រាជធានីភ្នំពេញ - ថ្លែងនៅក្នុងសន្និសិទសារព័ត៌មាននៅថ្ងៃព្រហស្បតិ៍នេះ មេបក្សប្រឆាំងនៅកម្ពុជា លោក សម រង្ស៊ី បាន​អះអាងថា គណបក្សសង្គ្រោះជាតិ មានគោលជំហរចង់ជួបចរចាជាមួយនឹងគណបក្សប្រជាជនកម្ពជា ដើម្បីរក​យុទ្ធសាស្រ្ត​ក្នុងការទម្លាយនៅភាពទល់ច្រកនយោបាយនៅកម្ពុជា ដោយសន្តិវិធី។ លោក សម រង្ស៊ី បានបញ្ជាក់ថា បញ្ហាជាប់គាំង​នយោបាយនៅពេលនេះ មានតែគណបក្សទាំងពីរជួបជជែកគ្នាតែប៉ុណ្ណោះទើបអាចដោះស្រាយបាន។

ប្រធានគណបក្សសង្គ្រោះជាតិរូបនេះ បានបន្តថា នៅថ្ងៃព្រហស្បតិ៍នេះរូបលោក នឹងធ្វើការទាក់ទងទៅលោក ស ខេង ដែលជាតំណាងគណបក្សប្រជាជនកម្ពុជា ដើម្បីកំណត់ថ្ងៃក្នុងការជួបចរចាគ្នារវាងថ្នាក់ដឹកនាំគណបក្សទាំងពីរ។ លោក សម រង្ស៊ី មិនអាចបញ្ជាក់ពីកាលបរិច្ឆេទច្បាស់លាស់ក្នុងការជួបគ្នានោះទេ ដោយលោកឲ្យរងចាំការសម្រេច​របស់​គណបក្សទាំងពីរ។ លោក សម រង្ស៊ី សង្កត់ធ្ញន់ថា ការជួបគ្នាមិនមានន័យថា គណបក្សប្រឆាំងចូលជាមួយ​គណបក្ស​កាន់​អំណាច ឬទទួលស្គាល់រដ្ឋាភិបាលរបស់លោក ហ៊ុន សែន ឡើយខណៈដែលយុត្តិធម៌នៅមិនទាន់លាតត្រដាងនោះ។

លោក កឹម សុខា អនុប្រធានគណបក្សសង្រ្គោះជាតិ ដែលបានចូលរួមក្នុងសន្និសិទការសែតនោះដែរ បានថ្លែងថា គណបក្ស​សង្គ្រោះជាតិ នៅតែរក្សាជហរជាក់លាក់ទាមទាររកយុត្តិធម៌ជូនម្ចាស់ឆ្នោតដដែល មិនអាចបោះបង់ចោល​បាន​នោះទេ។ លោកថា យុត្តិធម៌នឹងត្រូវបង្ហាញ បន្ទាប់ពីមានការបង្កើតគណកម្មការពិសេស ដើម្បីស៊ីបអង្កេតនៅភាព​មិន​ប្រក្រតីនៃការបោះឆ្នោត។

លោកអនុប្រធានគណបក្សប្រឆាំងរូបនេះ បានបន្តថា ការបោះឆ្នោតកាលពីពេលកន្លងទៅ​ មានភាពមិនប្រក្រតីធ្ងន់ធ្ងរ ដែលទាមទារឲ្យមានការស៊ើបអង្កេតជាបន្ទាន់។ លោក កឹម សុខា ក៏បានស្នើឲ្យថ្នាក់ដឹកនាំគណកម្មាធិការជាតិ រៀបចំការ​បោះឆ្នោត មានលោក អ៊ឹម សួស្តី និងលោក ទេព នីថា ជាដើមចុះចេញពីដំណែងផងដែរ។

មន្រ្តីគណបក្សប្រជាជនកម្ពុជា លោក ជាម យៀប បានប្រាប់ទស្សនាវដ្តីមនោរម្យព័ងអាំងហ្វូរ ថាគណបក្សប្រជាជនកម្ពុជា សូមស្វាគមន៍ចំពោះជំហររបស់គណបក្សប្រឆាំង ក្នុងការជួបចរចាគ្នា ដើម្បីរកដំណោះស្រាយបញ្ហាជាតិ។ តែលោក ជាម យៀប បញ្ជាក់ថា ជំហរបស់បក្សប្រឆាំងដែលទាមទាររកយុត្តិធម៌ជូនម្ចាស់ឆ្នោតនោះ ពិតជាមិនអាចទៅរួចនោះទេ ដោយ​សារអង្ករក្លាយជាបាយទៅហើយ ពោលគឺរដ្ឋាភិបាលរបស់គណបក្សប្រជាជនបានកើតឡើងស្របតាមច្បាប់រដ្ឋធម្មនុញ្ញ។

ជុំវិញបញ្ហានេះ ក្រុមអង្គការសង្គមស៊ីវិល និងអ្នកវិភាគមួយចំនួន បានសម្តែងការពេញចិត្តចំពោះ​ឥរិយាបថទន់ភ្លន់របស់​គណបក្សទាំងពីរក្នុងការជួបចរចាគ្នា ដើម្បីដោះស្រាយបញ្ហា។ ពួកគេបានសង្ឃឹមថា ភាពជាប់គាំងនយោបាយ នឹងអាច​ទម្លាយបាននៅពេលឆាប់ៗខាងមុខនេះ ប្រសិនណាបើគណបក្សទាំងពីរពិតជាសឡាញ់ជាតិមែននោះ។

សូមបញ្ជាក់ថា នៅការជួបចរចាគ្នារវាងថ្នាក់ដឹកនាំគណបក្សប្រឆាំងនិងគណបក្សកាន់អំណាចនៅពេលខាងមុខនេះ ត្រូវ​បានគណបក្សសង្គ្រោះជាតិ ស្នើឲ្យមានការបើកចំហរជាសាធារណៈ ដោយអនុញ្ញាតឲ្យក្រុមអ្នកសារព័ត៌មាន អ្នកអង្កេត​ការជាតិនិងអន្តរជាតិចូលឃ្លាំមើល និងស្តាប់ការចរចាគ្នានេះផងដែរ ជៀសវាងការយកទៅបកស្រាយផ្សេងៗគ្នា។ មិនតែ​ប៉ុណ្ណោះ គណបក្សប្រឆាំង ក៏ទាមទារឲ្យទីកន្លែងជួបគ្នាលើកនេះ មិនមែនធ្វើឡើងនៅវិមានរដ្ឋសភាទេ គឺត្រូវធ្វើនៅ​កន្លែង​ផ្សេងពីទីនេះ។ លើសពីនេះទៅទៀត គណបក្សប្រឆាំងក៏ស្នើឲ្យមានការចាក់ផ្សាយជាសាធារណៈអំពីកិច្ចចរចានេះ នៅ​លើកញ្ចក់ទូរទស្សន៍ ដើម្បីឲ្យប្រជាពលរដ្ឋទូទៅលោកបានដឹង ៕

---------------------------------------------------------
ដោយ៖ ជា ធីរិទ្ធ - ថ្ងៃទី ៣១ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ