ស្របពេលដែលមហាតុកម្មអហិង្សា របស់គណបក្សសង្រ្គោះជាតិ ដែលទាមទារឲ្យលោកនាយករដ្ឋមន្រ្តី ហ៊ុន សែន ចុះចេញពីដំណែង និងរៀបចំការបោះឆ្នោតមុនអាណត្តិឡើងវិញ កំពុងមានភាពផុសផុលយ៉ាងរពើតរំពើងនោះ ក្រុម​អ្នកតំណាងរាស្រ្តគណបក្សប្រជាជនកម្ពុជា មិនត្រឹមតែគាំទ្រគោលជំហរបស់លោក ហ៊ុន សែន ដែលបានបដិសេធ​ការចុះចេញពីដំណែង និងការរៀបចំបោះឆ្នោតឡើងវិញតាមការទទូចរបស់គណបក្សសង្រ្គោះជាតិនោះទេ តែថែម​ទាំងចោទប្រកាន់សកម្មភាពរបស់គណបក្សជំទាស់នេះថាជា«រដ្ឋប្រហារ»នោះផងទៀត។ តែសម្រាប់អ្នកច្បាប់​បាន​ពន្យល់ថា សកម្មភាពរបស់គណបក្សសង្រ្គោះជាតិ មិនមែនជារូបភាពនៃការធ្វើ»រដ្ឋប្រហារ»នោះទេ។

រដ្ឋសភានិងអ្នកតំណាងរាស្ត្រពីគណបក្សប្រជាជនកម្ពុជា ថ្ងៃទី២៣ខែកញ្ញា មុនអាគាររដ្ឋសភា។ (រូបថត MONOROOM.info/ O.vary)

នយោបាយកម្ពុជា - ក្រុមអ្នកតំណាងរាស្ត្រគណបក្សប្រជាជនកម្ពុជា ចំនួន ៤២ រូបតាមរយៈ ញ្ញតិមួយដែលមាន​ចុះ​ហត្ថលេខា ផ្ទាល់ដៃ ចុះថ្ងៃទី២០ ខែធ្នូ ឆ្នាំ២០១៣ ហើយត្រូវបានអគ្គលេខាធិការដ្ឋានរដ្ឋសភា ទម្លាយឲ្យអ្នកការសែត​ដឹង នៅថ្ងៃទី២៣ ធ្នូ ឆ្នាំ២០១៣ បានបង្ហាញការគាំទ្រ«មិនងាករេ» របស់ក្រុមអ្នកតំណាងរាស្ត្រ​គណបក្ស​ប្រជាជន​កម្ពុជា ចំពោះ​គោល​ជំហរបស់លោកនាយករដ្ឋមន្ត្រី ហ៊ុន សែន ដែលបានទាត់ចោលសំណើររបស់​គណបក្ស​សង្រ្គោះ​ជាតិ។

ខ្លឹមសារក្នុងញត្តិដដែលនោះ ក្រុមអ្នកតំណាងរាស្ត្រគណបក្សប្រជាជនកម្ពុជា នីតិកាលទី៥ នៃរដ្ឋសភា បាន​ប្រកាស​គាំទ្រ ឥតងាករេ និងឥតលក្ខខណ្ឌ ចំពោះប្រសាសន៍របស់ លោក ហ៊ុនសែន ដែលបានបញ្ជាក់ក្នុង​កិច្ចសម្ភាស​ជា​មួយអ្នកសារព័ត៌មាន កាលថ្ងៃទី២០ ខែធ្នូ ឆ្នាំ២០១៣ ថា គ្មានការបោះឆ្នោតជាតិឡើងវិញទេ ហើយក៏គ្មានការ​ចុះ​ចេញ​ពីតំណែងផងដែរ។ ញត្តិដដែលបានស្នើឲ្យក្រុមប្រជំទាស់ ពិនិត្យមើលរដ្ឋធម្មនុញ្ញ ដែលបានកំណត់ថា នីតិកាល​របស់​រដ្ឋសភាមានកំណត់ ៥ ឆ្នាំ រដ្ឋសភាមិនអាចត្រូវបានរំលាយមុនផុតអាណត្តិបានឡើយ លើកលែងតែក្នុងករណី ដែល​រាជរដ្ឋាភិបាល ត្រូវបានទម្លាក់ពីរដងក្នុងរយៈពេល ១២ ខែ។

សូមអានអត្ថបទដែលទាក់ទងនឹងរដ្ឋធម្មនុញ្ញ ដោយចុចលើទីនេះ។

ឆ្លើយតបចំពោះការទាមទាររបស់គណបក្សសង្រ្គោះជាតិ ញ្ញតិនោះបានបញ្ជាក់ថា៖ «ពាក្យគ្មានសីលធម៌ និងសុំឲ្យ​បោះឆ្នោតតំណាងរាស្ត្រនីតិកាលទី៥ ម្តងទៀត យ៉ាងយូរដើមឆ្នាំ២០១៤ ខាងមុខ គឺជាអំពើធ្វើ"រដ្ឋប្រហារ"សុទ្ធសាធ ដែលមិនអាចប្រកែកបានឡើយ»។ ញត្តិរបស់ក្រុមតំណាងរាស្ត្រ ដែលសម្រេចចូលបង្កើតសភា តែបក្សខ្លួនតែមួយ​នោះ បាន​ព្រមានថា៖ «យើងខ្ញុំជាតំណាងរាស្ត្រ របស់គណបក្សប្រជាជនកម្ពុជា សូមធ្វើការគាំទ្រ​ដាច់អហង្ការ​ចំពោះ​ប្រសាសន៍សម្តេច ហ៊ុនសែន (...)។ រាជរដ្ឋាភិបាល នឹងមិនអនុញ្ញាតឲ្យទង្វើខុសច្បាប់ណាមួយ មកបង្កអស្ថិរភាព សម្រាប់ប្រជាពលរដ្ឋនោះឡើយ។ ហើយកន្លងមករាជរដ្ឋាភិបាល បានអត់ធ្មត់ជាខ្លាំង ដោយគោរពបាននូវសិទ្ធិ​ប្រជាពលរដ្ឋ ក្នុងការធ្វើបាតុកម្មដោយសន្តិវិធី។»

ជុំវិញករណីនេះទស្សនាវដ្តីមនោរម្យព័ងអាំងហ្វូមិនអាចទាក់ទងមន្រ្តីអ្នកនាំពាក្យ របស់គណបក្សសង្រ្គោះជាតិ​ដើម្បី​ធ្វើការអត្ថាធិប្បាយបានទេ។ តែបើយោងលើលោក សុខ សំអឿន ប្រធានអង្គការក្រុមអ្នកច្បាប់ការពារសិទ្ធិកម្ពុជា និងជាអ្នកវិភាគនយោបាយឯករាជ្យបានលើកឡើងថា បើទោះជាក្នុងហេតុផលណាមួយ ឬហេតុផលនយោបាយ​ក៏​ដោយ គេមិនអាចចោទប្រកាន់មហាបាតុកម្ម​ប្រកាន់ភ្ជាប់គោលការណ៍អហិង្សា ដែលដឹកនាំដោយ​គណបក្ស​នយោបាយ​​ណាមួយ ថាជា«រដ្ឋប្រហារ»បានទេ។ ហើយការវាយតម្លៃ ថាសកម្មភាពណាមួយជា«រដ្ឋប្រហារ» និង​ត្រូវ​ដោះស្រាយយ៉ាងដូចម្តេចនោះ គឺកាត្វកិច្ចរបស់រដ្ឋាភិបាល និងមន្រ្តីជំនាញដែលពាក់ព័ន្ធ៕

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី២៣ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ