សហរដ្ឋអាមេរិក និងប្រទេសអ៊ីស្ត្រាអែល បានអស់សិទ្ធិជាស្វ័យប្រវត្តិនៅថ្ងៃសុក្រទី៨ខែវិច្ឆិកានេះ ក្នុងការបោះឆ្នោតនៅ​អង្គការវប្បធម៌អន្តរជាតិ ហៅកាត់ថា «អ៊ុយណេស្កូ (Unesco)»។ សិទ្ធិបោះឆ្នោត ដែលត្រូវបានកាត់ចេញនៅពេលដែល​ប្រទេសសាមី មិនបានបង់វិភាគទានទៅឲ្យអង្គការនេះ តាំងពីរឆ្នាំមកហើយ បន្ទាប់ពីអង្គការអន្តរជាតិ បានទទួលយករដ្ឋ​ប៉ាឡេស្ទីន ឲ្យចូលជាសមាជិករបស់ខ្លួន។

មហាសន្និបាតរបស់អង្គការអ៊ុយណេស្កូ ដែលធ្វើចុងសប្ដាហ៍ទីមួយនៃខែវិច្ឆិកាឆ្នាំ២០១៣។ (រូបថត AP)

វប្បធម៌ - ប្រភពមួយដែលស្និតនឹងសំនុំរឿងនៅក្នុងអង្គការអ៊ុយណេស្កូ បានថ្លែងប្រាប់ទីភ្នាក់ងារសារព័ត៌មានបារាំង (AFP) ថា «នៅក្នុងបញ្ជីនៃប្រទេសដែលនឹងអស់សិទ្ធិបោះឆ្នោត មានសហរដ្ឋអាមេរិក និងប្រទេសអ៊ីស្ត្រាអែល»។

ប្រភពដែលសុំលាក់មិនបញ្ចេញឈ្មោះនោះ បានបន្តទៀតថា «ប្រទេសទាំងពីរនេះ នៅមិនទាន់បានបង្ហាញពីឯកសារ​ណាមួយ ដើម្បីឈានទៅបញ្ជៀស នូវការដកសិទ្ធិបោះឆ្នោតនោះនៅឡើយ»។ ប្រភពបានយោងទៅលើអវត្តមាន​នៃ​កិច្ចសន្យា ដែលនឹងផ្ដល់វិភាគទានមកឲ្យអង្គការអ៊ុយណេស្កូ  ដោយប្រទេសទាំងពីរនោះ នឹងធ្វើឲ្យប្រទេសខ្លួនលែងមាន​សិទ្ធិតទៅទៀត ក្នុងការបោះឆ្នោតសម្រេចអ្វីមួយ នៅអង្គការអន្តរជាតិ ជំនាញខាងវប្បធម៌ វិទ្យាសាស្ត្រនិងការអប់រំមួយ​នេះ។

ប្រទេសអាមេរិក និងប្រទេសអ៊ីស្ត្រាអែល បានផ្អាកឈប់ផ្ដល់ថវិកាឲ្យអង្គការវប្បធម៌ដ៏កំពូលនេះ បន្ទាប់ពីអង្គការនេះ បាន​បោះឆ្នោតសម្រេចទទួលរដ្ឋប៉ាឡេស្ទីន ជាសមាជិកទី១៩៥របស់ខ្លួន កាលពីថ្ងៃទី៣១ខែតុលាឆ្នាំ២០១១កន្លងទៅ។

វិបត្តិហិរញ្ញវត្ថុ

ការផ្អាកឈប់ផ្ដល់វិភាគទានរបស់សហរដ្ឋអាមេរិក បានបង្កឲ្យមានវិបត្តិហិរញ្ញវត្ថុមួយ នៅក្នុងប្រព័ន្ធគ្រប់គ្រង​នៃអង្គការ​នេះ ដែលមានការធ្លាក់ចុះ ប្រមាណជា២២ភាគរយនៃថវិកាទាំងអស់ គិតជាសាច់ប្រាក់ ធ្លាក់ពី ៦៥៣ មក ៥០៧លាន​ដុល្លា។ ដើម្បីទប់ទល់នឹងខ្ទង់ថវិកាដែលខ្លួនមានសព្វថ្ងៃនេះ បុគ្គលិកប្រមាណជាង៣០០នាក់ នឹងត្រូវបាត់បង់ការងារ។ នៅឆ្នាំ​២០១២ អង្គការ អ៊ុយណេស្កូ បានផ្ដល់ការងារទៅឲ្យមនុស្សច្រើនជាង ១២០០នាក់ នៅទីស្នាក់កណ្ដាលរបស់ខ្លួន ប្រចាំនៅ​ទីក្រុងប៉ារីស និង៩០០នាក់ផ្សេងទៀត នៅជុំវិញពិភពលោក។

តែបើទោះជាមានការលំបាកបែបនេះក៏ដោយ អគ្គនាយិកានៃអង្គការនេះ លោកស្រី អៀរីណា ប៊ូកូវ៉ា (Irina Bokova) ដែល​មានសញ្ជាតិប៊ុលហ្គារីនោះ និងបានទទួលជោគជ័យក្នុងការតម្លើង ៧៥លានដុល្លា ចូលក្នុងខ្ទង់ថវិការអង្គការនោះ បានត្រូវ​សមាជិកនៃអង្គការ បោះឆ្នោតជ្រើសរើសឲ្យកាន់តំណែងឡើងវិញ កាលពីដើមខែតុលាកន្លងទៅ។

ប្រភពខាងលើដដែលបានថ្លែងឲ្យដឹងទៀតថា «បញ្ជីប្រទេសដែលនឹងអស់សិទ្ធិបោះឆ្នោត ទំនងជានឹងត្រូវប្រកាស ក្នុង​មហាសន្និបាតរបស់ខ្លួន នៅព្រឹកថ្ងៃសៅរ៍ទី០៩ខែវិច្ឆិកានេះ»។ សូមបញ្ជាក់ថា អង្គការអ៊ុយណេស្កូ ជាផ្នែកមួយរបស់​អង្គការ​សហប្រជាជាតិ ទទួលបន្ទុកខាងវប្បធម៌ វិទ្យាសាស្ត្រ និងការអប់រំ៕

-----------------------------------------------------
ដោយ៖ សេក មនោរកុមារ - ប៉ារីស ថ្ងៃទី០៩ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ