ការបង្ហាញរូបភាពនៅតាមបណ្ដាញផ្សព្វផ្សាយ ស្ដីពីសកម្មភាពរបស់ក្រុមយុវជនមួយ ដែលបានឲ្យនាងៗ ជាយុវតីក្មេងៗ​ស្អាតៗ ផឹករហូតដល់ស្រវឹង ដើម្បីឈានទៅដល់ការរួមភេទជាក្រុមនោះ បានធ្វើឲ្យផ្ទុះជារឿងអាស្រូវកក្រើកពេញប្រទេស​ញ៉ូហ្សេឡេន។ ខណៈពេលដែលនគរបាល ត្រូវបានចោទប្រកាន់ពីការបិទភ្នែក ធ្វើមិនដឹងមិនលឺជុំវិញហេតុការណ៍នោះ រដ្ឋាភិបាលនៃប្រទេសនេះ កំពុងតែចាប់ផ្ដើមចាត់វិធានការ«ខ្លាំង»ដៃមួយ។

ទ័ព័រហ្វេសប៊ុក របស់ក្រុមយុវជន«អ្នកប្រមាញ់ដើម្បីចំអិន»។ (រូបចម្លងពីទំព័រហ្វេសប៊ុក)

ជីវិតយុវវ័យ - នេះហើយដែលអ្នកផងនិយាយថា ការលេងសើច ដែលបណ្ដាលឲ្យមានរឿងធំ។ ក្រុមយុវជនដែល​មាន​អាយុយ៉ាងតិច២០ឆ្នាំ បានបង្កឲ្យមានជារឿងអាស្រូវដ៏ធំមួយ នៅប្រទេសញ៉ូហ្សេឡេន ដោយពួកគេបានបង្ខំយុវតីក្មេងៗ ឲ្យរួមភេទជាក្រុម ក្រោយបន្ទាប់ពីពួកនាងត្រូវបានពួកយុវជន ចាប់បញ្ច្រកសុរាយ៉ាងជោគជាំនោះមក។ បទយកការណ៍​នេះ ត្រូវបានស្ថានីយ៍ទូរទស្សន៍ក្នុងស្រុកមួយ លើកមករាយការណ៍ កាលពីថ្ងៃអាទិត្យកន្លងទៅ តែបានបង្កឲ្យផ្ទុះជារឿង​អាស្រូវដ៏ធំមួយ ដែលរដ្ឋាភិបាលនៃប្រទេសនេះ កំពុងចាត់វិធានការរឹងបន្តឹង ជាពិសេសទៅក្នុងភាពចន្លោះប្រហោង​របស់​នរគរបាល។

ក្រុមនោះមានសមាជិកជាយុវជន ចំនួន៧នាក់ រស់នៅក្នុងទីក្រុងអូក្លេន ដែលពួកគេនិយាយថាសុទ្ធសឹង​ជាមិត្តភ័ក្រតាំង​ពីតូចៗមកនោះ ធ្លាប់បានប្រព្រឹត្តិរឿងនេះតាំងពី២ឆ្នាំមកហើយ។ ជាមួយយនឹងវិធីដែលពួកគេធ្វើរាល់ដង នោះគឺ៖ បន្ទាប់​ពីលួងលោមក្មេងៗស្រីៗ អាយុពី១៣ឆ្នាំទៅដល់១៦ឆ្នាំ នៅតាមបណ្ដាញសង្គមហ្វេសប៊ុករួចមក ក្រុមយុវជនទាំងនោះ​បាន​ហៅពួកនាងៗ មកពង្វក់ដើម្បីបាន«រួមភេទ»ជាក្រុម។ ដោយមានមោទនភាពយ៉ាងខ្លាំង នឹងគម្រោងការដ៏ពិសេសនេះ ក្រុមយុវជនថែមទាំងបានប្រកាសអួតអាង ពីសកម្មភាពរបស់ពួកគេ នៅលើប្រព័ន្ធហ្វេសប៊ុក ដោយដាក់ទាំងឈ្មោះ ប្រើ​ទាំងពាក្យមិនគប្បី ចុះផ្សាយទាំងវីដេអូ របស់ស្រីក្មេងៗរងគ្រោះនោះទៀត។

អំពើដ៏ឆ្កួតលីលា បានបណ្ដាលឲ្យក្រុមយុវជននេះ ហ៊ានឆ្លើយនៅលើប្រព័ន្ធបណ្ដាញសង្គមហ្វេសប៊ុក ទៅនឹងមនុស្ស​ដែល​ចូល​ចិត្ត (Like) ក្រុមខ្លួន ដែលចង់ដឹងពីវិធីដែលប្រសើរបំផុតក្នុងការទាក់ទាញ«ស្រី» ឲ្យឡើងគ្រែនោះ គឺ«ប្រើថ្នាំ​សណ្ដំ»។ ពួកគេមានឈ្មោះនៅលើបណ្ដាញសង្គមថា «Roast Busters» ដែលបកប្រែជាខេមរភាសាថា ជា«អ្នកប្រមាញ់​មក​ចម្អិន»។

នៅក្នុងបទយកការណ៍របស់ស្ថានីយទូរទស្សន៍ប៉ុស្ដ៍លេខបី នៃប្រទេសញ៉ូហ្សេឡេន អ្នកកាសែតបានបង្ហាញថា នគរបាល​បានតាមដានក្រុមនេះតាំងពីដំបូង (២០១១) មកម្លេះ។ នគរបាលបានស្គាល់ពីទំព័រហ្វេសប៊ុករបស់ក្រុមនេះ ដែលត្រូវបាន​ហ្វេសប៊ុក​បិទតាំងពីដើមទីមក ហើយថែមទាំងបានដឹងពីស្រីក្មេងៗ ជាជនរងគ្រោះនោះទៀត។ អធិការនគរបាលមួយរូប បាននិយាយថា «គ្មានស្រីក្មេងទាំងនោះណាម្នាក់ មានសេចក្ដីក្លាហាន ហ៊ានប្ដឹងជាលាយលក្ខណ៍អក្សរ មកអាជ្ញាធរ ដើម្បី​យើងអាចធ្វើចំណាត់ការលើក្រុមយុវជនទាំងនោះទេ»។ បានសេចក្ដីថា នគរបាលមិនអាចធ្វើអ្វីបាន ក្រៅពីធ្វើការព្រមាន​ទៅលើ​ពួកយុវជនប្រមាញ់ បន្តិចបន្តួចប៉ុណ្ណោះឡើយ។

បន្ទាប់ពីបទយកការណ៍របស់អ្នកសារព័ត៌មាន ត្រូវបានផ្សព្វផ្សាយជាសាធារណៈនោះមក ប្រព័ន្ធផ្សព្វផ្សាយផ្សេង​ដទៃ​ទៀត ក៏បានបន្ទរព័ត៌មាននេះជាបន្ត ធ្វើឲ្យពលរដ្ឋនៃប្រទេសនេះ បានយល់កាន់តែខ្លាំងឡើង ពីទំហំគ្រោះថ្នាក់នៃ​រឿង​អាស្រូវ។ អ្នកការសែតបានរកឃើញទៀតថា នគរបាលបានកុហកនូវអ្វីដែលខ្លួនបាននិយាយខាងលើ ព្រោះគេបានរក​ឃើញ​ថាក្មេងស្រីបួននាក់ បានប្ដឹងពីបញ្ហានេះទៅអាជ្ញាធរ តែពាក្យបណ្ដឹងរបស់ពួកនាង ​មិនត្រូវបានក្រុមនគរបាល​ចាត់​ជារឿងមែនទែនឡើយ។ ក្មេងស្រីរងគ្រោះម្នាក់ បាននិយាយថា នាងថែមទាំងរងនូវការរិះគន់ត្រឡប់មកវិញ ថានាងបាន​ស្លៀកពាក់ លេចលើបញ្ចេញក្រោម នៅពេលដែលនាងបានណាត់ជួបជាមួយក្រុមយុវជនទាំងនោះ ជាលើកដំបូង។

ហេតុអ្វីក៏នគរបាល មិនបានធ្វើអ្វីទាល់តែសោះ? ឬមួយក៏ដោយសារយុវជនទាំងប៉ុន្មាននាក់ខាងលើ សុទ្ធសឹងជាកូនចៅ​ដែល​ចេញពីគ្រួសារមានលុយ មានថានះក្នុងសង្គម ? បើទោះជាខាងនគរបាលបានប្រកែកតវ៉ា តែខាងរដ្ឋាភិបាលវិញ ដូចជាបានបង្ហាញពីភាពទទួលខុសត្រូវរបស់ខ្លួន។ កាលពីថ្ងៃព្រហស្បត្តិ៍ទី០៧ខែវិច្ឆិកានេះ រដ្ឋមន្ត្រីក្រសួងសន្តិសុខជាតិ បានចាត់ទុកថាសំនុំរឿងនេះ មិនត្រូវបានចាត់ចែងឲ្យបានត្រឹមត្រូវ ដោយអ្នកក្រោមបង្គាប់នៃក្រសួងរបស់លោក ហើយ​លោកបញ្ជាឲ្យមានការស៊ើបអង្កេតមួយភ្លាម ដើម្បីស្វែងយល់ពីភាពចន្លោះប្រហោង ក្នុងជួរនគរបាល៕

សូមទស្សនាវីដេអូ នៃបទយកការណ៍ខ្លីមួយ ពីព្រឹត្តិការណ៍នោះ ដូចខាងក្រោម៖

-----------------------------------------------------
ដោយ៖ សេក មនោរកុមារ - ប៉ារីស ថ្ងៃទី០៨ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ