ជាថ្មីម្ដងទៀត អង្គការលើកលែងទោសអន្តរជាតិ ហៅជាភាសាអង់គ្លេសថា Amnesty International បានចេញសេចក្ដី​អំពាវនាវ ឲ្យមានការដោះលែងឲ្យមានសេរីភាពជាបន្ទាន់ និងដោយគ្មានលក្ខខ័ណ្ឌ សកម្មជនដីធ្លីមួយរូបអ្នកស្រី យ៉ោម បុប្ផា ដែលកំពុងជាប់ពន្ធនាគារ យ៉ាង«អយុត្តិធម៌»។ សេចក្ដីអំពាវនាវនេះ បានចេញផ្សាយកាលពីថ្ងៃទី០៧ខែវិច្ឆិកា​កន្លង​ទៅនេះ នៅមុនតែពីរសប្ដាហ៍ប៉ុណ្ណោះ នៃសវនាការកាត់ទោសរបស់តុលាការកំពូល ក្នុងប្រទេសកម្ពុជា ដែលនឹងត្រូវបើក​ធ្វើ​នៅថ្ងៃទី២២ខែវិច្ឆិកាខាងមុខ។

កូនប្រុសអ្នកស្រី យោម បុប្ផា និងអ្នកភូមបឹងកក់ ដែលទាមទារឲ្យគេដោះលែងម្ដាយខ្លួន នៅមុខសាលារាជធានី។ (រូបថត MONOROOM.info/ U. Bory)

សិទ្ធិលំនៅដ្ឋាន - អង្គការលើកលែងទោសអន្តរជាតិ បានហៅអ្នកស្រីយ៉ោម បុប្ផា ថាជាសកម្មជន ដើម្បីសិទ្ធិលំនៅដ្ឋាន មកពីសហគមន៍បឹងកក់កណ្ដាលរាជធានីភ្នំពេញ។ អង្គការអន្តរជាតិ បាននិយាយថា អ្នកស្រីបានជាប់ទោស​ដោយសារតែ​អ្នកស្រីបានធ្វើសកម្មភាពតវ៉ា មិនចេះនឿយហត់ដើម្បីជាប្រយោជន៍ដល់សហគមន៍របស់អ្នកស្រី និងជាប្រយោជន៍​នៃការ​គោរពសិទ្ធិលំនៅដ្ឋាន នៅប្រទេសកម្ពុជា។ តែផ្ទុយទៅវិញ អ្នកស្រី យ៉ោម បុប្ផា បានត្រូវតុលាការសាលាដំបូង​កាត់ទោស​ឲ្យជាប់ពន្ទនាគារ ក្រោមបទចោទប្រកាន់«មិនទំនង»មួយថា អ្នកស្រីជាអ្នកនៅពីក្រោយ នៃការវាយតប់ឲ្យរបួស​អ្នករត់ម៉ូតូ​ឌុបពីរនាក់។

អង្គការអន្តរជាតិ បានបរិហារទៀតថា អ្នកស្រីត្រូវបានផ្ដន្ទាទោស ដោយសវនាការមួយដែលគ្មានយុត្តិធម៌ត្រឹមត្រូវ គ្មាន​ទាំងភស្ដុតាងសម្រាប់ដាក់បន្ទុក នោះទៅទៀត។ ការដាក់ពន្ធនាគារ ដែលចេញពីសវនាការ«ផ្លែល្វា» បានធ្វើឲ្យអ្នកស្រី​ឃ្លាតឆ្ងាយ ពីកូនប្រុសម្នាក់អាយុទើបតែ១០ឆ្នាំ និងស្វាមីកំពុងមានជម្ងឺរបស់អ្នកស្រី។

«អ្នកស្រី យ៉ោម បុប្ផា ជាអ្នកទោសសម្បជញ្ញៈ ហើយមូលហេតុដែលឈានទៅដល់ការចាប់ខ្លួនអ្នកស្រី គឺដោយសារតែ​អ្នកស្រីជាសកម្មជនដោយអហឹង្សា ក្នុងបុព្វហេតុការពារសិទ្ធិ នៃសហគមន៍អ្នកភូមិបឹងកក់» នេះជាការអះអាងរបស់អង្គការ​ដែលមានទីស្នាក់ការកណ្ដាលនៅទីក្រុងហ្សឺណែវ ប្រទេសស្វីស។

ក្រៅពីសេចក្ដីអំពាវនាវនេះ អង្គការអន្តរជាតិ ក៏បានរៀបចំឲ្យមានជា ញ្ញត្តិដើម្បីទទួលហត្ថលេខាគាំទ្រផងដែរ ពីសំណាក់​បណ្ដាអ្នកស្រឡាញ់យុត្តិធម៌ និងយល់ពីបុព្វហេតុនៃអ្នកភូមិបឹងកក់ ក្នុងគោលបំណងដាក់ជូនទៅរដ្ឋមន្ត្រីក្រសួងយុត្តិធម៌​កម្ពុជា​ថ្មី ដើម្បីជួយធ្វើអន្តរាគមន៍លើបញ្ហា អ្នកស្រី យ៉ោម បុប្ផា។ ញ្ញត្តិគាំទ្រនោះ អាចរកចុះហត្ថាលេខាបាន នៅលើ​បណ្ដាញ​អាំងធើណែត ដោយចុចលើទីនេះ។

សេចក្ដីអំពាវនាវរបស់ អង្គការការពារសិទ្ធិមនុស្សរបស់ល្បីឈ្មោះមួយនេះ បានធ្វើឡើងនៅពីរសប្ដាហ៍មុន ថ្ងៃបើក​សវនាការនៃតុលាការកំពូលក្នុងប្រទេសកម្ពុជា នៅថ្ងៃ២២ខែវិច្ឆិកាខាងមុខ។ កាលពីថ្ងៃ២៦ខែមិនាឆ្នាំ២០១៣ តុលាការ​កំពូលបានច្រានចោលម្ដងហើយ នូវបណ្ដឹងសារទុក្ខទាមទារឲ្យដោះលែងអ្នកស្រីយ៉ោម បុប្ផា នៅក្រៅឃុំ តែនៅក្រោម​លក្ខខ័ណ្ឌ។ ការសម្រេចច្រានចោលនេះ បានធ្វើឡើងតែមួយសប្ដាហ៍ប៉ុណ្ណោះ ក្រោយការប្រកាសជាសាធារណៈ របស់​នាយករដ្ឋមន្ត្រីកម្ពុជាដ៏មានអំណាច លោក ហ៊ុន សែន ដែលបានលើកឡើងថា អ្នកស្រី យ៉ោម បុប្ផា មានទោស៕

-------------------------------------------------
ដោយ ៖ ដារា រិទ្ធ - ភ្នំពេញ ថ្ងៃទី០៨ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ