ជាការរកឃើញមួយ ដែលនរណាៗក៏ចង់បានដែរ។ ក្រុមកុមារអាយុ១០ឆ្នាំប្រមាណជា១០នាក់ បានចូលទៅលេងក្នុងអាគារ​បោះបង់ចោលមួយ ស្ថិតនៅផ្នែកខាងពាយ័ព្យនៃប្រទេសក្រិច បានរកឃើញស្បោងផ្លាស្ទីកមួយ ...ដែលនៅក្នុងនោះមាន​ប្រាក់សុទ្ធប្រមាណជា៤៣ ពាន់អ៊ឺរ៉ូ (ស្មើនឹង៥៦ ពាន់ដុល្លាអាមេរិក)។

រូបភាពជំនួស បង្ហាញពីអាគារបោះបង់ចោល នៅប្រទេសក្រិច។ (រូបថត LOUISA GOULIAMAKI / AFP)

ទីក្រុងប៉ារីស - កុមារទាំងនោះមិនបានចាប់អារម្មណ៍នឹងប្រាក់នោះទេ ដោយនាំគ្នាយកមកបាចលេច រហូតដល់មាន​ក្រដាសលុយមួយចំនួន បានរហែក។ ប៉ុន្តែអ្នកនៅជិតនោះបានឃើញ ហើយគាត់មានអារម្មណ៍ថាដូចជាចម្លែក ទើប​ជូន​ដំណឹងទៅកងកម្លាំងរក្សាសន្តិសុខប្រចាំតំបន់។

នគរបាលបានមកដល់ទីនោះ ហើយបានរកឃើញថា ស្បោងលុយដ៏សន្ធឹកសន្ធាប់ ជាកម្មសិទ្ធរបស់ស្ត្រីចំណាស់ម្នាក់​អាយុ៨៣ឆ្នាំ ដែលជាម្ចាស់អាគារបោះបង់ចោលនោះ។ ស្ត្រីចំណាស់រូបនេះ បានដកប្រាក់ចេញពីគណនីសន្សំ​ក្នុង​ធនាគារ​របស់គាត់ តាំងពីបីឆ្នាំមុន ខណៈពេលដែលមានការព្រួយបារម្ភ ពីវិបត្តិហិរញ្ញវត្ថុពិភពលោក។

ម្ចាស់ទ្រព្យបានអះអាងថា គាត់លែងចងចាំច្បាស់លាស់អ្វីទាំងអស់ ជាពិសេសពីចំនួនទឹកប្រាក់នៅក្នុងថង់ផ្លាស្ទីក ដែល​គាត់បានភ្លេចនៅ​ក្នុងអាគារនោះ ស្ថិតនៅមិនឆ្ងាយប៉ុន្មានពីគេហដ្ឋានរបស់គាត់។ គាត់គ្រាន់តែនិយាយថា ទឹកប្រាក់អាច​មានចំនួនពី ៥០ពាន់ ទៅ៧០ពាន់អ៊ឺរ៉ូ។

និយាយរួម នៅពេលប្រទេសក្រិចចាប់ផ្ដើមធ្លាក់ខ្លួន ចូលទៅក្នុងវិបត្តិហិរញ្ញវត្ថុធ្ងន់ធ្ងរនោះ មនុស្សជាច្រើនដែលសុទ្ធ​ជាអ្នក​មានធនធាន បានសម្រេច​ចិត្តឈប់ទុកចិត្តធនាគារក្នុងស្រុកតទៅទៀត ហើយបានយកទ្រព្យសម្បត្តិរបស់ផងខ្លួន យក​ទៅ​ទុកក្នុងកន្លែងសុវត្ថិភាពផ្សេងទៀត។ គួរបញ្ជាក់ដែរថា ការបញ្ជាទិញទូដែក នៅក្នុងរយៈកាលនោះ ក៏មានការកើនឡើង​ខ្លាំងដែរ៕

-----------------------------------------------------
ដោយ សេក មនោរកុមារ - ថ្ងៃទី២៤ ខែកញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ