ជាថ្មីម្ដងទៀត មន្រ្តីជាន់ខ្ពស់របស់គណបក្សប្រជាជកម្ពុជា បានចេញមុខអះអាងប្រាប់អ្នកសារព័ត៌មានថា បញ្ហាប្រែប្រួល​អាកាសធាតុមិនមែនបណ្តាលមកពី ការកាប់បំផ្លាញព្រៃឈើនោះទេ។ តែសង្គមស៊ីវិល និងសកម្មជនដែលធ្វើការស្និត នឹង​ការការពារខាងព្រៃឈើ អះអាងថាបញ្ហាចម្បង ដែលជម្រុញឲ្យមានការប្រែប្រួលអាកាសធាតុ គឺការកាប់បំផ្លាញ​ព្រៃឈើ​យ៉ាងដំណំនេះតែម្ដង។

សកម្មភាពជួញឈើ នៅក្នុងប្រទេសកម្ពុជា។ (រូបថតឯកសារ AFP)

រាជធានីភ្នំពេញ - លោក ឈាង វុន ជាមន្រ្តីជាន់ខ្ពស់របស់គណបក្សប្រជាជនកម្ពុជា ក្នុងពិធីមួយនៅរដ្ឋសភាកម្ពុជា ថ្ងៃទី៦ ខែវច្ឆិកា ឆ្នាំ២០១៣នេះ បានថ្លែងប្រាប់អ្នកការសែតថា បញ្ហាប្រែប្រួលអាកាសធាតុ បានកើតឡើងស្ទើរតែគ្រប់ប្រទេស​ទាំងអស់នៅជុំវិញពិភពលោក មិនមែនកើតឡើងនៅតែកម្ពុជាមួយនោះទេ ពិសេសទាក់ទងនឹងករណីគ្រោះទឹកជំនន់ ភ្លើង​ឆេះព្រៃ និងខ្យល់ព្យុះជាដើម។

តំណាងរាស្ត្ររបស់គណបក្សប្រជាជនដដែលនេះលើកឡើងថា អ្នកដែលរិះគន់ និងតស៊ូ ក្នុងវិស័យបរិស្ថានមួយ​ចំនួនមិន​បានគិតគូរ និងថ្លឹងថ្លែងអំពី​ផល​ចំណេញ និងការខាតបង់ពីការកាប់ព្រៃឈើនោះទេ ហើយពួកគេមើលឃើញតែមួយជ្រុង ដោយគិតតែការការពារបរិស្ថាន និងព្រៃឈើ គឺជាការចាំបាច់ ប៉ុន្តែពួកគេភ្លេចគិតថា ការអភិវឌ្ឍសេដ្ឋកិច្ច ក៏មានភាពចាំ​បាច់ដែរ ព្រោះអាចលើកកំពស់​ជីវភាព​ប្រជាពលរដ្ឋ ដើម្បីឈានទៅកាត់បន្ថយភាពក្រីក្រ។ លោក ឈាង វុន បញ្ជាក់ថា៖ «យើងកុំយកទឡ្ហីករណ៍​របស់​អ្នកលក់សំឡេង ការផ្លាស់ប្តូរអាកាសធាតុ មិនមែនមកពីរឿងកាប់ព្រៃឈើនៅ​កម្ពុជា​នោះ​ទេ»។

ចំពោះករណីនេះ លោក យ៉ង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពបានអះអាងថា មូលហេតុ​ចម្បង ដែលជម្រុញឲ្យមានការប្រែប្រួលអាកាសធាតុ គឺការកាប់បំផ្លាញព្រៃឈើ តែក៏មានកត្តារួមផ្សំផ្សេងៗផងដែរ ដូចជាការបង្កើតរោងចក្រ និងឧស្ម័នផ្ទះកញ្ចក់ជាដើម។ លោក យ៉ង គឹមអេង បន្ថែមថា ការបង្កើតរោងចក្រ បើទោះជា​ប៉ះពាល់ដល់បរិស្ថាន ក៏វាបានចូលរួមបង្កើតការងារដល់ប្រជាពលរដ្ឋផងដែរ តែការកាប់បំផ្លាញព្រៃឈើ ភាគច្រើនផ្តល់​ផលប្រយោន៍ឲ្យបុគ្គល និងបក្សពួកប៉ុណ្ណោះ។

ថ្លែងក្នុងវេទិការ ថ្នាក់ជាតិលើកទី៣ ស្តីពីការប្រែប្រួលអាកាសធាតុ ដែលមានរយៈពេល៣ថ្ងៃ ដោយចាប់ផ្តើមពីថ្ងៃ​ទី៥ដល់​ថ្ងៃទី៧ ខែវិច្ឆិកា ឆ្នាំ២០១៣ ក្រោមប្រធានបទ «ធ្វើសកម្មភាពឆ្ពោះទៅរកការអភិវឌ្ឍន៍ដោយចីរភាព ក្នុងបរិបទនៃការ​ប្រែ​ប្រួលអាកាសធាតុ» លោកនាយករដ្ឋមន្រ្តី ហ៊ុន សែន បានលើកឡើងថា បញ្ហាប្រែប្រួលអាកាសធាតុឥឡូវនេះ បានក្លាយ​ជាបញ្ហាប្រឈមជាយុទ្ធសាស្ត្រ ចំពោះការ អភិវឌ្ឍន៍ប្រទេសកម្ពុជា ដែលតម្រួវឲ្យមានការយកចិត្តទុកដាក់ ជាបន្ទាន់ និង​រួមគ្នា ដើម្បីដោះស្រាយបញ្ហានេះ ខណៈវាកំពុងតែធ្វើឲ្យប៉ះពាល់ដល់យើងទាំងអស់គ្នា។

ទាក់ទងករណីនេះ លោក ឈិត សំអាត នាយកប្រតិបត្តិវេទិការនៃអង្គការមិនមែនរដ្ឋាភិបាលស្តីពីកម្ពុជា (NGO Forum) បានពន្យល់ថា វាជាការចម្លែកដែលលោក ឈាង វុន អះអាងដូចច្នេះ ព្រោះនៅជុំវិញពិភពលោកគេ​ទទួលស្គាល់ថាព្រៃឈើ​មាន​សារៈសំខាន់ខ្លាំងណាស់ក្នុងការក្សាលំនឹងបរិស្ថាន។ លោក ឈិត សំអាត អះអាងថា នៅបរទេស បើទោះជាគេកាប់​ព្រៃឈើ ក៏គេមានការសិក្សាមុននឹងកាប់ ហើយមានការដាំដុះឡើងវិញ ដើម្បីធានាតុល្យភាព និងលំនឹងបរិស្ថាន ដូច្នេះកម្ពុជា គួរសិក្សាឲ្យបានច្បាស់លាស់ពីផលប៉ះពាល់ មុនការសម្រេចធ្វើអភិវឌ្ឍន៍អ្វីមួយ ជៀសវាងគ្រោះមហន្តរាយ​ធ្ងន់ធ្ងរក្នុង​ពេល​អនាគត៕

---------------------------------------
ដោយ៖ អ៊ុំ បូរី - ថ្ងៃទី៦ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ