ព្រះមហាក្សត្រនៃប្រទេសកម្ពុជា ព្របាទសម្តេច បរមនាថ នរោត្តម សីហមុនី បានចេញព្រះរាជសារចូល រួមរំលែក​ទុក្ខ​ចំពោះក្រុមគ្រូសារនៃសពយុវជនម្នាក់ ដែលបានស្លាប់ និងអ្នករងរបួសនៅក្នុងអំឡុងពេល ការប៉ះ ទង្គិចគ្នារវាង ក្រុម​បាតុករជាមួយនឹងក្រុមសមត្ថកិច្ចនៅលើស្ពានអាកាសក្បាលថ្នល់កាលពីយប់ថ្ងៃ អាទិត្យម្សិលមិញ។ ជាមួយគ្នានេះ ព្រះមហាក្សត្រ ក៏អំពានាវឲ្យក្រុមបាតុករនិងអជ្ញាធរបញ្ឈប់ការប្រើ ហិង្សាដាក់គ្នានោះទៀត។

ព្រះមហាក្សត្រព្រះបាទ នរោត្តម សីហមុន្នី ទ្រង់គ្រងរាជបល្ល័ង្គ ក្នុងរាជាណាចក្រទីពីរនៃកម្ពុជា។

ភ្លាមៗបន្ទាប់ពីមានការប៉ះទង្គិចគ្នា រវាងក្រុមបាតុករនិងអជ្ញាធរ ដែលបានបណ្តាលឲ្យមានអ្នកសា្លប់ និង មានអ្នក​រងរបួស​ផងនោះ ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជសារ ចុះថ្ងៃទី ១៦ ខែកញ្ញា នេះ ដោយចូល រួម​រំលែក​ទុក្ខចំពោះអ្នករងគ្រោះ នៅក្នុងហេតុការណ៍ដែលបានកើតឡើងនោះ។ នៅក្នុងខ្លឹមសារនៃព្រះរាជសារ​របស់ព្រះមហា​ក្សត្រនោះបាន បង្ហាញថា ព្រះអង្គទ្រង់មានព្រះរាជហឬទ័យ ក្រៀមក្រំជាទីបំផុត និង សូមចូលរួមរំលែកទុក្ខ ចំពោះក្រុម​គ្រួសារនៃសព និង ជនដែលបានរងបួសនៅ ក្នុងហេតុការប៉ះទង្គិច គ្នានោះ។ នៅក្នុងព្រះរាជសារដដែល​នោះបាន​បញ្ជាក់ទៀតថា បន្ទាប់ពីទ្រង់បាន ជ្រាបថា នៅថ្ងៃទី១៥ ខែកញ្ញា ឆ្នាំ២០១៣ មានការប៉ះទង្គិចយ៉ាងខ្លាំង រវាងក្រុមបាតុករ និងក្រុមសមត្ថកិច្ច បណ្តាលឲ្យមានអ្នករងរបួសជាច្រើននាក់ និងមានអ្នកបាត់បង់ជីវិតម្នាក់ ព្រះអង្គមានការសោកស្តាយ និងក្រៀមក្រំជាអនេកចំពោះបញ្ហាដ៏ធ្ងន់ធ្ងរ ដែលបានកើតឡើង ចំពោះជាតិមាតុភូមិ និងប្រជានុរាស្ត្រ នៃព្រះរាជាណាចក្រកម្ពុជា ជាទីស្រឡាញ់នៃយើងទាំងអស់គ្នា។

ព្រះមហាក្សត្រកម្ពុជា ព្រះបាទសម្តេច បរមនាថ នរោត្តម សីហមុនី បានស្នើឲ្យបងប្អូនជនរួមជាតិជាទីស្រឡាញ់​របស់​ព្រះអង្គ ងាកមកប្រកាន់យកប្រពៃណីអហិង្សា ខិតខំយោគ យល់គ្នា រាប់អានគ្នាជាខ្មែរដូចគ្នា និងអត់ធ្មត់ជាអតិប្បរមា ដើម្បីបញ្ជៀសអស្ថេរភាពនៃជាតិយើង។ ព្រះអង្គក៏បានធ្វើការអំពាវ នាវនិងទទូច ដល់ជនរួមជាតិទាំងមូល ដែលជាក្រុម​បាតុករ និងក្រុមសមត្ថកិច្ច សូមបញ្ឈប់ការប្រើអំពើ ហិង្សា តាមរូបភាពណាក៏ដោយ ដូចជា ការគប់ដុំថ្ម និងការប្រើប្រាស់​អាវុធ ដែលបណ្តាលឲ្យបងប្អូនទាំង អស់គ្នា ទទួលរង របួស ឬបាត់បង់ជីវិត និងបណ្តាលឲ្យមានគ្រោះថ្នាក់ កាន់តែធ្ងន់​ធ្ងរដល់សង្គមយើងទាំងមូល។

សូមបញ្ជាក់ថា ការប៉ះទង្គិចគ្នារវាងក្រុមបាតុករមួយក្រុម ជាមួយប៉ូលិស នៅស្ពានអាកាសក្បាលថ្នល់ កាលពីយប់ថ្ងៃ​អាទិត្យ ទី១៥កញ្ញា ឆ្នាំ២០១៣ ត្រូវបានសកម្មជនសិទ្ធិមនុស្ស លោក ចាន់ សុវ៉េត បានអះអាងថា យ៉ាងហោចណាស់​មាន​បុរសម្នាក់បានស្លាប់ ដោយគ្រាប់កាំភ្លើងរបស់សមត្ថកិច្ច និងមនុស្ស៣នាក់ បានរងរបួសជាដំណំ ព្រមទាំងមនុស្សជាង ១០ នាក់ផ្សេងទៀត ត្រូវបានចាប់ខ្លួនផងដែរ។ សកម្មជនសិទ្ធិមនុស្សរូបនេះ បានបញ្ជាក់ទៀតថា មូលហេតុដែលនាំឲ្យ​មាន​អំពើហិង្សានេះ គឺបណ្តាល មកពីការបិទផ្លូវរបស់អជ្ញាធរ ដែលធ្វើឲ្យប៉ះពាល់ដល់ការធ្វើដំណើររបស់ពលរដ្ឋ។

ទាក់ទងនឹងអពើហិង្សានេះ នៅថ្ងៃច័ន្ទទី១៦ ខែកញ្ញានេះ គណ:បញ្ជាការ សន្តិសុខអចិន្ត្រៃយ៍សំរាប់ការ បោះឆ្នោតបាន​ចេញនូវសេចក្ដីថ្លែងការណ៍មួយ ដោយទម្លាក់កំហុសទៅលើគណបក្សសង្គ្រោះជាតិ ឲ្យជាទទួលខុសត្រូវ​ចំពោះ​ព្រឹត្តិការណ៍ ដែលបានកើតឡើងទាំងឡាយដែលកើតចេញ ពីការធ្វើបាតុកម្មរបស់ គណបក្សខ្លួននោះ។ តែយ៉ាង​ណា​​ក៏​ដោយភ្លាមៗ បន្ទាប់ពីហេតុការណ៍កើតឡើង គណបក្សសង្គ្រោះជាតិ បានចេញសេចក្តីថ្លែងការណ៏ ដោយបដិសេធ​មិនទទួលខុសត្រូវចំពោះអំពើហិង្សា ដែលបានកើតឡើងនោះឡើយ។

នៅថ្ងៃនេះ នៅក្នុងជំនួបរវាងថ្នាក់ដឹកនាំកំពូលៗរបស់គណបក្សទាំងពីរ ដែលដឹកនាំ ដោយលោក ហ៊ុន សែន និងលោក សម រង្ស៊ី បានសម្រេចឯកភាពគ្នាចំនួន ៣ ចំណុច ដែលនៅក្នុងចំណុចទាំង ៣ នោះ មានចំណុចទី ១ បានបញ្ជាក់ថា ភាគីទាំងពីរ ឯកភាពគ្នាគោរព និងអនុវត្តដោយហ្មត់ចត់ តាមព្រះរាជសាររបស់ព្រះមហាក្សត្រ កាលថ្ងៃទី១៦ ខែកញ្ញា ឆ្នាំ២០១៣ ដែលព្រះអង្គ អំពាវនាវចំពោះជនរួមជាតិទាំងមូល ដែលជាក្រុមបាតុករ និងក្រុមសមត្ថកិច្ច សូមបញ្ឈប់​ការ​ប្រើអំពើហិង្សា តាមរូបភាពណាក៏ដោយ៕

---------------------------------
ដោយ៖ ជា ធីរិទ្ធ - ភ្នំពេញថ្ងៃទី១៦ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ