មួយរយៈពេលចុងក្រោយនេះ ប្រទេសជាច្រើនបានធ្វើការប្រតិកម្មខ្លាំងៗ និងព្រមគ្នា បន្ទាប់ពីការលិចធ្លាយរឿងអាស្រូវ ទាក់ទងនឹងការលួចស្តាប់របស់ទីភ្នាក់ងារជាតិសន្តិសុខអាមេរិក ចំពោះការងារទំនាក់ទំនងផ្ទៃក្នុងរបស់ប្រទេសទាំងនោះ ហើយ​ការលួចស្តាប់នោះ រាប់បញ្ចូលតាំងពីប្រជាពលរដ្ឋធម្មតា រហូតដល់ថ្នាក់ដឹកនាំកំពូល។ តែប្រទេសកម្ពុជារហូត​មក​ដល់​ពេលនេះ ហាក់ដូចជាមិនទាន់ធ្វើការប្រតិកម្មណាមួយ ចំពោះករណីនេះនៅឡើយទេ ខណៈគេមានការសង្ស័យថា កម្ពុជា​ក៏ជាប្រទេសដែលរងគ្រោះពីការលួចស្តាប់នេះដែរ។

ការិយាល័យកណ្ដាល នៃទីភ្នាក់ងារសន្តិសុខជាតិអាមេរិក។ (រូបថត today.com)

រាជធានីភ្នំពេញ - ចំពោះករណី«លួចស្ដាប់» ដោយទីភ្នាក់ងារសន្តិសុខជាតិអាមេរិកនេះ អ្នកនាំពាក្យ​រដ្ឋាភិបាលកម្ពុជា លោក ផៃ ស៊ីផាន បានឲ្យទស្សនាវដ្តី​មនោរម្យព័ងអាំងហ្វូដឹងនៅថ្ងៃទី៤ ខែវិច្ឆិការឆ្នាំ២០១៣ នេះថា មូលហេតុដែលកម្ពុជា​មិន​ទាន់ធ្វើការប្រតិកម្មណាមួយនោះ ព្រោះកម្ពុជា រហូតមកដល់ពេលនេះ មិនទាន់មានភស្តុតាងច្បាស់លាស់ណាមួយ ដើម្បី​ជាមូលដ្ឋាន ក្នុងការពិចារណា ឆ្លើយតបទៅនឹងរឿងអាស្រូវ នៃការលួចស្តាប់របស់ទីភ្នាក់ងារសន្តិសុខ​អាមេរិកនៅ​ឡើយ​ទេ។

អ្នកនាំពាក្យដដែលនេះ បញ្ជាក់ថា៖ «យើងមិនទាន់មានភស្តុតាង ចំពោះការលួចស្តាប់ ឬការធ្វើចារកម្មនៅឡើយទេ អាស្រ័យ​ដូច្នេះ យើងមិនមានធ្វើនយោបាយ ឬបតប្រឆាំងជាមួយសហរដ្ឋអាមេរិក ក្រៅពីការពង្រឹងទំនាក់ទំនង និងធ្វើ​សហប្រតិបត្តិការល្អ»។

ប៉ុន្តែនៅពេលសួរថា ប្រសិនបើប្រទេសកម្ពុជាត្រូវបានរកឃើញថា ពិតជារងគ្រោះពីការលួចស្តាប់ពី ទីភ្នាក់ងារ​សន្តិសុខ​អាមេរិកមែននោះ តើរដ្ឋាភិបាលកម្ពុជានឹងចាត់វិធានការដូចម្តេច? លោក ផៃ ស៊ីផាន បានឆ្លើយថាក្នុងនាមប្រទេសកម្ពុជា ជាប្រទេសមានអធិបតេយ្យភាពពេញលេញ និងមានការធានាសន្តិសុខផ្ទៃក្នុងជាតិ កម្ពុជានឹងធ្វើការឆ្លើយតប ដោយគ្មាន​ស្ទាក់ស្ទើរចំពោះសកម្មភាពរបស់សហរដ្ឋអាមេរិក តែក៏ត្រូវប្រកាន់គោលជំហរ រក្សាចំណងមិត្តភាពរវាងប្រជាជាតិទាំងពីរ ដោយមិនយកសហរដ្ឋអាមេរិកធ្វើជាសត្រូវនោះទេ ។

គួរម្លឹកថា បើយោងលើទីភ្នាក់សារព័ត៌មានបារាំងអាអេសប៉េ (AFP) ដែលបានចេញផ្សាយក្នុងពេលថ្មីៗនេះ បានបង្ហាញថា កម្ពុជាក៏ជាប្រទេសរងគ្រោះពីការលួចស្តាប់ របស់ទីភ្នាក់ងារសន្តិសុខរបស់សហរដ្ឋអាមេរិកផងដែរ។ រឿងអាស្រូវ​នៃការ​លួចស្តាប់ របស់សហរដ្ឋអាមេរិក ត្រូវបានសារពត៌មានល្បីៗ នៅជុំវិញភពលោកចុះផ្សាយជាបន្តបន្ទាប់ ខណៈប្រទេស​រង​គ្រោះពីការលួចស្តាប់ មានទាំងប្រទេសនៅតំបន់អាស៊ី អ៊ឺរ៉ុប បានធ្វើការប្រតិកម្មផ្ទួនៗគ្នា ដែលជម្រុញឲ្យទំនាក់ទំនង​ការទូត​រវាងប្រទេសទាំងនោះ និងសហរដ្ឋអាមេរិកមានភាពល្អក់កករ។

ជុំវិញករណីនេះ អ្នកវិភាគនយោបាយឯករាជ្យកម្ពុជា លោក សុខ ទូច លើកឡើងថា កាលដែលកម្ពុជាបន្តរក្សាភាព​ស្ងៀម​ស្ងាត់ ព្រោះកម្ពុជា ជាប្រទេសតូច ហើយកំពុងរងសម្ពាធពីសហរដ្ឋអាមេរិកស្រាប់។ ទន្ទឹមនឹងនេះ លោក សុខ ទូច បាន​អះអាងថាប្រទេសកម្ពុជា វៀតណាម ឡាវ និងភូមា ជាដើមនោះ ត្រូវបានគេកត់សម្គាល់ថា ជាប្រទេសមិនសូវឲ្យតម្លៃ​លើ​សិទ្ធិបុគ្គលនោះដែរ។

យ៉ាងណាក្តី លោក សុខ ទូច បានលើកឡើងថា កាលដែលសហរដ្ឋអាមេរិកលួចស្តាប់ វាមិនមែនជារឿងចម្លែកនោះទេ ព្រោះ​សហរដ្ឋ​អាមេរិកជាប្រទេសមហាអំណាច ដូច្នេះព័ត៌មានចាំបាច់ណាស់សម្រាប់ប្រទេសមហាអំណាច តែក៏ត្រូវប្រើ​ពាក្យ​សុំ​ទោសចំពោះប្រទេស ដែលត្រូវបានរងគ្រោះពីការលួចស្តាប់ផងដែរ ពិសេសប្រទេសដែលឲ្យតម្លៃខ្លាំង​លើសិទ្ធិ​បុគ្គល ឬសិទ្ធិ​ឯកជន៕

---------------------------------------
ដោយ៖ អ៊ុំ បូរី - ថ្ងៃទី៤ ខែវិច្ឆិការ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ