អ្នករស់នៅក្នុងទីក្រុងញ៉ូយកមួយរូប បានសម្រេចចិត្តប្ដឹងឡើងទៅតុលាការ បន្ទាប់ពីគាត់បានរងរបួសស្រាល នឹងការផ្ទុះ​មួយនៃបង្គន់អនាម័យ ក្នុងផ្ទះរបស់គាត់។ នេះបើតាមការឲ្យដឹងរបស់ មេធាវីរបស់គាត់ កាលពីសប្ដាហ៍កន្លងមកនេះ។

រូបជំនួស បង្ហាញពីការផ្ទុះចេញពីបង្គន់។ (រូបថត ឯកសារ)

ទីក្រុងប៉ារីស - បុរសចំណាស់៥៨ឆ្នាំ ឈ្មោះ ម៉ៃឃើល ព្ចែរ (Michel Pierre) ដែលរស់នៅក្នុងសង្កាត់ ប្រ៊គ្លីន (Brooklyn) ដែលជាសង្កាត់អ្នកមានមួយ កណ្ដាលទីក្រុងញ៉ូយក បានជួបគ្រោះថ្នាក់ដែលបណ្ដាលមកពី ការផ្ទុះបង្គន់អនាម័យ​ក្នុង​ផ្ទះ​របស់លោក។ មេធាវីរបស់បុរសរូបនេះ បានរម្លឹកឡើងវិញថា លោក ម៉ៃឃើលបានចុចប្រអប់ទឹក ដើម្បី​«សាកល្បង»​ទឹក​លាងចានបង្គន់របស់គាត់ បន្ទាប់មានការផ្ដាច់ជាបណ្ដោះអាសន្ន នូវចរន្តទឹកប្រើប្រាស់នៅក្នុងអាគារ កាលពីថ្ងៃទី២ ខែ​តុលាកន្លងទៅ។ រំពេចនោះ ស្រាប់តែចានបង្គន់របស់គាត់បាន«ផ្ទុះឡើង» បង្កជាបំណែកថ្មធ្វើឲ្យរបួសដល់ មុខ ដៃ និង​ជើងរបស់គាត់ ដែលរួមសរុបទាំងអស់មានចំនួន ៣០កន្លែង។

បង្គន់ចំនួន៤ ធ្លាប់បានផ្ទុះរួចមកហើយ !

ចាប់តាំងពីថ្ងៃនោះមក បទពិសោធន៍ដ៏អាក្រក់ បានធ្វើឲ្យលោក ម៉ៃឃើល ដែលមានមុខរបរជាអ្នកព័ត៌មានវិទ្យាផងនោះ មានការភ័យភិតណាស់ នៅពេលដែលលោកចូលបង្គន់ និងចុចលើប្រអប់ទឹកម្ដងៗ។ លោកមេធាវី សេនហ្វ័រ រូប៊េនស្តែន (Sanford Rubenstein) បាននិយាយថា «ការភ័យភិតនេះ ជាផ្នែកមួយតម្រូវ​ឲ្យមានការសងជម្ងឺចិត្ត»។

លោកមេធាវីបានបន្តទៀតថា «នៅពេលគេចុចប្រអប់ទឹកបង្គន់ គេគិតថានឹងមានទឹកធ្លាក់មកលាងសម្អាតបង្គន់ តែមិន​មែនជាការផ្ទុះមួយបែបនេះទេ»។ ដូច្នេះទាំងនេះហើយ ដែលជាមូលហេតុជំរុញឲ្យកូនក្ដីរបស់លោក បង្ខំចិត្តត្រូវ​ប្ដឹងបណ្ដា​ម្ចាស់ផ្ទះ ដែលនៅក្នុងអាគារជាមួយនឹងលោក ឡើងទៅតុលាការ ដើម្បីសុំឲ្យចៅក្រមចេញសាលក្រមសងជម្ងឺចិត្តមួយ។ នៅមុខហេតុការណ៍ផ្ទុះបង្គន់ អាគារដែលមានកំពស់១៦ជាន់នេះ បានត្រូវអ្នកបច្ចេកទេសផ្ដាច់ចរន្ដទឹកប្រើប្រាស់ ដើម្បី​ធ្វើការជួសជុលកែលម្អ។

ចំណែកឯលោកស្រី តេរីស្សា រ៉ាឆ (Theresa Racht) មេធាវីការពារក្ដី ឲ្យខាងក្រុមម្ចាស់ផ្ទះដែលរស់នៅក្នុងអាគារនោះ បានពន្យល់ដូច្នេះវិញថា «វាជាគ្រោះថ្នាក់ដ៏រន្ធត់មួយ ដែលនរណាៗក៏មានអារម្មណ៍ភ័យខ្លាច ហើយមិនចង់ឲ្យកើតមាន​ចំពោះ​ខ្លួនដែរ»។ លោកស្រីបានបញ្ជាក់ថា មិនមែនត្រឹមតែលើកនេះទេ ព្រោះមានបង្គន់ចំនួនបួនហើយដែលបានផ្ទុះ តែ​រកកំហុសមិនឃើញ។

សម្រាប់លោកស្រី វាជារឿងគ្រោះថ្នាក់ដោយចៃដន្យមួយ ដែលបណ្ដាលមកពី សម្ពាធខ្យល់ដែលចេះតែកើនច្រើនឡើងៗ នៅក្នុងបំពង់លូ ជាពិសេសនៅពេលមានការជួសជុលកែលម្អ។ អ្នកដែលដឹងរឿងនេះ បានសរសើរពីសំណាងលោក ម៉ៃឃើល ថាជាលោកបានឆ្លងគ្រោះ​នេះដោយគ្រាន់តែរបួសស្រាលប៉ុណ្ណោះ ចុះប្រសិនចានបង្គន់នោះបានផ្ទុះក្នុងខណៈពេលដែល លោកបានអង្គុយពីលើទៅវិ តើវានឹងមាន​ហេតុភេទអ្វីកើតឡើង?

--------------------------------------------------
ដោយ ឈូករ័ត្ន - ថ្ងៃទី១៨ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ