើកឡើងយ៉ាងដូច្នេះថា «ជាក់ស្តែងយើងឃើញថា ថ្នាក់ដឹកនាំនៃគណក្សនយោបាយ បានទៅតំបន់កម្មករ ហើយធ្វើការប្រមូលបងប្អូនកម្មករមក។ ក្នុងនោះ មានទាំង​សកម្មជនបានដើរអុកឡុក ដើម្បីអូសទាញកម្មករមកចូលរួមបាតុកម្ម។»

ឆ្លើយតបនឹងការលើកឡើង របស់លោក អ៊ិត សំហេង ខាងលើ លោក កឹម សុខា អនុប្រធានគណបក្ស​ប្រជាជន​កម្ពុជាបានពន្យល់ «បាតុកម្ម ជាសកម្មភាពសម្តែងនូវបាតុភូតណាមួយ ដែលស្ថាប័នរដ្ឋមិនបានធ្វើការដោះស្រាយ និងរកយុត្តិធម៌ជូនប្រជាពលរដ្ឋ។ (...) បើស្ថាប័នរដ្ឋទាំងអស់នោះចេះដោះស្រាយបញ្ហា ជូនប្រជាពលរដ្ឋ នោះនឹង​មិនមានបាតុកម្មទេ។ បាតុកម្មជាការបង្ហាញនូវប្រតិកម្មអ្វីមួយ ដែលសំដៅឆ្ពៅទៅរកស្ថាប័នរដ្ឋ ដែលជាអ្នកកាន់​អំណាច ដើម្បីស្វែងរកដំណោះស្រាយជូនប្រជាពលរដ្ឋវិញ។»

ជាមួយគ្នានេះប្រធានគណបក្សសង្គ្រោះជាតិ លោក សម រង្ស៊ី បានសង្កត់ធ្ងន់ថា «យើងមិនចាំបាច់ទៅញុះញង់ និង​ក៏មិនចាំបាច់់ទៅដាស់អ្នកណាដែរ។ (...) តែថ្ងៃរះមនុស្សម្នាក់ៗគេងើប គេភ្ញាក់ដោយខ្លួនគេ។ (...) ថ្ងៃរះជាការយល់​ដឹង​របស់មនុស្ស។ ថ្ងៃរះជាការរះក្នុងអារម្មណ៍ យើងភ្លឺ យើងភ្ញាក់ យើងមានមនសិការជាតិ និងមនសិការសង្គម​ដែល​កំពុងតែផុសផុល។ (...) អំណាចផ្តាច់ការសម្លាប់មនសិការទាំងពីរនេះ ដែលជាការសម្លាប់វិញ្ញាណជាមុស្ស។ (...) បើគ្មានវិញ្ញាណទាំងពីរនេះទេ នោះមនុស្សគិតតែពីប្រយោជន៍ខ្លួន ចង់បានសុខតែម្នាក់ឯង។ (...) សម រង្ស៊ី និង កឹម សុខា មិនអាចបង្កើតមនសិការទាំងពីរនេះ ក្នុងចិត្តមនុស្សបានទេ។ (...) ហើយមនសិការទាំងពីរនេះ កើតមានដោយ​ឯកឯង ចំពោះមនុស្សម្នាក់ៗ ឬអ្នកណាដែលមានឆន្ទៈគិតពីប្រយោជន៍ជាតិ ប្រយោជន៍សង្គម និងប្រយោជន៍ប្រជា​ពលរដ្ឋជារួម។»

តែទោះជាយ៉ាងណាក៏ដោយ លោក អ៊ិត សំហេង ក៏បានធ្វើការថ្គោលទោស និងព្រមានទៅលើក្រុមបាតុកម្ម ឬថ្នាក់​ដឹកនាំបាតុកម្មណា ដែលបង្ករឲ្យមានអំពើហិង្សាកើតឡើង ហើយធ្វើឲ្យខូចខាតដល់ទ្រព្យសម្បត្តិសាធារណៈ និង​ឯកជន។ លោកថា ការធ្វើបាតុកម្មត្រូវតែគោរពច្បាប់។ ហិង្សាទាំងឡាយត្រូវតែបញ្ជៀសឲ្យឆ្ងាយ ហើយនិងមិន​គាំ​ទ្រ​ឲ្យមាន នូវអំពើហិង្សាទាំងអស់ជាបន្តរនោះដែរ។ លោកបានបញ្ជាក់យ៉ាងដូច្នេះថា «យើងនឹងធ្វើការត្រួតពិនិត្យ ស៊ើបអង្កេត ដើម្បីដោះស្រាយតាមផ្លូវច្បាប់ រាល់ករណីហិង្សាទាំងឡាយ ដែលបានកើតនៅតាមកន្លែងនានា​មួយ​ចំនួន។»

ឯលោកសម រង្ស៊ី បានបញ្ជាក់បន្ថែមថា រាល់បាតុកម្ម«ពិត»តែងតែធ្វើឡើង ដោយអហិង្សាជានិច្ច។ គ្រប់បាតុករ​អហិង្សាទាំងអស់ តែងតែធ្វើឡើងដោយការគោរពទៅតាមច្បាប់ និងអហិង្សាជាអ្នកនាំមុខ។ លោកបានបន្តថា តែ​ផ្ទុយមកវិញ បើកើតមានអំពើហិង្សា នោះមិនមែនជាការបង្ករឡើងដោយបាតុករអហិង្សា (អ្នកទាមទារយុត្តិធម៌ពិត) ទេ តែ (វា) ពិតជាបង្កឡើងដោយកម្លាំងទី«បី»មួយផ្សេងទៀត ដែលបានកើតចេញពី«កម្លាំងទីពីរស្ទួន»។ «គ្មានក្រុម​ទីបីទេ។ មានតែក្រុមទីពីរស្ទួន។ ដែលក្រុមនេះ កើតចេញពីរដ្ឋាភិបាលផ្ទាល់តែម្តង។ (...) ដូចជាករណីបំផ្ទុះគ្រាប់​បែក​នៅមុខរដ្ឋសភា ការសម្លាប់លោកជាវិជ្ជា និងលោក ឈុត វុទ្ធីជាដើម។»

-------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៨ ធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ