ខណៈវិបត្តិនយោបាយថៃកំពុងមានភាពរំពើតរំពើងខ្លាំង ដោយហេតុថាមហាបាតុកម្មរបស់គណបក្សជំទាស់ថៃ ដែលមានគោលបំណង​ចុងក្រោយផ្តួលរំលំរដ្ឋាភិបាល កំពុងអង្រួនក្រុងបាងកកឲ្យកក្រើកនោះ បានជម្រុញឲ្យ​មជ្ឈដ្ឋានទូទៅនៅកម្ពុជាមានចម្ងល់ថា តើមហាបាតុកម្មរបស់គណបក្សជំទាស់កម្ពុជានៅពេលខាងមុខនេះ អាច​មានរូបភាព និងមានឥទ្ធិពលខ្លាំងដូចប្រទេសថៃដែរឬទេ? ជុំវិញបញ្ហានេះ ត្រូវបានអ្នកវិភាគឯករាជ្យ លើកឡើង​ថា​មហាបាតុកម្មនៅកម្ពុជា មិនអាចដូចថៃនោះទេ ព្រោះលក្ខខណ្ឌ និងស្ថានភាពនយោបាយរបស់​ប្រទេសទាំងពីរ​មិន​ដូចគ្នា?

ទិដ្ឋភាពបាតុកម្ម មើលពីក្រោយមេដឹកនាំគណបក្សសង្គ្រោះជាតិ លោក សម រង្ស៊ី (ខាងឆ្វេង) និងលោក កឹម សុខា។ (រូបថត គណបក្ស)

នយោបាយ - អ្នកវិភាគនយោបាយឯករាជ្យកម្ពុជា លោក សុខ ទូច បានថ្លែងប្រាប់ទស្សនាវដ្តីមនោរម្យព័ងអាំងហ្វូ នៅថ្ងៃ២៧ ខែវិច្ឆិកា ឆ្នាំ២០១៣ ថាវិបត្តិនយោបាយនៅប្រទេសថៃ មិនអាចមានផលប៉ះពាល់ខ្លាំងដល់​ប្រទេស​កម្ពុជា​នោះទេ ហើយគម្រោងមហាបាតុកម្មរបស់គណបក្សជំទាស់កម្ពុជា នៅពេលឆាប់ៗខាងខាងមុខនេះ ក៏មិន​អាច​មាន​រូបភាព ដូចមហាបាតុកម្មរបស់គណបក្សជំទាស់ថៃ ដែលកំពុងធ្វើនៅទីក្រុងបាងកកនោះទេ ព្រោះមាន​ហេតុផល​សំខាន់ៗ៣ចំណុច៖

ទី១. អ្នកនយោបាយរបស់គណបក្សជំទាស់កម្ពុជា ពុំទាន់មានភាពចាស់ទុំ និងពុំទាន់មានយុទ្ធសាស្រ្តគ្រប់គ្រាន់ ក្នុងការធ្វើបាតុកម្មទ្រង់ទ្រាយធំនោះទេ។

ទី២. គណបក្សជំទាស់របស់ប្រទេសកម្ពុជា ពុំទាន់មានលក្ខណៈសម្បត្តិគ្រប់គ្រាន់ដូចគណបក្សជំទាស់​របស់​ប្រទេស​ថៃ ខណៈលិទ្ធិប្រជាធិបតេយ្យរបស់ប្រទេសថៃ ក៏មានភាពល្អប្រសើរជាងនៅកម្ពុជាផងដែរ។

ទី៣. គណបក្សជំទាស់របស់កម្ពុជាពុំមានថវិការ ធនធានមនុស្ស (..) គ្រប់គ្រាន់ ហើយក៏ពុំទាន់បានត្រៀម​លក្ខណៈ​គ្រប់គ្រាន់សម្រាប់គ្រប់គ្រងប្រទេស ក្នុងករណីទទួលបានជ័យជំនះ។

នៅពេលសួរថា តើរដ្ឋាភិបាលកម្ពុជា អាចមានការអត់ធ្មត់ ឬចាត់វិធានការក្នុងកម្រិតណា ប្រសិនបើមហាបាតុកម្ម​អហិង្សារបស់គណបក្សសង្រ្គោះជាតិ ដែលគ្រោងនឹងធ្វើនៅថ្ងៃទី១០ធ្នូ មានការរីរាលដាល ដូចមហាបាតុកម្មនៅ​ប្រទេសថៃនោះ? អ្នកវិភាគនយោបាយដដែលនេះ ហាក់ដូចជាមានការស្ទាក់ស្ទើរ ក្នុងការអត្ថាធិប្បាយ តែលោក​បានបញ្ជាក់ខ្លីថា៖ «ខ្ញុំគិតថា មិនមានបញ្ហាដល់ថ្នាក់ណ្នឹងទេ»។

អនុប្រធានគណបក្សសង្រ្គោះជាតិ លោក កឹម សុខា បានថ្លែងប្រាប់វិទ្យុសម្លេងសហរដ្ឋអាមេរិក (ផ្សាយជាខេមរ​ភាសារ) នៅថ្ងៃទី២៦ ខែវិច្ឆិកា ឆ្នាំ២០១៣នេះថា ក្នុងការទាមទារឲ្យលោកនាយករដ្ឋមន្រ្តី ហ៊ុន សែន ចុះចេញពី​តំណែង ទោះករណីណាក៏ដោយ គណបក្សជំទាស់របស់លោកដាច់ខាតមិនប្រើប្រាស់អំពើហិង្សានោះទេ។

អនុប្រធានគណបក្សជំទាស់រូបនេះបញ្ជាក់ថា៖ «បើសុំគាត់ចុះដោយកិត្តិយស ខ្ញុំគិតថាប្រហែល​ជាប្រជា​ពលរដ្ឋ​នៅ​គោរពគាត់ហើយ យើងនឹងកសាងប្រទេសបានល្អប្រសើរ។ តែបើសិនជាគាត់ចុះមិនចុះក៏ដោយ គណបក្ស​សង្គ្រោះ​ជាតិក៏មិនមានការប្រើប្រាស់អំពើហិង្សាដែរ»។ តែលោក កឹម សុខា មិនធ្វើអត្ថាធិប្បាយ ចំពោះយុទ្ធសាស្រ្តបន្ទាប់​របស់​គណបក្សលោកនោះទេ ជាពិសេសក្នុងករណីដែលលោកនាយករដ្ឋមន្រ្តី ហ៊ុន សែន នៅតែមិនព្រមចុះចេញពី​តំណែង​នោះ។

ទាក់ទងនងនឹងការជាប់គាំងនយោបាយកម្ពុជាក្រោយការបោះឆ្នោតនេះ រដ្ឋមន្រ្តីការពារជាតិកម្ពុជា លោក ទៀ បាញ់ ក្នុងពេលអញ្ជើញជាអធិបតី ទទួឧទ្ធម្ភាគចក្រពីប្រទេសចិន កាលពីពេលថ្មីនេះ បានថ្លែងប្រាប់អ្នកសារព័ត៌មានថា កងទ័ពកម្ពុជាបានបានត្រៀម«លក្ខណៈសម្បត្តិ»រួចជាស្រេច ក្នុងការការពាររដ្ឋធម្មនុញ្ញ។

ជុំវិញករណីនេះ អ្នកតាមដានស្ថានការណ៍នយោបាយកម្ពុជា បានអះអាងថា វិបត្តិនយោបាយ និងបាតុកម្មនៅកម្ពុជា ពិតជាមិនដូចប្រទេសថៃនោះទេ ព្រោះកន្លងមកគ្រាន់តែបាតុករកម្ពុជាបាតុកម្មតាមដងផ្លូវ ត្រូវបានសមត្ថកិច្ច​កម្ពុជា​បង្រ្កាបយ៉ាងចាស់ដៃ ដោយបាញ់គ្រាប់ពិតមានស្លាប់ និងរបួសច្រើនអ្នក រីឯសមត្ថកិច្ចថៃរហូតមកដល់ពេលនេះ នៅ​តែមានការអត់ធ្មត់ខ្ពស់បំផុត ដោយមិនបានប្រើអំពើហិង្សាលើបាតុករនោះទេ បើទោះជាបាតុករជ្រុលនិយម​រាប់ម៉ឺន​នាក់ ដើរពាសពេញផ្លូវ និងចូលកាន់កាប់ក្រសួងរបស់រដ្ឋជាច្រើនក៏ដោយ៕

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី២៧ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ