បើទោះជាគណបក្សសង្រ្គោះជាតិបានអះអាងថា មហាបាតុកម្មដែលកំពុងដំណើរការទៅមុខ ជាមួយភាពពុះ​កញ្រ្ជោល​នេះ នឹងប្រព្រឹត្តទៅដោយអហិង្សាយ៉ាងណាក្តី ក៏ចលនានេះបានជម្រុញឲ្យមជ្ឈដ្ឋានទូទៅ និងកងកម្លាំង​សមត្ថកិច្ចសម្តែងការព្រួយបារម្ភពីបញ្ហាដែលអាចកើតឡើងជាយថាហេតុ និងទទូចឲ្យគណបក្សជំទាស់នេះ​ផ្តល់​ការសហការជិតស្និតជាមួយសមត្ថកិច្ចពាក់ព័ន្ធ។

កងកម្លាំងប្រដាប់អាវុធ ធ្វើការហ្វឹកហាត់នៅលើទីលានប្រជាធិបតេយ្យ។ (រូបថត MONOROOM.info/ C.Thyrith)

សុវត្ថិភាពសន្តិសុខ - អ្នកនាំពាក្យកងរាជអាវុធហត្ថជាតិលោក ខេង ទីតូ ក្នុងកិច្ចសម្ភាសជាមួយ​ទស្សនាវដ្តី​មនោរម្យព័ងអាំងហ្វូនៅថ្ងៃទី១៦ ខែធ្នូ ឆ្នាំ២០១៣ នេះបានលើកឡើងថា នៅពេលនេះសមត្ថកិច្ចបាន​ត្រៀម​លក្ខណៈគ្រប់គ្រាន់ សម្រាប់ធ្វើការសហការជាមួយគណបក្សសង្រ្គោះជាតិ ដើម្បីធ្វើយ៉ាងណាឲ្យមហាបាតុកម្ម​អហិង្សា​របស់គណបក្សជំទាស់នេះ អាចប្រព្រឹត្តទៅជាប្រក្រតី ជៀសវាងបាននូវការប៉ះទង្គិចណាមួយ។

អ្នកនាំពាក្យដដែលនេះបន្តថា ប្រសិនបើគណបក្សសង្រ្គោះជាតិ និងបាតុករគោរពតាមគោលការណ៍ច្បាប់ ស្តីពី​ការធ្វើបាតុកម្មដោយអហិង្សា និងធ្វើកិច្ចសហការល្អជាមួយសមត្ថកិច្ចពាក់ព័ន្ធ នោះវាមិនមានបញ្ហាអ្វី​កើតឡើង​នោះទេ។ តែបើមានជនខិលខូច ឬជនឆ្លៀតឱមានកាសបង្កចលាចល ដែលនាំឲ្យមានការប៉ះពាល់ដល់​សណ្តាប់​ធ្នាប់​សាធារណៈ និងសន្តិសុខសង្គម ឬការបំផ្លិចបំផ្លាញទ្រព្យសម្បត្តិឯកជន និងទ្រព្យសម្បត្តិសាធារណៈណាមួយ សមត្ថកិច្ចនឹងមានកម្លាំងអន្តរាគមន៍«ពិសេស» សម្រាប់គ្រប់គ្រងស្ថានការណ៍នោះភ្លាម។

ជុំវិញបញ្ហានេះ ទស្សនាវដ្តីមនោរម្យព័ងអាំងហ្វូមិនអាចទាក់ទង អ្នកនាំពាក្យគណបក្សសង្រ្គោះជាតិ ដើម្បីសុំ​ការ​អត្ថាធិប្បាយ​បានទេ។ តែបើយោងលើគោលជំហររបស់គណបក្សនេះ កាលពីពេលកន្លងមក បានអះអាងថា មហាតុកម្មរបស់គណបក្សសង្រ្គោះជាតិ ដែលទាមទារឲ្យមានការបោះឆ្នោតឡើងវិញនេះ គឺប្រកាន់យក​ភាព​អហិង្សា ដោយមិនយកខ្មែរណាជាសត្រូវនោះទេ។

ចំពោះការប្រកាសធ្វើមហាបាតុកម្មអហិង្សា ក្នុងរយៈពេលវែងរបស់គណបក្សសង្រ្គោះជាតិនៅពេលនេះ ត្រូវបាន​អ្នកតាមដានស្ថានការណ៍នយោបាយកម្ពុជា សម្តែងការព្រួយបារម្ភពីផលប៉ះពាល់ដល់សេដ្ឋកិច្ចគ្រួសារ និង​សេដ្ឋកិច្ច​ជាតិ និងលទ្ធភាពនៃការផ្ទុះអំពើហិង្សារវាងបាតុករ និងសមត្ថកិច្ច។ អ្នកតាមដានស្ថានការណ៍ដដែលនេះ លើកឡើងថា គណបក្សប្រជាជនកម្ពុជា និងគណបក្សសង្រ្គោះជាតិ គួរពន្លឿនការចរចា ឬការសម្រេចចិត្ត​នយោបាយណាមួយឲ្យបានឆាប់ ដើម្បីបិទបញ្ចប់ការជាប់គាំងនយោបាយ ក្រោយការបោះឆ្នោតដ៏ចម្រូង​ចម្រាស​នេះ។

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី១៦ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ