បន្ទាប់ពីក្រសួងការងារបានប្រកាសជាផ្លូវការថា សហភាពសហជីពកម្ពុជា ជាសហជីពខុសច្បាប់មក លោក រ៉ុង ឈុន ដែលជាប្រធានសហភាពសហជីពកម្ពុជា បានបដិសេធថាសហជីពរបស់លោកមិនខុសច្បាប់នោះទេ និងចាត់​ទុកការសម្រេច របស់ក្រសួងនៅក្នុងកាលៈទេសៈនេះ ថាមានលក្ខណៈនយោបាយ។

លោក រ៉ុង ឈុន ប្រធានសមាគមន៍គ្រូបង្រៀនកម្ពុជាឯករាជ្យ។ (រូបថត MONOROOM.info/ O.vary)

វិស័យការងារ - ក្នុងកិច្ចសម្ភាសជាមួយទស្សនាវដ្តីមនោរម្យព័ងអាំងហ្វូ នៅថ្ងៃទី២៥ ខែធ្នូ ឆ្នាំ២០១៣ ប្រធាន​សហភាពសហជីពកម្ពុជា (CCU) លោក រ៉ុង ឈុន បានពន្យល់ថា ក្រសួងការងារមានចរិតលក្ខណៈរើសអើង ព្រោះ​កន្លងសហជីពរបស់លោកបានទៅចុះបញ្ជីនៅក្រសួងការងារដែរ តែត្រូវបានក្រសួងនេះបដិសេធដោយគ្មាន​ហេតុផល។

ជុំវិញការចោទប្រកាន់ថា សហភាពសហជីកម្ពុជាខុសច្បាប់នោះ ត្រូវបានលោក រ៉ុង ឈុន បញ្ជាក់ថា៖ «វាជា​ការ​ចម្លែកដែលក្រសួងកន្លងមកមិនចោទប្រកាន់ តែបែជាមកចេញលិខិតចោទប្រកាន់នៅពេលនេះ (...)។ ការចេញ​លិខិតនេះមានការបំភ័ន្ដ(...)។ តែវា(CCU) មិនខុសច្បាប់ទេ ទោះមិនចុះបញ្ជីក៏យើងអាចធ្វើសកម្មភាពបានដែរ ក្នុង​ការការពារយុត្តិធម៌ មិនបាច់ចុះបញ្ជីទេ វាស្របទៅនឹងអនុសញ្ញាអង្គការពលកម្មអន្តរជាតិ។ ហើយក្នុង​រដ្ឋធម្មនុញ្ញ​ក៏មិនបាននិយាយថា សមាគមត្រូវតែចុះបញ្ជីដែរ អញ្ចឹងសំខាន់គឺការពារយុត្តិធម៌ និងការគាំទ្រពីប្រជាពលរដ្ឋ។»

សូមរម្លឹកថាក្រសួងការងារ និងបណ្តុះបណ្តាលវិជ្ជាជីវៈកម្ពុជា តាមរយៈសេចក្តីប្រកាសព័ត៌មានមួយសម្លឹក ចុះថ្ងៃ​ទី​២៥ ខែធ្នូ ឆ្នាំ២០១៣ បានបញ្ជាក់ថា៖ «សហភាពសហជីពកម្ពុជា(CCU) ដែលលោក រ៉ុង ឈុន អះអាងថាជាប្រធាន​នោះ ពុំមែនជាសហជីពស្របច្បាប់ដែលបានចុះបញ្ជីការ នៅក្រសួងការងារ និងបណ្តុះបណ្តាលវិជ្ជាជីវៈនោះទេ ពីព្រោះថាសហភាពសហជីពនេះ ពុំមាននីតិសម្បទាគ្រប់គ្រាន់ ដើម្បីបានការទទួលស្គាល់តាម​ផ្លូវច្បាប់ពីក្រសួង​ឡើយ។ ដូច្នេះ រាល់សកម្មភាព និងរាល់សេចក្តីថ្លែងការណ៍ណាមួយរបស់លោក រ៉ុង ឈុន គឺមិនមែនតំណាងឲ្យ​សម្លេងកម្មករនិយោជិតនោះទេ។»

ការចេញសេចក្តីប្រកាសព័ត៌មាន របស់ក្រសួងការងារនៅពេលនេះ ត្រូវបានមជ្ឈដ្ឋានទូទៅកត់សម្គាល់ថា កើត​ឡើង​តែមួយថ្ងៃ ក្រោយការអំពាវនៅទីលានប្រជាធិបតេយ្យរបស់លោក រ៉ុង ឈុន ដល់កម្មករ-កម្មការនី ឲ្យធ្វើ«កូដកម្ម»​ទាំងអស់គ្នា ជាមួយគណបក្សសង្រ្គោះជាតិ ដើម្បីទាមទារឲ្យតម្លើងប្រាក់ខែគោល ១៦០ដុល្លារសហរដ្ឋអាមេរិក​ ក្នុង​មួយខែ។

ក្នុងការអំពាវនាវនោះលោក រ៉ុង ឈុន បានបញ្ជាក់ថា៖ «ខ្ញុំឲ្យកម្មករទៅមួយជំហ៊ានមុន បន្ទាប់មក ខ្ញុំនឹងអំពាវនាវ​ដល់គ្រូទូទាំងប្រទេស មន្រ្តីរាជការទូទាំងប្រទេសឲ្យកូដកម្មឈប់ធ្វើការ ដើម្បីទាមទារបៀវត្យរ៍សមរម្យ(...)។ បើ​យើងចង់បានអភិបាលកិច្ចល្អ គឺត្រូវតែដោះស្រាយបៀវត្យរ៍នឹងហើយ តែបើក្រពះនៅតែស្រេកឃ្លាន យើងមិនអាច​មានការអប់រំប្រកបដោយគុណភាពបានទេ៕»

នេះជាសេចក្ដីប្រកាសរបស់ក្រសួងការងារ ចេញផ្សាយនៅថ្ងៃទី២៥ខែធ្នូនេះ៖

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី២៥ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ