ផែ សុវណ្ណរិទ្ធ៖ ៣០ឆ្នាំក្រោមអំណាច ហ៊ុន សែន កែទម្រង់បានអ្វីខ្លះ?
អាចចាត់ទុកថា«សម្បើម»គួរសម ដែលមួយថ្ងៃបន្ទាប់ពីបានដុតរូបថត លោក ជួន សុវណ្ណ ស្នងការនគរបាលរាជធានីភ្នំពេញរួច យុវជន ផែ សុវណ្ណរិទ្ធ បានត្រឡប់មកជាថ្មី ដើម្បីបង្ហាញភាព«ក្លាហាន»របស់យុវជនរូបនេះ ក្នុងនាមជាយុវជន«ស្រករក្រោយ» ដែល«ហ៊ាន»មិនខ្លាចស្លាប់ នៅចំពោះអំណាចជាង ៣០ឆ្នាំដ៏មានឥទ្ធិពលរបស់បុរសខ្លាំង លោក ហ៊ុន សែន ដោយបានដុតកម្ទេចទៅជាផេះផង់ នូវរូបថតមួយសន្លឹករបស់លោក នាយករដ្ឋមន្ត្រី រូបនេះ និងព្រមទាំងនិយាយពាក្យរិះគន់ចំៗមកជាមួយផង។ ប៉ុន្តែសម្រាប់អ្នកលេងហ្វេសប៊ុក មួយចំនួន នៅតែគិតថា នេះជាឆាកល្ខោន ដើម្បីអនុញ្ញាតឲ្យយុវជនរូបនេះ អាចក្ដោបក្ដាប់បាននូវបណ្ដាញសង្គមហ្វេសប៊ុក ដើម្បីអាចធ្វើអ្វីមួយទៅថ្ងៃក្រោយ។
យុវជននៅលើហ្វេសប៊ុក ផែ សុវណ្ណរិទ្ធ ដុតរូបថតលោក ហ៊ុន សែន ។ (រូបថតផ្តិតពីអេក្រង់វីដេអូ)
តារាហ្វេសប៊ុក - «គ្រប់គ្នាជេរដល់ម៉ែឪជីដូនជីតាខ្ញុំ ខ្ញុំមិនខឹងទេ ដោយសារគ្រប់គ្នាមិនស្គាល់ខ្ញុំ មិនយល់ពីទឹកចិត្តរបស់ខ្ញុំ។ ប៉ុន្តែខ្ញុំទ្រាំមិនបានទេ ដែលអ្នកប្រមាថភាពក្លាហានរបស់ខ្ញុំ ប្រមាថភាពក្លាហានរបស់យុវជនខ្មែរ ហើយនិយាយថាយុវជនខ្លះកំសាក។ ថ្ងៃនេះ ខ្ញុំ ផែ សុវណ្ណរិទ្ធ តាំងខ្លួនឯងម្ដងទៀត ថាជាយុវជនខ្មែរក្លាហាន ហើយចង់ឲ្យយុវជនខ្មែរទាំងអស់ក្លាហានទាំងអស់គ្នា (...)។ ខ្ញុំដុតរូបលោក ហ៊ុន សែន ឲ្យគ្រប់គ្នាមើល។» នេះជាពាក្យសម្ដីដ៏«សម្បើម» ដែលធ្លាយចេញពីប្រអប់មាត់របស់ យុវជនល្បីឈ្មោះក្នុងបណ្ដាញសង្គមហ្វេសប៊ុកមួយរូប ដែលបានតាំងខ្លួនថា ជាយុវជនខ្មែរ«ក្លាហាន» ដោយបានដុតរូបថតលោក ហ៊ុន សែន បុរសខ្លាំងដែលមិនធ្លាប់មាននរណាម្នាក់ ហ៊ានប៉ះពាល់បាន តាំងពីជាង៣០ឆ្នាំមកហើយ។
តារាហ្វេសប៊ុក ផែ សុវណ្ណរិទ្ធ បានបកស្រាយនៅក្នុងវីដេអូមួយ ដែលបានចុះផ្សាយនៅលើទំព័រហ្វេសប៊ុកផ្ទាល់ខ្លួន កាលពីថ្ងៃទី១៦ខែវិច្ឆិកា វេលាម៉ោង៤និង៣០នាទីល្ងាច ដោយគូសបញ្ជាក់ថា សកម្មភាពដុតរូបថតនេះ មិនមានបំណងឲ្យនរណាគាំទ្រខ្លួន ឬចង់ចុះចូលទៅខាងគណបក្សសង្គ្រោះជាតិ ដែលជាបក្សប្រឆាំង ឬទៅខាងគណបក្សប្រជាជនកម្ពុជា ដែលជាបក្សកាន់អំណាចនោះឡើយ។ ប៉ុន្តែយុវជនមានបំណងតែមួយគត់ នោះគឺចង់ក្រើនរំលឹក ទៅដល់យុវជនខ្មែរផ្សេងទៀត ឲ្យមានភាពក្លាហានឡើង។
យុវជន សុវណ្ណរិទ្ធ បានពន្យល់ពីមូលហេតុ ថាតើហេតុដូចម្ដេចបាន លោកបានដុតរូបថត លោក ហ៊ុន សែន យ៉ាងដូច្នេះថា «ការដឹកនាំ៣០ឆ្នាំ កែទម្រង់បានអ្វីខ្លះ? អំពើពុករលួយពីថ្នាក់ក្រោម ដល់ថ្នាក់លើ មន្ត្រីរាជការថ្នាក់ខ្ពស់ ធ្វើបាបមន្ត្រីរាជការថ្នាក់តូច ប្រជារាស្ត្ររងទុក្ខវេទនា។ នេះជាការដឹកនាំរបស់លោក ហ៊ុន សែន ជាង៣០ឆ្នាំ។» លោក ហ៊ុន សែន ដែលនៅក្នុងអំណាចជានាយករដ្ឋមន្ត្រីតាំងពីថ្ងៃទី១៤ខែមករាឆ្នាំ១៩៨៥ មកទល់នឹងសព្វថ្ងៃ បានក្លាយជានាយករដ្ឋមន្ត្រីដែលកាន់អំណាចបានយូរជាងគេ នៅតំបន់អាស៊ីខាងកើត ដែលបើសូម្បីប្រទេសកុំម្មុយនីស ដូចចិន វៀតណាម ឬកូរ៉េខាងជើង ក៏មិនមាននាយករដ្ឋមន្ត្រីណានៅក្នុងអំណាចបានយូរ ដូចលោកហ៊ុនសែន ដូច្នេះឡើយ។ មិនត្រឹមតែប៉ុណ្ណោះ លោក ហ៊ុន សែន ធ្លាប់ប្រកាសថា លោក នឹងនៅក្នុងតំណែងយ៉ាងហោចក៏ពីរអាណត្តិបន្តទៅមុខទៀតដែរ។
«ខ្ញុំដេកនៅតែផ្ទះ ក៏គេអាចចាប់ខ្ញុំដាក់គុកបានដែរ»
ផ្ទុយពីបំណងដែលចង់កាន់អំណាចយូរទៅមុខទៀត លោក ហ៊ុន សែន ត្រូវបានប្រជាជនកម្ពុជាដែលមានចំនួនកាន់តែច្រើនឡើងៗ សម្ដែងការមិនពេញចិត្ត ជាពិសេសនៅក្នុងការបោះឆ្នោតសកល ដែលទើបនឹងប្រព្រឹត្តិទៅកាលពីថ្ងៃទី២៨ ខែកក្កដាកន្លងមកនេះ។ អ្នកផងបានមើលឃើញថា ការដឹកនាំរបស់លោក ហ៊ុន សែន មិនបានពង្រឹកឲ្យបានពិតប្រាកដ នូវប្រទេសកម្ពុជាមួយជានិតិរដ្ឋ ប្រកបដោយសមធម៌ សច្ចធម៌ និងវឌ្ឍនភាពខ្ជាប់ខ្ជួននោះទេ។ ជាពិសេស ដូចជានៅក្នុងការពង្រឹង ប្រព័ន្ធយុត្តិធម៌របស់ប្រទេសជាដើម ក៏ត្រូវបាន យុវជន ផែ សុវណ្ណរិទ្ធ យកមកថ្លែងបរិហាដែរថា «ខ្ញុំមិនខ្លាចច្បាប់ស្រុកខ្មែរទេ ពីព្រោះច្បាប់ស្រុកខ្មែរនៅនឹងមាត់មនុស្ស។ ខ្ញុំដេកនៅតែផ្ទះ ក៏គេអាចចាប់ខ្ញុំដាក់គុកបានដែរ។»
មកទល់នឹងម៉ោងនេះ មិនទាន់មានមន្ត្រីរដ្ឋាភិបាលណាម្នាក់ បញ្ចេញប្រតិកម្មអ្វីនៅឡើយ ទាក់ទងនឹងការដុតរូបថត មេដឹកនាំរដ្ឋាភិបាលដ៏កំពូលនេះ។ ប៉ុន្តែទាំងអ្នកគាំទ្រគណបក្សប្រជាជនកម្ពុជា ទាំងអ្នកគាំទ្រគណបក្សសង្គ្រោះជាតិ មួយចំនួន បានចាត់ទុកយុវជនផែ សុវណរិទ្ធ ថាមានសតិមិនគ្រប់ ជាមនុស្សឆ្កួត ឬថាចេះសម្ដែងបានឥតខ្ចោះ។ យុវជនម្នាក់ទៀតឈ្មោះ ផែង វណ្ណះ ដែលត្រូវបានគេស្គាល់ថា បានចាត់ទុកលោក ហ៊ុន សែន ជាវីរបុរសនោះ បានសរសេរនៅក្នុងទំព័រហ្វេសប៊ុករបស់ខ្លួនថា នឹងតាមប្រមាញ់ យុវជន ផែ សុវណ្ណរិទ្ធ នៅគ្រប់ទីកន្លែងទាំងអស់។ យុវជន ផែង វណ្ណះ ថែមទាំងបង្ហើបព័ត៌មានមួយថា ផែ សុវណ្ណរិទ្ធ មានលោកបណ្ឌិតមួយរូបឈ្មោះ ជា ចំរើន នៅពីក្រោយដែលហ៊ានធ្វើដល់ថ្នាក់នេះ។ ចំណែកឯអ្នកគាំទ្រខាងគណបក្សសង្គ្រោះជាតិមួយចំនួន បានថ្លែងថា នេះអាចជាកលឧបាយរបស់ ផែ សុវណ្ណរិទ្ធ ដើម្បីកកូរកកាយបណ្ដាញសង្គមហ្វេសប៊ុក នៅកម្ពុជា ដែលនឹងបើកទ្វាឲ្យរដ្ឋាភិបាល អាចធ្វើច្បាប់ដាក់កំហិតទៅលើបណ្ដាញនេះ។
ល្បិចនៅក្នុងរឿង សាមកុក
ទោះបីជាយ៉ាងណាក៏ដោយ ក៏រាល់ការអះអាងខាងលើ គ្រាន់តែជាយល់ឃើញរបស់មនុស្សមួយចំនួន ដែលមានលក្ខណៈជាឯកជនប៉ុណ្ណោះ ហើយក៏មិនមានភាពសមហេតុផលគ្រប់គ្រាន់នោះប៉ុន្មានទេ។ ចំពោះរឿងខាងលើនេះ ទំនងជាមិនខុសប៉ុន្មានពីល្បិចនៅក្នុងរឿង សាមកុក នោះឡើយ ព្រោះប្រសិនបើរដ្ឋាភិបាល ឬលោក ហ៊ុន សែន មិនបង្ហាញប្រតិកម្ម ឬធ្វើចំណាត់ការទៅលើយុវជន ផែ សុវណ្ណរិទ្ធ នោះទេ វាបានសេចក្ដីស្មើរនឹងការផ្ដល់រូបភាព«ល្អ» ជាអ្នកសណ្ដោសប្រណីឲ្យត្រឡប់ទៅលោក ហ៊ុន សែន ឬអាចបង្ហាញថា លោក ហ៊ុន សែន មានព្រហ្មវិហារធម៌ សមជាមេដឹកនាំពិតប្រាកដទៅវិញ។
ប៉ុន្តែការដុតរូបថត ឬការជេរប្រទេចបុគ្គលសាធារណៈ ដែលមានថានះជាមេដឹកនាំណាម្នាក់ ពីសំណាក់សាធារណជននោះ មិនមានអ្វីជាចម្លែកទេ នៅក្នុងប្រទេសប្រកាន់លិទ្ធិប្រជាធិបតេយ្យធំៗ។ វាចម្លែកតែម្យ៉ាងទេ នោះគឺនៅព្រះរាជាណាចក្រកម្ពុជា មិនដែលធ្លាប់មានរឿងបែបនេះ កើតចំលោក ហ៊ុន សែន តែប៉ុណ្ណោះ។
សម្រាប់សេចក្ដីក្លាហានរបស់យុវជន បើយោងតាមប្រវត្តិសាស្ត្រកម្ពុជាទំនើប មិនមែននិយាយត្រឹមតែយុវជនប៉ុណ្ណោះទេ ដែលគេបានធ្វើឲ្យបាក់ស្ប៉ាត ខ្លបខ្លាចនោះ តែគេត្រូវនិយាយពីប្រជាជាតិខ្មែរទាំងមូល ដែលត្រូវបានគេវាយពង្រាបរាបដល់ដី នៅក្នុងសម័យខ្មែរក្រហមប៉ុលពត និងសម័យក្រោយឆ្នាំ១៩៧៩ នៅពេលដែលវៀតណាមចូលលុកលុយកាន់កាប់ប្រទេសកម្ពុជា៕
សូមទស្សនាវីដេអូនេះ ទាំងស្រុងដូចតទៅ៖
-------------------------------------------------
ដោយ ៖ ឈូករ័ត្ន - ប៉ារីស ថ្ងៃទី១៦ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ