ក្រុមហ៊ុនមួយ ដែលមានហាងច្រើនកន្លែង ឯកទេសខាងហ៊េមប៊ើហ្គើរ នៅប្រទេសជប៉ុន បានសង្កេតឃើញថា នំប៊័ងសង់វិច របស់ខ្លួន មិនសូវត្រូវបានស្ត្រីៗបញ្ជាទិញ យកទៅទទួលទាននោះទេ ដោយសារតែពួកនាងៗមានអារម្មណ៍ថា «ខ្មាស»នៅ​ពេល​ដែលយកវាមកដាក់ចូលក្នុងមាត់។ បើអញ្ចឹងធ្វើយ៉ាងម៉េចទៅវិញ ?

នៅពេលនាងញ៉ាំប៊ើរហ្គើរ ដោយមានក្រដាសបំបាំងមាត់ពីមុខនោះផង។ (រូបថត ក្រុមហ៊ុន)

ពីនេះពីនោះ - យកហ៊េមប៊ើហ្គើរ មួយដុះធំ ដោយកាន់ដៃពីរ មកដាក់ក្នុងមាត់ ហើយទំពារឃ្មមៗ ជាមួយនឹងធ្មេញលាន់​លឺ​សូរគ្រួបៗ ... បន្ទាប់មក ចំណិតសាឡាត់ ប៉េងប៉ោះ ឬត្រសក់ នៅជាប់នឹងគៀនធ្មេញ និងថែមទាំងមានទឹកជ្រលក់ហៀរ​ចេញពីហ៊េមបាហ្គើរ មកប្រឡាក់ពេញដៃ... គួរឲ្យមានអារម្មណ៍ខ្ពើមណាស់មែនទេ? នៅប្រទេសណាមិនដឹងទេ តែសម្រាប់​ស្ត្រីជនជាតិជប៉ុន ពួកគាត់មានអារម្មណ៍មិនចង់ឲ្យ សម្ផស្សស្អាតផូរផង់របស់ពួកនាង ត្រូវបានធ្វើឲ្យប្រលាក់ប្រលូក ដោយ​ហ៊េមប៊ើហ្គើរនោះឡើយ។

ក្រុមហ៊ុនមួយ ដែលមានហាងច្រើនកន្លែង ឯកទេសខាងហ៊េមប៊ើហ្គើរ នៅជប៉ុនមានឈ្មោះថា ហ្វ្រេសនីស ប៊ើហ្គើរ (Freshness Burger) បានសង្កេតឃើញថា ហ៊េមប៊ើហ្គើរជំនាន់មុន លែងត្រូវបានស្ត្រីជប៉ុនចូលចិត្តញ៉ាំទៀតហើយ ហើយ​ហ៊េមប៊ើហ្គើរប្រភេទនេះច្រើនតែបញ្ជាទិញ យកទៅទទួលទានតែពួកបុរសៗប៉ុណ្ណោះ។ មូលហេតុដែលធ្វើពួកនាង​មិន​ចូលចិត្ត ទិញយកសង់វិចប្រភេទនេះ យកមកញ៉ាំ នោះគឺពួកនាងមានអារម្មណ៍ថា«ខ្មាស» នៅពេលដែយកវាមកដាក់​ក្នុង​មាត់។

ហ៊េមបាហ្គើរជំនាន់ចាស់ ប្ដូរឈ្មោះមកជា «ប៊ើរហ្គើរបំបាំងមាត់»

នៅជប៉ុន ជាទំនៀមទំលាប់របស់ប្រទេសជប៉ុន គេមិនសូវចូលចិត្តឲ្យស្ត្រីហាមាត់«ធំៗ»នោះទេ។ នៅក្នុងប្រវត្តិសាស្ត្រ​របស់​ប្រទេសនេះ ពីដើមមក ស្ត្រីដែលមានបបូរមាត់ស្ដើង ឬតូចនោះ ត្រូវបានគេចាត់ទុកថា ជាស្ត្រីគ្រប់លក្ខណ៍មាន​សម្ផស្ស​ស្អាតផូរផង់។ ក្រុមហ៊ុនហាងលក់ប៊ើរហ្គើរ បានពន្យល់ថា «អតិថិជនស្ត្រីរបស់យើង មានអារម្មណ៍ថាទើសទាល់ណាស់ ដែលមិនបានញ៉ាំប៊ើរហ្គើរជំនាន់ចាស់នេះ»។

បន្ទាប់ពីនោះមក ក្រុមហ៊ុននេះបានរកបានដំណោះស្រាយមួយ នោះគឺបង្កើតឲ្យមានក្រដាសបំបាំងមាត់មួយ នៅពីមុខមាត់​របស់ពួកនាង។ ហ៊េមបាហ្គើរនេះ ហៅថា «ប៊ើរហ្គើរបំបាំងមាត់» ដែលធ្វើឲ្យអ្នកផងមើលចំពីមុខនោះ គឺឃើញតែផ្នែកខាង​លើនៃផ្ទៃមុខរបស់អ្នកញ៉ាំប៉ុណ្ណោះ។ តែផ្ទុយទៅវិញ នៅលើក្រដាសនេះ មានរូបភាពបបូរមាត់«ញញឹម»របស់ស្ត្រីស្អាតម្នាក់ ដែលបើទោះជាអ្នកញ៉ាំបើកមាត់ ទទួលហ៊េមបាហ្គើរប៉ុណ្ណា ឬជាប់កំទេចចំណីអាហារនៅគល់ធ្មេញក៏ដោយ ក៏គេនៅតែ​ឃើញអ្នកញញឹម«ស្រស់»ជានិច្ច។ នេះគេហៅថា «ពេលអូនញ៉ាំប៊ើរហ្គើរ ពិតជានៅតែគួរឲ្យស្រឡាញ់មែន»៕

សូមទស្សនាវីដេអូ ពីការទទួលទានហ៊េមប៊ើរហ្គើររបស់ស្ត្រីជប៉ុន ៖

--------------------------------------------------
ដោយ ៖ ឈូករ័ត្ន - ប៉ារីស ថ្ងៃទី០៦ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ