ជារឿងដែលមិនគួរឲ្យជឿបាន តែវាបានធ្វើឲ្យមានការរំជួលចិត្ត សម្រាប់បណ្ដាជនទូទៅ ដែលបានដឹងរឿងនេះ។ កុមារី​ម្នាក់ទើបនឹងមានអាយុ១០ឆ្នាំ ត្រូវបានចោទប្រកាន់ថា បានសម្លាប់ទារកអាយុ១ឆ្នាំកន្លះ ដោយបានបោះ​ទារក​តូចនេះ ពីជាន់ទី២៥នៃអាគារស្នាក់នៅមួយ ក្នុងក្រុងចុងគីង (Chongqing) ស្ថិតនៅផ្នែកនិរតីនៃប្រទេសចិន។

រូបភាព ដែលគេមើលឃើញនៅលើវីដេអូសុវត្ថិភាព ដែលដាក់ក្នុងទោងយន្ដ។ (រូបផ្ដិតពីវិដេអូ)

ជារឿងដ៏រន្ធត់ និងខ្លោចផ្សារជាទីបំផុតសម្រាប់គ្រួសារជនរងគ្រោះ។ គេហទំព័រព័ត៌មានមួយឈ្មោះ Shanghaiist បានរាយការណ៍ថា កុមារីអាយុ១០ឆ្នាំ ត្រូវបានចោទប្រកាន់ថា បានសម្លាប់ទារកមួយរូប អាយុទើបនឹង១ខួបកន្លះ ដោយបានបោះទារកនោះ ចេញពីតាមរាលហាននៃជាន់ទី២៥។ តើមានរឿងហេតុអ្វីបានកើតឡើងពិតប្រាកដ ?

គេហទំព័រដដែល ដែលបានប្រមូលបានភស្ដុតាងជារូបភាពនៃម៉ាស៊ីនថតសុវត្ថិភាព បានសរសេរឲ្យដឹងថា ទារក យ័នយ័ន បានធ្វើដំណើរជិះទោងយន្ដនៅក្នុងអាគារជាមួយម្ដាយរបស់ខ្លួន។ ប៉ុន្តែម្ដាយទារកបានទុកទារក​ប៉ុន្មាន​វិនាទីប៉ុណ្ណោះ ដើម្បីគាត់អាចយករទេះកង់ពណ៌បៃតងចេញពីខ្លួន។ រំពេចនោះ កុមារីបានប្រជ្រៀតចូល​ទៅក្នុង​ទោងយន្ដនោះ មុននឹងទ្វាទាំងគូររបស់ទោងយន្ដបានបិត ដែលធ្វើឲ្យទារកនិងម្ដាយ បានបែកផ្ដាច់ពីគ្នាទាំងស្រុង។

កុមារីបើកការវាយតប់លើទារក

នៅក្នុងទោងយន្ដ រូបភាពវីដេអូបានបង្ហាញថា កុមារីអាយុ១០ឆ្នាំរូបនេះ បានទទួលមក ពរ ទារកតូចប៉ុន្មានវិនាទីដេរ ចាប់ពីម្ដាយវាចេញពីផុតទៅបន្តិច ហើយបន្ទាប់មក បានបោះទារកទៅលើដី មុននឹងចាប់ផ្ដើម«ទាត់ធាក់»ទារកយ៉ាង​ខ្លាំងក្លា។ គេហទំព័រចិនបានបន្ថែមទៀតថា បន្ទាប់ពីទាត់ធាក់ទារក ចេញទៅក្រៅទោងយន្ដ ដែលស្ថិតនៅជាន់ទី២៥​រូចហើយ គេបានជឿជាក់ថា កុមារីបានបោះទារកចេញពីអាគារ។

ហេតុការណ៍ដ៏រន្ធត់នេះ ក៏ត្រូវបានសារព័ត៌មានរបស់ប្រទេសអង់គ្លេស ឈ្មោះ ដែល្លីមែល (Daily Mail) យកមកចុះ​ផ្សាយឲ្យដឹងដែរថា ការភ្ញាក់ផ្អើលបានកើតឡើងភ្លាមៗនោះ ហើយដានស្នាមប្រឡាក់ទៅដោយឈាម ត្រូវ​បាន​រក​ឃើញយ៉ាងច្រើន នៅក្បែររូបរាងស្ដូកស្ដឹងរបស់ទារក។ ដែល្លីមែល បានបញ្ចាក់ថា បើទោះជា​គេ​បាន​បញ្ជូនទារក​ទៅ​កាន់មន្ទីរពេទ្យ ដែលនៅ​ជិតនោះយ៉ាងឆាប់រហ័សក៏ដោយ តែ យ័នយ័ន បានលាចាកលោក​ទៅ​ហើយ ដោយសារ​តែ​ទារកមិនអាចទ្រាំទ្របាន នឹងមុខរបួស​ដែលមានលើខ្លួន យ៉ាងដំណំនោះ។ ផ្ទុយទៅវិញ ទីភ្នាក់ងារ​សារព័ត៌មានចិន ស៊ីនហួរ បានរាយការណ៍ថា ទារកនោះបានដឹងខ្លួនមកវិញ ហើយមានស្ថានភាពនៅនឹងនៅឡើយ។

របាយការណ៍របស់ ស៊ីនហួរ បានឲ្យដឹងទៀតថា ឪពុកម្តាយកុមារី ដែលមានត្រកូល លី បានផ្តល់សំណងទៅក្រុម​គ្រួសារទារក ចំនួន៥៨ពាន់យន់រួចហើយ តាមរយៈនគរបាល។

ឪពុកកុមារី បានបដិសេធថា កូនស្រីរបស់គាត់ មិនបានបោះទារកចេញពីរាលហាល នៃជាន់ទី ២៥ នោះទេ ហើយ​ថាកូនស្រីរបស់គាត់ ជាអ្នកស្រឡាញ់កូនក្មេង និងសត្វមួយរូប។ ប៉ុន្តែបញ្ហាខាងលើ ទំនងអាចបណ្ដាលមកពី «បញ្ហ​ទំនាក់ទំនង»។ នៅ​ពេលលោកសួរកូនស្រីលោកថា តើហេតុអី បានជានាងវាយទារក កុមារីឆ្លើយថា មកពីទារក​សម្លក់ និងដូចជាបានបង្ហាញការ​ខឹង​សម្បារដាក់នាង។

រីឯការស៊ើបអង្កេតរបស់នគរបាល បានបង្ហាញថា នាងប្រហែលជាបានទាត់ ទារកនោះមែន ប៉ុន្តែទំនងជា​«មិនមាន​ចេតនា បោះទារកនោះចេញពីរាលហាល»ឡើយ។ សូមបញ្ជាក់ដែរថា កុមារីមិនត្រូវបានគេឃុំខ្លួនទេ ដោយសារ​នាងជាអនិតិជន​ តែត្រូវបានគ្រួសារនាង ជម្លៀសនាងឲ្យទៅរស់ក្នុងខេត្តមួយផ្សេងទៀត ជាមួយម្ដាយរបស់នាង។

សូមទស្សនាវីដេអូនេះ (តែហាមកុមារអាយុក្រោម១៦ឆ្នាំ ឬអ្នកដែលមានអារម្មណ៍មិននឹងនរ ទស្សនា)៖

--------------------------------------------------
ដោយ ៖ ឈូករ័ត្ន - ប៉ារីស ថ្ងៃទី០៤ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ