បន្ទាប់ពីអង្គព្រះមហាក្សត្រ បានចេញព្រះរាជសារកៅហៅមេដឹកនំាគណបក្សទាំងពីរ ពោលគឺលោក ហ៊ុន សែន និង លោក សម រង្ស៊ី ដើម្បីជួបចចារគ្នា ដើម្បីរកវិធីដោះស្រាយបញ្ហាជាតិកាលពីម្សិលមិញរួចមក។ លោក ហ៊ុន សែន និងលោក សម រង្ស៊ី បានយល់ព្រមតាមការកោះហៅរបស់ព្រះមហាក្សត្រ ដោយ សម្រេចជួបពិភាក្សាគ្នានៅថ្ងៃស្អែកនេះ ក្រោមអធិបតី​ព្រះមហាក្សត្រ។ តែលោក សម រង្ស៊ី បានអះអាងថា លោកចូលរួមចចារមែន ប៉ុន្តែគ្មាននោះទេការចរចារដើម្បី​បែងចែក​អំណាច គឺមានតែមួយគត់ទាមទារឲ្យ បង្កើតគណៈកម្មការពិសេសតែប៉ុណ្ណោះ។

លោក សម រង្ស៊ី និងលោក កឹម សុខា (រូបកណ្ដាលពាក់កម្រងផ្កា) នៅមុខលោកតាដំបងគ្រញូង ខេត្តបាត់ដំបង ថ្ងៃទី​១៣​ខែកញ្ញាឆ្នាំ២០១៣។ (រូបថត គណបក្ស)

នៅថ្ងៃនេះ មេដឹកគណបក្សសង្គ្រោះជាតិ លោក សម រង្ស៊ី បានប្រកាសពីក្រុងបាត់ដំបង ដែលជា ទីកន្លែង លោកជួបអ្នក​គាំទ្ររបស់ខ្លូននៅថ្ងៃនេះមកថា លោកយល់ព្រមចូលរួមចចារ តាមការកោះ អញ្ជើញរបស់ ព្រះមហាក្សត្រជាមួយលោក ហ៊ុន សែន។ ក៏ប៉ុន្តែលោកបញ្ជាក់ថា ការជួបចចារនោះនឹងគ្មានសោះឡើយ ការពិភាក្សាណាមួយ អំពីការបែងចែកអំណាច​ជាមួយនឹងគណបក្សប្រជាជនកម្ពុជា ដើម្បីបង្កើតរដ្ឋាភិបាលនោះទេ ពោលគឺមានតែមួយគត់ប៉ុណ្ណោះ គឺចចារដើម្បីបង្កើត​គណៈកម្មការពិសេស ដើម្បី ស៊ើបអង្កេតរកភាពមិនប្រក្រតីពេលបោះឆ្នោត។ មេដឹកនាំបក្សប្រឆំាងរូបនេះ បានបន្តថា លោកយកពលរដ្ឋជាធំ លោកត្រូវតែទាមរកយុត្តិធម៌ឲ្យពលរដ្ឋ ដែលទទួលរងនូវភាពអយុត្តិធម៌ជាមុនសិន។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានសរសេរនៅក្នុងបណ្តាញសង្គម Facebook របស់ខ្លួនថា នៅ​ក្នុងជំនួបជាមួយលោក ហ៊ុន សែន នៅព្រះបរមរាជវាំងនាថ្ងៃស្អែកនេះ លោក សម រង្ស៊ី នឹងដឹកនាំគណៈប្រតិភូ ខាង​គណបក្សសង្គ្រោះជាតិចំនួនពីររូប រួមមានលោក កឹម សុខា អនុប្រធានគណបក្ស និងលោក ស្រី ជូឡុង សូមួរ៉ា ដែលជា​ភរិយារបស់លោក សម រង្ស៊ី។

ព្រះមហក្សត្រនៃប្រទេសកម្ពុជា បានចេញព្រះភក្រ្តធ្វើអន្តរាគន៍ជុំវិញវិបត្តិនយោបាយ ដែលបានជាប់ គាំងក្រោយពេល​បោះ​ឆ្នោត​អស់រយៈពេលជិតពីរខែកន្លងមកនេះ។ ការចេញព្រះភក្រ្តរបស់ ព្រះអង្គ នៅពេលនេះ ត្រូវបានគេឃើញមើលថា ជាចំណុចប្រសើរណាស់ ដើម្បីបន្ធូរបន្ថយនូវស្ថានការណ៍ នយោបាយនៅក្នុងប្រទេស ឲ្យមានភាពវិជ្ជមានឡើងវិញ ពោល​គឺនឹងអាចឈានទៅរកមានដំណោះស្រាយ នយោបាយដែលបានជាប់គាំងក៏អាចថាបាន។

ភ្លាមៗបន្ទាប់ព្រះមហាក្សត្រ បានកោះហៅ លោកនាយករដ្ឋមន្រ្តី ហ៊ុន សែន ក៏បានសរសេរលិខិតឆ្លើយតប ថ្វាយ​ព្រះមហាក្សត្រ ដោយយល់ព្រមតាមការសម្រេចព្រះទ័យរបស់ព្រះអង្គ ក្នុងការជួបពិភាក្សាជាមួយ នឹងថ្នាក់ដឹកនាំ​គណបក្សសង្គោះជាតិ អំពីបញ្ហាប្រទេសជាតិ នៅថ្ងៃទី ១៤ ខែកញ្ញា ស្អែកនេះ នៅព្រះបរម រាជវាំង។ នៅក្នុងលិខិត​ថ្វាយ​ព្រះមហាក្សត្រនោះ លោក ហ៊ុន សែន បានបញ្ជាក់ថា លោក នឹងដឹកនាំស ហការីរបស់លោកចំនួនពីររូបមាន លោក សាយ ឈុំ និងលោក ស ខេង ចូលរួមនៅក្នុងកិច្ចចចារនោះ។

យ៉ាងណាក៏ដោយ ជំនួបចចាររបស់មេដឹកនាំគណបក្សទាំងពីរ ក្រោមព្រះរាជតម្រិះរបស់ព្រះមហាក្សត្រ នៅថ្ងៃស្អែកនេះ ត្រូវបានក្រុមអ្នកតាមដានស្ថានការណ៍នយោបាយនៅកម្ពុជា បានសម្តែងការសាទរ។ ក៏ប៉ុន្តែអ្វីដែលគេបារម្ភនោះថា តើ​ជំនួបចចារនេះ នឹងអាចបានលទ្ធផលល្អដែរឬយ៉ាងណា? បើគណបក្សប្រឆំាងបានប្រកាសពីគោលជំហរហើយថា កិច្ច​ពិភាក្សានេះ និយាយគ្នាតែអំពីការបង្កើតគណៈកម្មការពិសេសតែប៉ុណ្ណោះ ខណៈដែលគណបក្សប្រជាជនកម្ពុជា បាន​ប្រកាសជាញឹកញាប់ហើយថា គណៈ កម្មការពិសេស៊ើបអង្កេតការបោះឆ្នោតមិនអាចបង្កើតបាននោះទេ ព្រោះ​វា​ផ្ទុយនឹង​ច្បាប់។ ម្យ៉ាងវិញ ទៀតនោះ លទ្ធផលផ្លូវការនៃការបោះឆ្នោតត្រូវបានគ.ជ.ប ប្រកាសរួចហើយនោះ។

សូមបញ្ចាក់ថា កាលពីថ្ងៃទី ១២ ខែកញ្ញា ម្សិលមិញ ព្រះមហាក្សត្រនៃព្រះរាជាណាចក្រកម្ពុជា ព្រះបាទ សម្តេច បរមនាថ នរោត្តម សហមុនី បានចេញព្រះរាជសារចំនួនពីរក្នុងពេលតែមួយ ដោយព្រះរាជសារ មួយផ្ញើរជូនលោក ហ៊ុន សែន អនុ​ប្រធានគណបក្សប្រជាជនកម្ពុជា និងព្រះរាជសារមួយទៀតផ្ញើរជូន លោក សម រង្ស៊ី មេបក្សប្រឆាំងនៅកម្ពុជា។ ខ្លឹមសារ​នៅក្នុងព្រះរាជសាររបស់ព្រះមហាក្សត្រនោះ គឺដើម្បី កោះអញ្ជើញមេដឹកនាំនៃគណបក្សទាំងពីរ ឲ្យចូលរួមប្រជុំពិភាក្សាគ្នា រកដំណោះស្រាយបញ្ហារបស់ប្រ ទេសជាតិ។ ជំនួបនោះ នឹងប្រារព្ធឡើងក្រោមអធិបតីរបស់ព្រះមហាក្សត្រ នៅប្រាសាទ​ខេមរិន្ទ ព្រះបរម រាជវាំង នាវេលាម៉ោង ៩: ០០ នាទីព្រឹក ថ្ងៃទី ១៤ ខែ កញ្ញា ឆ្នាំ ២០១៣ ស្អែកនេះ។

---------------------------------
ដោយ៖ ជា ធីរិទ្ធ - ភ្នំពេញថ្ងៃទី១៣ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ